ന്യൂയോർക്ക്: വടക്കേ അമേരിക്കയിലെ ഏറ്റവും വലിയ യാത്രാ റെയിൽ ശൃംഖലയായ ലോങ് ഐലൻഡ് റെയിൽ റോഡ് (LIRR) പൂർണമായും സ്തംഭിച്ചു. ശമ്പളവർധനവും ആരോഗ്യ ഇൻഷുറൻസ് ആനുകൂല്യങ്ങളും സംബന്ധിച്ച് മെട്രോപൊളിറ്റൻ ട്രാൻസ്പോർട്ടേഷൻ അതോറിറ്റിയും (MTA) തൊഴിലാളി യൂണിയനുകളും തമ്മിൽ മാസങ്ങളായി നിലനിന്നിരുന്ന ചർച്ചകൾ പരാജയപ്പെട്ടതിനെത്തുടർന്നാണ് ജീവനക്കാർ പണിമുടക്ക് ആരംഭിച്ചത്. മൂന്ന് പതിറ്റാണ്ടിനിടെ ഇതാദ്യമായാണ് ഈ റെയിൽവേ ശൃംഖലയിൽ ജീവനക്കാർ കൂട്ടത്തോടെ ജോലി ബഹിഷ്കരിക്കുന്നത്. ശനിയാഴ്ച അർധരാത്രിയോടെ സർവീസുകൾ പൂർണമായി നിലച്ചതോടെ ന്യൂയോർക്ക് നഗരവും കിഴക്കൻ പ്രാന്തപ്രദേശങ്ങളും കടുത്ത യാത്രാക്ലേശത്തിലേക്ക് നീങ്ങുകയാണ്.
റെയിൽവേയിലെ പകുതിയോളം ജീവനക്കാരെ പ്രതിനിധീകരിക്കുന്ന അഞ്ച് പ്രമുഖ യൂണിയനുകളാണ് അർധരാത്രി 12:01 മുതൽ പണിമുടക്ക് പ്രഖ്യാപിച്ചത്. സമരം ഒത്തുതീർപ്പാക്കാൻ യുഎസ് ഭരണകൂടം ഇടപെട്ട് മധ്യസ്ഥചർച്ചകൾക്ക് ശ്രമിച്ചെങ്കിലും ലക്ഷ്യം കണ്ടില്ല. നിലവിൽ പുതിയ ചർച്ചകളൊന്നും നിശ്ചയിച്ചിട്ടില്ലെന്നും മാനേജ്മെന്റുമായി വലിയ അഭിപ്രായവ്യത്യാസങ്ങൾ നിലനിൽക്കുന്നുണ്ടെന്നും ബ്രദർഹുഡ് ഓഫ് ലോക്കോമോട്ടീവ് എഞ്ചിനീയേഴ്സ് ആൻഡ് ട്രെയിൻമെൻ ദേശീയ വൈസ് പ്രസിഡന്റ് കെവിൻ സെക്സ്റ്റൺ വ്യക്തമാക്കി. എന്നാൽ യൂണിയനുകൾ ആവശ്യപ്പെട്ടതെല്ലാം നൽകാൻ തങ്ങൾ തയ്യാറായിരുന്നുവെന്നും സമരം മുൻകൂട്ടി ആസൂത്രണം ചെയ്തതാണെന്നുമാണ് എംടിഎ ചെയർമാൻ ജാനോ ലിബറുടെ നിലപാട്.
സമരത്തെത്തുടർന്ന് ന്യൂയോർക്കിലെ പ്രധാന റെയിൽവേ ഹബ്ബായ മാൻഹാട്ടനിലെ പെൻ സ്റ്റേഷൻ പൂർണമായും വിജനമായി. സാധാരണയായി വാരാന്ത്യങ്ങളിൽ വൻ ജനത്തിരക്ക് അനുഭവപ്പെടാറുള്ള ഇവിടെ പ്ലാറ്റ്ഫോമുകളിലേക്കുള്ള പ്രവേശന കവാടങ്ങൾ അധികൃതർ താത്കാലിക ബാരിക്കേഡുകൾ ഉപയോഗിച്ച് അടച്ചുപൂട്ടി. ട്രെയിനുകളുടെ സമയവിവരങ്ങൾ കാണിക്കുന്ന ഡിസ്പ്ലേ ബോർഡുകളിൽ യാത്രക്കാരില്ലാത്ത ‘ghost trains’ (സർവീസ് നടത്താത്ത ട്രെയിനുകൾ) എന്ന മുന്നറിയിപ്പാണ് കാണിക്കുന്നത്.
