ടൊറന്റോ: ഗ്രേറ്റർ ടൊറന്റോ ഏരിയയിൽ വായുവിൽ പോളൻഗ്രെയിൻസിന്റെ അളവ് അസാധാരണമായി വർധിക്കുന്ന ‘Explosion of Pollen’ പ്രതിഭാസം അലർജി രോഗികൾക്ക് വലിയ വെല്ലുവിളിയാകുന്നു. സാധാരണയായി വ്യത്യസ്ത സമയങ്ങളിൽ നടക്കേണ്ട മരങ്ങളുടെ പരാഗണ പ്രക്രിയ ഇത്തവണ കാലാവസ്ഥാ വ്യതിയാനം മൂലം ഒരേസമയത്ത് സംഭവിക്കുന്നതാണ് ഈ പ്രതിഭാസത്തിന് പ്രധാന കാരണം. സീഡർ, മേപ്പിൾ തുടങ്ങിയ മരങ്ങൾ പരാഗണം നടത്താൻ വൈകിയതോടെ, ബിർച്ച്, ഓക്ക് തുടങ്ങിയ മരങ്ങൾക്കൊപ്പം തന്നെ ഇവയും വായുവിൽ പരാഗരേണുക്കൾ പടർത്തുകയാണ്. വരും ആഴ്ചകളിലും ഈ തീവ്രമായ അവസ്ഥ തുടരുമെന്നാണ് വിദഗ്ധർ വിലയിരുത്തുന്നത്.
കഴിഞ്ഞ മൂന്ന് പതിറ്റാണ്ടിനിടെ കാനഡയിലെ പോളൻഗ്രെയിൻസിന്റെ അളവ് ഇരട്ടിയായതായി എയറോബയോളജി റിസർച്ച് ലബോറട്ടറീസ് ചൂണ്ടിക്കാട്ടുന്നു. ആഗോളതാപനവും വായുമലിനീകരണവും ഈ വർധനവിന് ആക്കം കൂട്ടുന്നുണ്ട്. വാഹനങ്ങളിൽ നിന്നുള്ള പുകയിലെ വിഷാംശങ്ങൾ പോളൻഗ്രെയിൻസിൽ കലരുന്നത് മനുഷ്യന്റെ പ്രതിരോധ സംവിധാനത്തെ കൂടുതൽ പ്രകോപിപ്പിക്കുകയും തുമ്മൽ, കണ്ണ് ചൊറിച്ചിൽ തുടങ്ങിയ അലർജി ലക്ഷണങ്ങൾ കടുപ്പിക്കുകയും ചെയ്യുന്നു.
അലർജി ലക്ഷണങ്ങൾ നിയന്ത്രിക്കുന്നതിനായി പുലർച്ചെ 4 മണി മുതൽ 10 മണി വരെയുള്ള സമയങ്ങളിൽ വീടിന്റെ ജനലുകൾ അടച്ചിടാൻ ശ്രദ്ധിക്കണമെന്ന് ആരോഗ്യ വിദഗ്ധർ നിർദ്ദേശിക്കുന്നു. ഈ സമയത്താണ് വായുവിൽ പോളൻഗ്രെയിൻസിന്റെ സാന്നിധ്യം ഏറ്റവും കൂടുതലായി കാണപ്പെടുന്നത്. പുറത്തുപോയി വരുന്നവർ ഉടൻ കുളിക്കുന്നതും കിടക്കവിരികൾ ഇടയ്ക്കിടെ മാറ്റുന്നതും അലർജി കുറയ്ക്കാൻ സഹായിക്കും. കൂടാതെ വീടിനുള്ളിൽ എയർ ഫിൽട്ടറുകൾ ഉപയോഗിക്കുന്നതും വളർത്തുമൃഗങ്ങളെ കിടപ്പുമുറിയിൽ നിന്ന് മാറ്റി നിർത്തുന്നതും ഫലപ്രദമായ മുൻകരുതലുകളാണ്. കൃത്യമായ പരിശോധനയിലൂടെ അലർജി തിരിച്ചറിഞ്ഞ് മുൻകൂട്ടി മരുന്നുകൾ സ്വീകരിക്കുന്നത് ഈ സീസണിലെ ആരോഗ്യപ്രശ്നങ്ങൾ ലഘൂകരിക്കാൻ സഹായിക്കും.
Toronto is seeing an ‘explosion of pollen’ this allergy season
