ടൊറന്റോ: ഊർജ്ജ ഉൽപ്പാദന രംഗത്ത് വിപ്ലവകരമായ മാറ്റത്തിനൊരുങ്ങി ഒന്റാറിയോ സർക്കാർ. കിൻകാർഡിനിലെ ബ്രൂസ് പവർ സൈറ്റിൽ പുതിയ ആണവോർജ്ജ നിലയം നിർമ്മിക്കുന്നതിനായുള്ള നിർണ്ണായക കരാറിന് സർക്കാർ അംഗീകാരം നൽകി. ‘ബ്രൂസ് സി’ (Bruce C) എന്ന് പേരിട്ടിരിക്കുന്ന ഈ പദ്ധതി യാഥാർത്ഥ്യമാകുന്നതോടെ ലോകത്തിലെ ഏറ്റവും വലിയ ആണവോർജ്ജ ഉൽപ്പാദന കേന്ദ്രമായി ഈ പ്രദേശം മാറും. 300 മില്യൺ ഡോളർ ചെലവ് പ്രതീക്ഷിക്കുന്ന പ്രാരംഭ പ്രവർത്തനങ്ങൾക്കുള്ള കരാറിലാണ് ഒന്റാറിയോയിലെ ഇലക്ട്രിസിറ്റി മാർക്കറ്റ് ഓപ്പറേറ്ററായ ഐ.ഇ.എസ്.ഒയും (IESO) ബ്രൂസ് പവറും ഒപ്പുവെച്ചിരിക്കുന്നത്.
കഴിഞ്ഞ മൂന്ന് പതിറ്റാണ്ടിനിടെ ഒന്റാറിയോ സാക്ഷ്യം വഹിക്കുന്ന ഏറ്റവും വലിയ ആണവോർജ്ജ പദ്ധതിയാണിത്. നിലവിൽ എട്ട് റിയാക്ടറുകളുമായി പ്രവർത്തിക്കുന്ന ബ്രൂസ് എ, ബ്രൂസ് ബി നിലയങ്ങൾക്ക് പുറമെയാണ് അത്യാധുനിക സൗകര്യങ്ങളോടെ ‘ബ്രൂസ് സി’ വരുന്നത്. പദ്ധതി പൂർത്തിയാകുന്നതോടെ 4,800 മെഗാവാട്ട് വൈദ്യുതി അധികമായി ഉൽപ്പാദിപ്പിക്കാൻ സാധിക്കുമെന്നാണ് വിലയിരുത്തൽ. ഇത് ഏകദേശം 48 ലക്ഷം വീടുകൾക്ക് ആവശ്യമായ വൈദ്യുതി നൽകാൻ പര്യാപ്തമാണ്. ഒന്റാറിയോയുടെ ആകെ വൈദ്യുതി ആവശ്യത്തിന്റെ പകുതിയോളം നിലവിൽ ആണവോർജ്ജത്തിലൂടെയാണ് കണ്ടെത്തുന്നത്.
സാങ്കേതികമായ മുന്നേറ്റത്തിനൊപ്പം വലിയ തോതിലുള്ള തൊഴിലവസരങ്ങളും ഈ പദ്ധതി വാഗ്ദാനം ചെയ്യുന്നുണ്ട്. പ്രതിവർഷം 18,900 പുതിയ തൊഴിലവസരങ്ങൾ ഈ മേഖലയിൽ സൃഷ്ടിക്കപ്പെടുമെന്ന് ഊർജ്ജ മന്ത്രി സ്റ്റീഫൻ ലെച്ചെ വ്യക്തമാക്കി. നിർമ്മാണത്തിന് മുന്നോടിയായുള്ള സൈറ്റ് പ്ലാനിംഗ്, പരിസ്ഥിതി പഠനങ്ങൾ, തദ്ദേശീയ വിഭാഗങ്ങളുമായുള്ള ചർച്ചകൾ എന്നിവയ്ക്കാണ് കരാറിലെ തുക വിനിയോഗിക്കുക. 2030-ഓടെ പ്രാരംഭ ഘട്ട പ്രവർത്തനങ്ങൾ പൂർത്തിയാക്കി നിർമ്മാണത്തിലേക്ക് കടക്കാനാണ് ലക്ഷ്യമിടുന്നത്.
ഫെഡറൽ സർക്കാരിന്റെ വിവിധ അനുമതികൾ കൂടി ലഭിച്ചാൽ മാത്രമേ പദ്ധതിയുടെ നിർമ്മാണ പ്രവർത്തനങ്ങൾ പൂർണ്ണതോതിൽ ആരംഭിക്കൂ. നിലവിൽ ഫെഡറൽ ഇംപാക്ട് അസസ്മെന്റ് പുരോഗമിക്കുകയാണ്, ഇത് 2028-ഓടെ പൂർത്തിയാകുമെന്നാണ് പ്രതീക്ഷിക്കുന്നത്. തദ്ദേശീയ സമൂഹങ്ങളെയും ഒന്നാം രാഷ്ട്ര (First Nations) വിഭാഗങ്ങളെയും പദ്ധതിയുടെ ഭാഗമാക്കുമെന്നും സർക്കാർ ഉറപ്പുനൽകുന്നു. ഭാവിയിലെ വർദ്ധിച്ചുവരുന്ന വൈദ്യുതി ആവശ്യങ്ങൾ പരിഹരിക്കുന്നതിനായി പിറ്ററിംഗ്, ഡാർലിംഗ്ടൺ എന്നിവിടങ്ങളിലെ ആണവനിലയങ്ങളുടെ കാലാവധി നീട്ടുന്നതടക്കമുള്ള വിപുലമായ ഊർജ്ജ നയമാണ് ഒന്റാറിയോ സർക്കാർ നടപ്പിലാക്കി വരുന്നത്.
Between the snow-capped mountains and the sea; To Canada in search of dream trips
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
