ഗൂഗിളിൽ നിന്ന് സ്വകാര്യവിവരങ്ങൾ ചോർത്തുന്നു; യുഎസ് നീക്കത്തിനെതിരെ കനേഡിയൻ പൗരൻ കോടതിയിൽ

വാഷിംഗ്ടൺ: സമൂഹമാധ്യമങ്ങളിൽ സർക്കാരിനെ വിമർശിക്കുന്നവരുടെ വ്യക്തിഗത വിവരങ്ങൾ നിയമവിരുദ്ധമായി കൈക്കലാക്കാൻ അമേരിക്കൻ ഭരണകൂടം ശ്രമിക്കുന്നതായി പരാതി. യുഎസ് ആഭ്യന്തര സുരക്ഷാ വകുപ്പിന്റെ (Department of Homeland Security) നീക്കത്തിനെതിരെ ഒരു കനേഡിയൻ പൗരനാണ് കാലിഫോർണിയ കോടതിയെ സമീപിച്ചത്. ഗൂഗിളിൽ നിന്ന് തന്റെ പേര്, വിലാസം, ബാങ്ക് അക്കൗണ്ട് വിവരങ്ങൾ എന്നിവയടക്കം ചോർത്താനുള്ള യുഎസ് സർക്കാരിന്റെ നീക്കം തടയണമെന്നാണ് ഹർജിയിലെ ആവശ്യം.

മിനിയാപൊളിസിലെ കുടിയേറ്റ വിരുദ്ധ നടപടിക്കിടെ രണ്ട് യുഎസ് പൗരന്മാർ കൊല്ലപ്പെട്ട സംഭവത്തിൽ ഫെഡറൽ ഏജന്റുമാരെ വിമർശിച്ചുകൊണ്ട് ഹർജിക്കാരൻ സമൂഹമാധ്യമങ്ങളിൽ പോസ്റ്റിട്ടിരുന്നു. ഇതിന് പിന്നാലെയാണ് ഇയാളെ തിരിച്ചറിയുന്നതിനായി ‘അഡ്മിനിസ്ട്രേറ്റീവ് സബ്‌പോണ’ (Administrative Subpoena) വഴി വിവരങ്ങൾ കൈമാറാൻ ഗൂഗിളിന് യുഎസ് അധികൃതർ നിർദ്ദേശം നൽകിയത്. പേരും വിലാസവും കൂടാതെ ലൊക്കേഷൻ വിവരങ്ങൾ, ക്രെഡിറ്റ് കാർഡ് – ബാങ്ക് അക്കൗണ്ട് നമ്പറുകൾ എന്നിവയുൾപ്പെടെയുള്ള അതീവ രഹസ്യവിവരങ്ങളാണ് യുഎസ് ആവശ്യപ്പെട്ടിരിക്കുന്നത്.

ഭരണകൂടത്തെ വിമർശിക്കുന്നവരുടെ വായടപ്പിക്കാനുള്ള സുതാര്യതയില്ലാത്ത നീക്കമാണിതെന്ന് പരാതിയിൽ പറയുന്നു. പൗരന്മാരുടെ അഭിപ്രായ സ്വാതന്ത്ര്യത്തിന്മേലുള്ള കടന്നുകയറ്റമാണിതെന്നും ഹർജിക്കാരൻ ആരോപിക്കുന്നു. അതേസമയം, വിദേശ കമ്പനികൾ കൈകാര്യം ചെയ്യുന്ന ഡാറ്റ ആ കമ്പനികൾ ആസ്ഥാനമായി പ്രവർത്തിക്കുന്ന രാജ്യത്തെ നിയമങ്ങൾക്ക് വിധേയമായിരിക്കുമെന്ന് ടൊറന്റോ ആസ്ഥാനമായുള്ള നിയമവിദഗ്ധൻ ജെയിംസ് കോസ ചൂണ്ടിക്കാട്ടി. ഒരു വിദേശ പൗരന്റെ വിവരങ്ങൾ യുഎസ് നിയമപ്രകാരം ആവശ്യപ്പെടുന്നത് ഡാറ്റാ പരമാധികാരത്തെ (Data Sovereignty) സംബന്ധിച്ച വലിയ തർക്കങ്ങൾക്കും വഴിതുറന്നിട്ടുണ്ട്.

നമ്മുടെ വിവരങ്ങൾ അമേരിക്കയിലെ സെർവറുകളിലാണ് സൂക്ഷിച്ചിരിക്കുന്നതെങ്കിൽ, നാം അവിടെ ജീവിക്കുന്നവരല്ലെങ്കിൽ പോലും ആ രാജ്യത്തെ നിയമങ്ങൾ നമുക്കും ബാധകമാകുമെന്ന് അന്താരാഷ്ട്ര വ്യാപാര വിദഗ്ധൻ ബാരി ആപ്പിൾടൺ പ്രതികരിച്ചു. യുഎസ് സർക്കാർ പൗരന്മാരുടെ വിവരങ്ങൾ ശേഖരിച്ച് ‘ഡോസിയർ’ തയ്യാറാക്കുകയാണെന്നും അദ്ദേഹം കുറ്റപ്പെടുത്തി. ഈ സാഹചര്യത്തിൽ ഡാറ്റ എൻക്രിപ്റ്റ് ചെയ്യാനും സാധ്യമായ ഇടങ്ങളിലെല്ലാം വിവരങ്ങൾ കാനഡയിലെ സെർവറുകളിൽ തന്നെ സൂക്ഷിക്കാനുള്ള ഓപ്ഷനുകൾ തിരഞ്ഞെടുക്കാനും വിദഗ്ധർ നിർദ്ദേശിക്കുന്നു. ഡിജിറ്റൽ ലോകത്ത് വ്യക്തിവിവരങ്ങൾ എത്രത്തോളം സുരക്ഷിതമാണെന്ന ഗൗരവകരമായ ചർച്ചയിലേക്കാണ് ഈ നിയമപോരാട്ടം വിരൽ ചൂണ്ടുന്നത്.

Canadian citizen in court against US move to leak personal information from Google

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt