ഒട്ടാവ: രാജ്യത്ത് സുഗന്ധം ചേർത്ത വാപ്പിംഗ് ഉൽപ്പന്നങ്ങൾ നിരോധിക്കുമെന്ന അഞ്ചു വർഷം മുൻപത്തെ വാഗ്ദാനം നടപ്പിലാക്കുന്നതിൽ കാനഡ ഫെഡറൽ സർക്കാർ ഇപ്പോഴും അനിശ്ചിതത്വത്തിൽ. യുവാക്കൾക്കിടയിലെ വാപ്പിംഗ് ഉപയോഗം വർധിക്കുന്നത് തടയാൻ ഫ്ലേവർ നിരോധനം അത്യാവശ്യമാണെന്ന വിദഗ്ധ നിർദേശം നിലനിൽക്കെയാണ് സർക്കാരിന്റെ ഈ നിലപാട്. നിലവിൽ 25 വയസ്സിൽ താഴെയുള്ള മൂന്നിൽ ഒരാൾ എന്ന തോതിൽ കാനഡയിൽ വാപ്പിംഗ് ഉപയോഗം വർധിച്ചിട്ടുണ്ടെന്ന് റിപ്പോർട്ടുകൾ വ്യക്തമാക്കുന്നു.
ഫ്ലേവർ നിരോധനം നടപ്പിലാക്കാൻ താൻ സന്നദ്ധയാണെന്നും എന്നാൽ ഇതിനായി പ്രവിശ്യകളുടെയും ടെറിട്ടറികളുടെയും ഭാഗത്തുനിന്ന് ഏകോപനം ആവശ്യമാണെന്നും ആരോഗ്യ മന്ത്രി മാർജോറി മിഷേൽ സിബിസി ന്യൂസിന് നൽകിയ അഭിമുഖത്തിൽ പറഞ്ഞു. നിരോധനം സംബന്ധിച്ച് വ്യക്തമായ സമയപരിധി നൽകാൻ മന്ത്രി തയ്യാറായില്ല. അതേസമയം, നിരോധനം നടപ്പിലാക്കാതിരിക്കാൻ നിിക്കോട്ടിൻ-വാപ്പിംഗ് വ്യവസായ ലോബികൾ സർക്കാരിന് മേൽ ശക്തമായ സമ്മർദ്ദം ചെലുത്തുന്നതായി പൊതുരേഖകൾ വ്യക്തമാക്കുന്നു.
നിരോധനം നടപ്പിലാക്കിയാൽ നിയമവിരുദ്ധ വിപണി സജീവമാകുമെന്നാണ് വാപ്പിംഗ് കമ്പനികളുടെ വാദം. എന്നാൽ നോവ സ്കോട്ടിയ, ക്യൂബെക്ക് തുടങ്ങിയ പ്രവിശ്യകളിൽ നിലവിലുള്ള നിരോധനം യുവാക്കൾക്കിടയിലെ വാപ്പിംഗ് ഉപയോഗം കുറയ്ക്കാൻ സഹായിച്ചതായി വാട്ടർലൂ സർവകലാശാലയിലെ ഗവേഷകർ ചൂണ്ടിക്കാട്ടുന്നു. മധുരമുള്ള ഫ്ലേവറുകൾ ഒഴിവാക്കുന്നത് മുതിർന്നവർ പുകവലി നിർത്തുന്നതിനെ ബാധിക്കില്ലെന്നും എന്നാൽ യുവാക്കളെ ഇതിലേക്ക് ആകർഷിക്കുന്നത് തടയാൻ സഹായിക്കുമെന്നും പഠനങ്ങൾ വ്യക്തമാക്കുന്നു.
ഹൈസ്കൂൾ വിദ്യാർത്ഥികളിൽ പത്തു ശതമാനം പേരും പ്രതിദിനം വാപ്പിംഗ് ഉപയോഗിക്കുന്നവരാണെന്ന് കണക്കുകൾ സൂചിപ്പിക്കുന്നു. ഫ്ലേവർ നിരോധനത്തിൽ സർക്കാർ ഒളിച്ചുകളി നടത്തുമ്പോഴും, നിിക്കോട്ടിൻ പൗച്ചുകൾക്ക് കഴിഞ്ഞ വർഷം നിരോധനം ഏർപ്പെടുത്തിയ മുൻഗാമിയായ മാർക്ക് ഹോളണ്ടിന്റെ നടപടി വിദഗ്ധർ ചൂണ്ടിക്കാട്ടുന്നു. രാജ്യവ്യാപകമായ നിരോധനം ഇല്ലാത്തത് ഓൺലൈൻ വിപണി വഴി ഉൽപ്പന്നങ്ങൾ എളുപ്പത്തിൽ ലഭ്യമാകാൻ കാരണമാകുന്നുണ്ടെന്നും ആരോഗ്യ മേഖലയിലെ വിദഗ്ധർ മുന്നറിയിപ്പ് നൽകുന്നു.
Vaping regulation: Federal government has not taken a decision even after five years; Health experts are concerned
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
