സഡ്ബറി: ഫോൺ കോളുകളിലൂടെയുള്ള നൂതന സൈബർ തട്ടിപ്പിനിരയായി കാനഡയിലെ സഡ്ബറിയിൽ ദമ്പതികൾക്ക് നഷ്ടമായത് 90,000 കനേഡിയൻ ഡോളറിലധികം (ഏകദേശം 60 ലക്ഷത്തിലധികം ഇന്ത്യൻ രൂപ). ഒന്റാറിയോയിലെ സഡ്ബറിയിൽ ‘മോർ ഇൻ പൂൾസ് ആൻഡ് സ്പാ’ എന്ന സ്ഥാപനം നടത്തുന്ന ഡിലിൻ ഗിൽബെർട്ട് ലെഡുക്കിനും ഭാര്യക്കുമാണ് തങ്ങളുടെ ബിസിനസ്സ്-വ്യക്തിഗത അക്കൗണ്ടുകളിൽ നിന്നായി വൻതുക നഷ്ടപ്പെട്ടത്. തട്ടിപ്പിന് പിന്നാലെ തങ്ങളെ സഹായിക്കാൻ ബാങ്ക് തയ്യാറാകുന്നില്ലെന്നും ഇവർ ആരോപിക്കുന്നു.
മാർച്ച് 31-നാണ് ദമ്പതികളുടെ ജീവിതം മാറ്റിമറിച്ച സംഭവങ്ങളുടെ തുടക്കം. സ്കോട്ടിയ ബാങ്കിന്റെ കസ്റ്റമർ സർവീസ് നമ്പറിൽ നിന്ന് തുടർച്ചയായി വന്ന മിസ്സ്ഡ് കോളുകളാണ് വിനയായത്. ഡെബിറ്റ് കാർഡിന് പിന്നിലുള്ള ബാങ്ക് നമ്പറുമായി ഒത്തുനോക്കി ഉറപ്പുവരുത്തിയ ശേഷമാണ് ഇവർ തിരിച്ചുവിളിച്ചത്. എന്നാൽ അപ്പോഴേക്കും അക്കൗണ്ടുകളിൽ നിന്ന് പണം നഷ്ടപ്പെട്ടു തുടങ്ങിയിരുന്നു. ബാങ്ക് ഉദ്യോഗസ്ഥരാണെന്ന് വിശ്വസിപ്പിച്ച് സംസാരിച്ച തട്ടിപ്പുകാർ, ഐഡി നമ്പറുകളും മറ്റും കൃത്യമായി പറഞ്ഞതോടെ ദമ്പതികൾക്ക് സംശയം തോന്നിയില്ല. ഫോൺ നമ്പറുകൾ വ്യാജമായി നിർമ്മിക്കുന്ന ‘കോളർ ഐഡി സ്പൂഫിംഗ്’ (Caller ID Spoofing) വഴിയാണ് തട്ടിപ്പ് നടന്നതെന്ന് പിന്നീട് വ്യക്തമായി.
തങ്ങളുടെ ഭാഗത്തുനിന്ന് തെറ്റായ വിവരങ്ങൾ കൈമാറിയിട്ടില്ലെന്ന് ദമ്പതികൾ ഉറപ്പിച്ചു പറയുന്നു. എന്നാൽ, പണം തിരികെ ലഭിക്കുമെന്ന കാര്യത്തിൽ സ്കോട്ടിയ ബാങ്ക് ഉറപ്പൊന്നും നൽകുന്നില്ല. മോർട്ട്ഗേജ് തിരിച്ചടവിലോ ബിസിനസ്സ് ആവശ്യങ്ങൾക്കോ യാതൊരു വിധ സഹായവും ബാങ്ക് വാഗ്ദാനം ചെയ്തിട്ടില്ലെന്ന് ലെഡുക് പറഞ്ഞു. നിലവിൽ സുഹൃത്തുക്കളുടെയും ബന്ധുക്കളുടെയും സഹായത്തോടെയാണ് ബിസിനസ്സും കുടുംബച്ചെലവുകളും മുന്നോട്ട് കൊണ്ടുപോകുന്നത്. പണം എങ്ങോട്ടാണ് കൈമാറിയതെന്ന് ട്രാക്ക് ചെയ്യാൻ സാധിക്കുമെങ്കിലും അത് തിരികെ ലഭിക്കുമെന്ന് ബാങ്ക് ഉറപ്പുനൽകുന്നില്ല.
ബാങ്കുകളുടെ ഔദ്യോഗിക നമ്പറുകൾ സ്ക്രീനിൽ തെളിയുന്ന രീതിയിൽ ഫോൺ കോളുകൾ വ്യാജമായി നിർമ്മിക്കാൻ തട്ടിപ്പുകാർക്ക് സാധിക്കുമെന്ന് കനേഡിയൻ ആന്റി ഫ്രോഡ് സെന്ററിലെ വിദഗ്ധർ മുന്നറിയിപ്പ് നൽകുന്നു. ബാങ്കിൽ നിന്ന് വിളിക്കുകയാണെന്ന് പറഞ്ഞ് പാസ്വേഡോ പിൻ നമ്പറോ ഒടിപിയോ ആരും ആവശ്യപ്പെടില്ലെന്നും, ഇത്തരം കോളുകളോട് ജാഗ്രത പാലിക്കണമെന്നും ബാങ്ക് വക്താവ് വ്യക്തമാക്കി. സ്വകാര്യതാ നിയമങ്ങൾ ചൂണ്ടിക്കാട്ടി ഉപഭോക്താവിന്റെ വ്യക്തിഗത വിവരങ്ങൾ പങ്കുവെക്കാൻ ബാങ്ക് തയ്യാറായില്ല. തങ്ങൾക്കുണ്ടായ ദുരനുഭവം മറ്റാർക്കും ഉണ്ടാകാതിരിക്കാനാണ് വാർത്തയുമായി മുന്നോട്ട് വന്നതെന്ന് ദമ്പതികൾ പറഞ്ഞു.
Massive cyber fraud in Canada; Couple loses $90,000 from their account
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