അതേസമയം, ഈ സമരത്തിൽ പങ്കാളികളാകാത്ത ആംട്രാക് (Amtrak) ട്രെയിൻ സർവീസുകളെ സമരം ബാധിച്ചിട്ടില്ല. എന്നാൽ ഈ ആഴ്ച അവസാനം മാൻഹാട്ടനിൽ നടക്കുന്ന പ്രമുഖ ബേസ്ബോൾ, ബാസ്ക്കറ്റ്ബോൾ മത്സരങ്ങൾ കാണാനെത്തുന്ന കായികപ്രേമികളെ സമരം നേരിട്ട് ബാധിക്കുമെന്നാണ് റിപ്പോർട്ടുകൾ. പ്രശ്നം വരും ദിവസങ്ങളിലേക്ക് നീണ്ടാൽ തിങ്കളാഴ്ച മുതൽ ജോലിക്ക് പോകുന്ന രണ്ടര ലക്ഷത്തോളം വരുന്ന സ്ഥിരം യാത്രക്കാരുടെ ദുരിതം ഇരട്ടിയാകും. കോവിഡ് മഹാമാരിക്ക് ശേഷം വർക്ക് ഫ്രം ഹോം സംവിധാനങ്ങൾ വ്യാപകമായെങ്കിലും നിർമ്മാണം, ആരോഗ്യ സംരക്ഷണം, വിദ്യാഭ്യാസം തുടങ്ങിയ മേഖലകളിൽ നേരിട്ടെത്തി ജോലി ചെയ്യേണ്ട ജീവനക്കാർക്ക് റെയിൽവേ സ്തംഭനം വലിയ തിരിച്ചടിയാണ്. ഇതിനിടെ, ഈ വിഷയത്തെച്ചൊല്ലി രാഷ്ട്രീയ ആരോപണ പ്രത്യാരോപണങ്ങളും യുഎസിൽ ശക്തമായിട്ടുണ്ട്.
മധ്യസ്ഥ ചർച്ചകൾ വേഗത്തിൽ അവസാനിപ്പിച്ച് സമരത്തിന് വഴിയൊരുക്കിയത് ട്രംപ് ഭരണകൂടമാണെന്ന് ഡെമോക്രാറ്റിക് ഗവർണർ കാത്തി ഹോച്ചുൾ ആരോപിച്ചു. എന്നാൽ ഈ സമരവുമായി തനിക്ക് യാതൊരു ബന്ധവുമില്ലെന്നും ഗവർണറുടെ പരാജയമാണ് ഇതെന്നുമാണ് മുൻ പ്രസിഡന്റ് ഡൊണാൾഡ് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ വഴി പ്രതികരിച്ചത്.
കഴിഞ്ഞ കുറച്ചുകാലമായി രാജ്യം നേരിടുന്ന കടുത്ത പണപ്പെരുപ്പത്തിന് ആനുപാതികമായി ശമ്പളവർധനവ് വേണമെന്നാണ് തൊഴിലാളികളുടെ ആവശ്യം. എന്നാൽ യൂണിയനുകളുടെ ഈ ആവശ്യങ്ങൾ അംഗീകരിച്ചാൽ അത് റെയിൽവേയുടെ സാമ്പത്തിക ഭദ്രതയെ ബാധിക്കുമെന്നും വരും വർഷങ്ങളിൽ യാത്രക്കാരുടെ ടിക്കറ്റ് നിരക്ക് ഇരട്ടിയായി വർധിപ്പിക്കേണ്ടി വരുമെന്നും എംടിഎയുമായി ബന്ധപ്പെട്ട ഉപഭോക്തൃ സമിതികൾ മുന്നറിയിപ്പ് നൽകുന്നു. വരാനിരിക്കുന്ന തിരഞ്ഞെടുപ്പിൽ ലോങ് ഐലൻഡ് മേഖലയിലെ വോട്ടുകൾ നിർണായകമായതിനാൽ, സമരം എത്രയും വേഗം ഒത്തുതീർപ്പാക്കാൻ ഗവർണർ കാത്തി ഹോച്ചുളിന് മേൽ രാഷ്ട്രീയ സമ്മർദ്ദവുമുണ്ട്. യാത്രക്കാർക്കായി എംടിഎ പരിമിതമായ ഷട്ടിൽ ബസ് സർവീസുകൾ ഏർപ്പെടുത്തിയിട്ടുണ്ടെങ്കിലും ഇത് നിലവിലെ യാത്രാക്ലേശം പരിഹരിക്കാൻ പര്യാപ്തമല്ല.
Train strike rocks US; Long Island Railway shuts down for first time in three decades
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
