നയാഗ്ര: നയാഗ്ര ഫോൾസിലെ ഡ്രമ്മണ്ട് റോഡിലുള്ള കോർത്യാർഡ് അപ്പാർട്ട്മെന്റിൽ തിങ്കളാഴ്ച വൈകുന്നേരമുണ്ടായ ശക്തമായ തീപിടുത്തത്തിൽ ഒരാൾക്ക് പരിക്കേൽക്കുകയും നിരവധി കുടുംബങ്ങൾക്ക് വീടുകൾ നഷ്ടപ്പെടുകയും ചെയ്തു. വൈകുന്നേരം എട്ട് മണിയോടെയാണ് ഫ്ലാറ്റിനുള്ളിൽ തീപടർന്നതായി അടിയന്തര രക്ഷാസേനയ്ക്ക് വിവരം ലഭിക്കുന്നത്. ഉടൻ തന്നെ സ്ഥലത്തെത്തിയ അഗ്നിശമന സേനാംഗങ്ങൾ വളരെ വേഗത്തിൽ തീ നിയന്ത്രണവിധേയമാക്കിയതിനാൽ വൻ ദുരന്തമാണ് ഒഴിവായത്. ഫ്ലാറ്റിന്റെ മറ്റ് ഭാഗങ്ങളിലേക്ക് തീ പടരാതിരിക്കാൻ രക്ഷാപ്രവർത്തകർക്ക് സാധിച്ചതായി ഫയർ ചീഫ് ജോ സാംബിറ്റോ അറിയിച്ചു.
അപകടത്തിൽ പരിക്കേറ്റ പ്രായമായ ഒരു സ്ത്രീയെ ഉടൻ തന്നെ ചികിത്സയ്ക്കായി ആശുപത്രിയിലേക്ക് മാറ്റി. എന്നാൽ ഇവരുടെ പരിക്ക് എത്രത്തോളം ഗുരുതരമാണെന്ന കാര്യത്തിൽ അധികൃതർ വ്യക്തത വരുത്തിയിട്ടില്ല. തീപിടുത്തത്തെ തുടർന്ന് ഫ്ലാറ്റിലെ നാൽപ്പതോളം താമസക്കാരെയാണ് താൽക്കാലികമായി അവിടെനിന്നും ഒഴിപ്പിച്ചത്.
സുരക്ഷിതമായി പ്രദേശം മാറ്റിയ ഇവർക്ക് ആവശ്യമായ താൽക്കാലിക താമസസൗകര്യങ്ങളും മറ്റ് സഹായങ്ങളും അധികൃതർ ഉറപ്പാക്കിയിട്ടുണ്ട്. അതേസമയം, തീപിടുത്തത്തിന്റെ യഥാർത്ഥ കാരണം എന്താണെന്ന് വ്യക്തമായിട്ടില്ലെന്നും നാശനഷ്ടങ്ങളുടെ കണക്കുകൾ നോക്കി വരികയാണെന്നന്നും പോലീസ് അറിയിച്ചു. സംഭവത്തിൽ അന്വേഷണം പുരോഗമിക്കുകയാണ്.
Fire breaks out at Drummond Road flat: One person hospitalized,
