ഡെൻവർ: ഡെൻവർ അന്താരാഷ്ട്ര വിമാനത്താവളത്തിൽ ടേക്ക് ഓഫിനൊരുങ്ങിയ വിമാനം റൺവേയിലുണ്ടായിരുന്ന ആളെ ഇടിച്ചുതെറിപ്പിച്ചു. വെള്ളിയാഴ്ച രാത്രി 11:19-ഓടെയാണ് ദാരുണമായ അപകടം സംഭവിച്ചത്. ആഘാതത്തെത്തുടർന്ന് വിമാനത്തിന്റെ എഞ്ചിന് തീപിടിച്ചെങ്കിലും എമർജൻസി ബ്രേക്ക് ഉപയോഗിച്ച് വിമാനം നിർത്തിയതിനാൽ വലിയൊരു ദുരന്തം ഒഴിവായി. വിമാനത്തിലുണ്ടായിരുന്ന 224 യാത്രക്കാരെയും ഏഴ് ജീവനക്കാരെയും അടിയന്തരമായി പുറത്തെത്തിച്ചു.
ലോസ് ഏഞ്ചൽസിലേക്ക് പോകാനായി റൺവേയിലൂടെ 139 മൈൽ വേഗതയിൽ നീങ്ങുകയായിരുന്ന ഫ്രോണ്ടിയർ എയർലൈൻസിന്റെ 4345-ാം നമ്പർ വിമാനമാണ് അപകടത്തിൽപ്പെട്ടത്. വിമാനത്താവളത്തിലെ സുരക്ഷാ വേലി ചാടിക്കടന്ന് റൺവേയിൽ പ്രവേശിച്ചയാളാണ് വിമാനത്തിനടിയിൽപ്പെട്ടത്. ഇയാൾ സംഭവസ്ഥലത്തുതന്നെ മരിച്ചു. വിമാനത്തിന്റെ എഞ്ചിനുള്ളിലേക്ക് ആഘാതമുണ്ടായതിനെത്തുടർന്ന് പൊട്ടിത്തെറിയും പുകയും അനുഭവപ്പെട്ടു. തുടർന്ന് പൈലറ്റ് വിമാനം ഉടൻ നിർത്തുകയും അഗ്നിശമനസേന എത്തി തീ നിയന്ത്രണവിധേയമാക്കുകയും ചെയ്തു.
യാത്രക്കാരെ വിമാനത്തിന്റെ എമർജൻസി സ്ലൈഡുകളിലൂടെയാണ് പുറത്തെത്തിച്ചത്. ഒഴിപ്പിക്കലിനിടെ പരിക്കേറ്റ 12 യാത്രക്കാരിൽ അഞ്ചുപേരെ ആശുപത്രിയിൽ പ്രവേശിപ്പിച്ചു. മരിച്ചയാൾ വിമാനത്താവള ജീവനക്കാരനല്ലെന്ന് അധികൃതർ സ്ഥിരീകരിച്ചിട്ടുണ്ട്. ഇയാൾ എന്തിനാണ് സുരക്ഷാ വേലി കടന്ന് റൺവേയിലെത്തിയത് എന്നതിനെക്കുറിച്ച് നാഷണൽ ട്രാൻസ്പോർട്ടേഷൻ സേഫ്റ്റി ബോർഡും ഫെഡറൽ ഏവിയേഷൻ അഡ്മിനിസ്ട്രേഷനും അന്വേഷണം ആരംഭിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
One person dies after plane crashes during takeoff in Denver; engine catches fire after impact, narrowly avoiding major disaster
