ടൊവിനോ തോമസും നസ്രിയ നസീമും പ്രധാന വേഷങ്ങളിലെത്തുന്ന പുതിയ ചിത്രത്തിന്റെ ടൈറ്റിൽ ലോഞ്ച് സ്പെയിനിലെ ബാഴ്സലോണയിൽ നടന്നു. ‘ഗ്രാസ്യാസ് എൽ ക്ലാസിക്കോ’ എന്ന് പേരിട്ടിരിക്കുന്ന ചിത്രത്തിന്റെ ഔദ്യോഗിക പ്രഖ്യാപനം ബാഴ്സലോണയുടെ ഹോം ഗ്രൗണ്ടായ ക്യാമ്പ് നൗ സ്റ്റേഡിയത്തിൽ വെച്ചാണ് നിർവ്വഹിച്ചത്. ഫുട്ബോൾ ലോകം ഉറ്റുനോക്കിയ റയൽ മാഡ്രിഡ് – ബാഴ്സലോണ ‘എൽ ക്ലാസിക്കോ’ പോരാട്ടത്തിന്റെ കിക്കോഫിനൊപ്പമാണ് താരങ്ങൾ സ്റ്റേഡിയത്തിൽ വെച്ച് ടൈറ്റിൽ പോസ്റ്റർ പുറത്തുവിട്ടത്.
ലാ ലിഗയിലെ നിർണ്ണായക മത്സരത്തിന്റെ ആവേശത്തിനിടയിൽ ഒരു മലയാള സിനിമയുടെ പേര് പ്രഖ്യാപിക്കപ്പെടുന്നു എന്ന പ്രത്യേകതയും ഈ ചടങ്ങിനുണ്ടായിരുന്നു. താരങ്ങൾ തങ്ങളുടെ സോഷ്യൽ മീഡിയകളിലൂടെ തത്സമയമായാണ് ടൈറ്റിൽ ലുക്ക് പ്രേക്ഷകർക്കായി പങ്കുവെച്ചത്. സ്റ്റേഡിയത്തിലെ ഗാലറിയിലിരുന്ന് ആയിരക്കണക്കിന് കാണികളെ സാക്ഷിയാക്കിയായിരുന്നു ഈ അപൂർവ്വ ലോഞ്ച്. സുഡാനി ഫ്രം നൈജീരിയയുടെ സംവിധായകൻ സക്കരിയയും പ്രമുഖ സംവിധായകനും തിരക്കഥാകൃത്തുമായ മുഹ്സിൻ പരാരിയും ചേർന്നാണ് ഈ ചിത്രത്തിന് തിരക്കഥയൊരുക്കുന്നത്.
മുഹ്സിൻ പരാരി സംവിധാനം ചെയ്യുന്ന ചിത്രം എ ആൻഡ് എച്ച് എസ് പ്രൊഡക്ഷൻസ്, ഹാപ്പി അവേഴ്സ് എന്റർടെയ്ൻമെന്റ്സ്, ബാബുഏട്ടൻ ഫിലിംസ്, ദി റൈറ്റിംഗ് കമ്പനി എന്നീ ബാനറുകളിലാണ് നിർമ്മിക്കുന്നത്. സുഷിൻ ശ്യാം സംഗീതവും വിഷ്ണു തണ്ടശ്ശേരി ഛായാഗ്രഹണവും നിർവ്വഹിക്കുന്നു. സജിൻ അലി, അബ്ബാസ് തിരുനാവായ, സമീർ താഹിർ, ഷൈജു ഖാലിദ് എന്നിവർ ചേർന്നാണ് ചിത്രം നിർമ്മിക്കുന്നത്. അന്താരാഷ്ട്ര തലത്തിൽ ശ്രദ്ധിക്കപ്പെടുന്ന തരത്തിലുള്ള പ്രൊമോഷൻ പരിപാടികളാണ് ചിത്രത്തിന്റെ അണിയറ പ്രവർത്തകർ ആസൂത്രണം ചെയ്യുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Title launch amidst excitement; Tovino-Nazriya's picture at Barca's home ground, title look out
