കാൽഗറി : ആൽബർട്ട പ്രവിശ്യയിൽ ഈ ഒക്ടോബറിൽ നടത്താനിരുന്ന വേർപിരിയൽ വോട്ടെടുപ്പ് കോടതി വിധിയോടെ അനിശ്ചിതത്വത്തിലായി. വോട്ടെടുപ്പ് ആവശ്യപ്പെട്ട് സമർപ്പിച്ച ഹർജിയും ഇതിനായി ശേഖരിച്ച 3,01,000 ആളുകളുടെ ഒപ്പുകളും കിങ്സ് ബെഞ്ച് ജഡ്ജി ഷൈന ലിയോണാർഡ് റദ്ദാക്കി. കാനഡയുമായുള്ള തദ്ദേശീയ ഗോത്രവിഭാഗങ്ങളുടെ കരാറുകളെ ബാധിക്കുന്ന ഇത്തരം നിർണ്ണായക പ്രക്രിയകളിലേക്ക് കടക്കുന്നതിന് മുൻപ്, പ്രവിശ്യാ ഭരണകൂടം തങ്ങളുമായി കൂടിയാലോചനകൾ നടത്തിയില്ലെന്ന അത്തബാസ്ക ചിപെവ്യൻ ഫസ്റ്റ് നേഷൻ, ബ്ലാക്ക്ഫൂട്ട് കോൺഫെഡറേഷൻ എന്നിവരുടെ വാദം കോടതി അംഗീകരിക്കുകയായിരുന്നു. ഈ വിധിക്കെതിരെ അപ്പീൽ നൽകുമെന്ന് ആൽബർട്ട പ്രീമിയർ ഡാനിയേൽ സ്മിത്തും വിഘടനവാദ അണികളുടെ അഭിഭാഷകനായ ജെഫ്രി റാത്തും വ്യക്തമാക്കിയതായി റിപ്പോർട്ടിൽ പറയുന്നു.
കോടതി നടപടികൾക്ക് സാധാരണ രീതിയിൽ സമയമെടുക്കുമെന്നതിനാൽ ഒക്ടോബർ 19-ലേക്ക് നിശ്ചയിച്ചിരുന്ന റഫറണ്ടം കൃത്യസമയത്ത് നടത്താൻ സാധിക്കില്ലെന്നാണ് വിലയിരുത്തൽ. ഇതേത്തുടർന്ന്, കോടതി വിധി മറികടന്ന് പ്രവിശ്യാ സർക്കാർ നേരിട്ട് റഫറണ്ടം പ്രഖ്യാപിക്കണമെന്ന സമ്മർദ്ദം വിഘടനവാദ സംഘടനയായ ‘സ്റ്റേ ഫ്രീ ആൽബർട്ട’ പ്രീമിയർക്ക് മേൽ ചെലുത്തുന്നുണ്ട്. എന്നാൽ, സർക്കാർ നേരിട്ട് വോട്ടെടുപ്പ് പ്രഖ്യാപിച്ചാലും തദ്ദേശീയ ജനവിഭാഗങ്ങളുമായി കൂടിയാലോചിച്ചില്ലെന്ന ഇതേ വാദമുയർത്തി കോടതിയിൽ ചോദ്യം ചെയ്യപ്പെടുമെന്ന് അത്തബാസ്ക ചിപെവ്യൻ വിഭാഗത്തിന്റെ അഭിഭാഷകനായ കെവിൻ ഹില്ലെ വ്യക്തമാക്കി. അതേസമയം, കൂടിയാലോചനകൾക്കുള്ള ഭരണഘടനാപരമായ ബാധ്യതകൾ വേർപിരിയലിന്റെ അടുത്ത ഘട്ടങ്ങളിൽ മാത്രമേ ഉണ്ടാകൂ എന്നതിനാൽ ജഡ്ജിക്ക് നിയമപരമായ തെറ്റുപറ്റിയിട്ടുണ്ടെന്നാണ് വിഘടനവാദികളുടെ അഭിഭാഷകൻ ജെഫ്രി റാത്തും ഭരണഘടനാ വിദഗ്ധൻ ഡ്വൈറ്റ് ന്യൂമാനും വാദിക്കുന്നത്.
ആൽബർട്ടയിലെ 27 ശതമാനം ജനങ്ങൾ മാത്രമാണ് വിഘടനവാദത്തെ അനുകൂലിക്കുന്നതെങ്കിലും പ്രീമിയർ ഡാനിയേൽ സ്മിത്തിന്റെ പാർട്ടിയായ യുണൈറ്റഡ് കൺസർവേറ്റീവ് പാർട്ടിയുടെ (UCP) ഭൂരിഭാഗം അണികളും വേർപിരിയലിനെ അനുകൂലിക്കുന്നവരാണെന്ന് കഴിഞ്ഞ മാസത്തെ ജാനറ്റ് ബ്രൗൺ ഒപീനിയൻ റിസർച്ച് പോൾ വ്യക്തമാക്കുന്നു. അതിനാൽ, വോട്ടെടുപ്പ് പ്രഖ്യാപിച്ചില്ലെങ്കിൽ സ്മിത്തിന്റെ നേതൃത്വത്തിന് നേരെ രാഷ്ട്രീയ വെല്ലുവിളിയുണ്ടാകുമെന്ന് റാത്തും നിരീക്ഷിച്ചു. ഈ വിഷയത്തിൽ പ്രതികരിച്ച കനേഡിയൻ പ്രധാനമന്ത്രി മാർക്ക് കാർണി, ആൽബർട്ട കാനഡയുടെ ഭാഗമാണെന്നും പ്രവിശ്യകൾക്ക് റഫറണ്ടം നടത്താൻ അവകാശമുണ്ടെങ്കിലും അത് തദ്ദേശീയ ജനവിഭാഗങ്ങളുടെ അവകാശങ്ങൾ മാനിച്ചും ‘ക്ലാരിറ്റി ആക്ട്’ (Clarity Act) പ്രകാരവുമായിരിക്കണം നടത്തേണ്ടതെന്നും ഓർമ്മിപ്പിച്ചു. വിഷയത്തിൽ അടുത്ത ആഴ്ച നടക്കുന്ന കാബിനറ്റ് യോഗങ്ങൾക്ക് ശേഷം പ്രവിശ്യാ സർക്കാർ അന്തിമ തീരുമാനമെടുക്കുമെന്നാണ് റിപ്പോർട്ട്.
Court ruling sets back Alberta’s secession vote in crisis
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
