കാൽഗറി: കാൽഗറിയിലെ സംഗീത പരിപാടിക്കിടെ ഖാലിസ്ഥാനി അനുകൂല പതാകകൾ ഉയർത്തിയതിനെത്തുടർന്നുണ്ടായ വിവാദങ്ങളിൽ നിലപാട് വ്യക്തമാക്കി പ്രമുഖ പഞ്ചാബി ഗായകനും നടനുമായ ദിൽജിത് ദോസാഞ്ച്. ആരാധകരുടെ സുരക്ഷയ്ക്കാണ് താൻ മുൻഗണന നൽകുന്നതെന്നും അവരെ ആരെങ്കിലും ഉപദ്രവിക്കാൻ ശ്രമിച്ചാൽ സഹിക്കില്ലെന്നും താരം ഇൻസ്റ്റഗ്രാമിലൂടെ പ്രതികരിച്ചു. കാൽഗറിയിൽ നടന്ന ‘ഓറ 2026’ (Aura 2026) വേൾഡ് ടൂറിനിടെയാണ് സംഭവമുണ്ടായത്.
പരിപാടിക്കിടെ പതാക ഉയർത്തി ചിലർ തടസ്സം സൃഷ്ടിച്ചതോടെ ദിൽജിത് പ്രകടനം നിർത്തിവെക്കുകയും സുരക്ഷാ ഉദ്യോഗസ്ഥരുടെ സഹായം തേടുകയും ചെയ്തിരുന്നു. താൻ ഒരു പതാകയ്ക്കും എതിരല്ലെന്നും എന്നാൽ ആരാധകരെ അധിക്ഷേപിക്കുന്നതും പരിപാടി അലങ്കോലപ്പെടുത്തുന്നതും അനുവദിക്കില്ലെന്നും താരം വ്യക്തമാക്കി. പുറത്തുനിന്ന് എത്തിയ ചിലർ ആരാധകരെ ശല്യം ചെയ്തതാണ് പ്രശ്നങ്ങൾക്ക് കാരണമായതെന്നും ഇത്തരം തെറ്റായ പ്രചാരണങ്ങൾ അവസാനിപ്പിക്കണമെന്നും ദിൽജിത് കൂട്ടിച്ചേർത്തു. നേരത്തെ 2025-ൽ ഒരു ടെലിവിഷൻ പരിപാടിയുമായി ബന്ധപ്പെട്ട് ഉയർന്ന വിമർശനങ്ങൾക്കും താരം വേദിയിൽ മറുപടി നൽകി.
നിലവിൽ ഉത്തര അമേരിക്കയിൽ ‘ഓറ’ വേൾഡ് ടൂറിന്റെ തിരക്കിലാണ് ദിൽജിത്. ജനുവരിയിൽ പുറത്തിറങ്ങിയ ‘ബോർഡർ 2’ ആണ് താരത്തിന്റേതായി ഒടുവിൽ പുറത്തിറങ്ങിയ ചിത്രം. ഇംതിയാസ് അലി സംവിധാനം ചെയ്യുന്ന ‘മേം വാപസ് ആഊംഗ’ എന്ന പുതിയ സിനിമ ജൂൺ 12-ന് തിയേറ്ററുകളിൽ എത്താൻ ഒരുങ്ങുകയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
"I won't stay silent if my fans are harassed"; Diljit slams Canadian flag controversy
