മദ്യവിൽപ്പന നിലച്ചു, തൊഴിൽ പോയി; കാനഡയുടെ തിരിച്ചടിയിൽ പകച്ച് യുഎസ് മദ്യവ്യവസായം

വാഷിംഗ്ടൺ: അമേരിക്കയും കാനഡയും തമ്മിൽ നിലനിൽക്കുന്ന വ്യാപാര തർക്കം യുഎസ് മദ്യവ്യവസായത്തെ കടുത്ത പ്രതിസന്ധിയിലാക്കുന്നു. ഡോണാൾഡ് ട്രംപ് ഭരണകൂടം ഏർപ്പെടുത്തിയ അധിക നികുതിക്ക് (Tariffs) തിരിച്ചടിയായി കാനഡയിലെ മിക്ക പ്രവിശ്യകളും അമേരിക്കൻ മദ്യത്തിന്റെ വിൽപ്പന നിർത്തിവെച്ചതോടെ 2025-ൽ യുഎസ് മദ്യ കയറ്റുമതിയിൽ 63 ശതമാനത്തിന്റെ വൻ ഇടിവ് രേഖപ്പെടുത്തി. ഡിസ്റ്റിൽഡ് സ്പിരിറ്റ്‌സ് കൗൺസിൽ ഓഫ് ദി യുണൈറ്റഡ് സ്റ്റേറ്റ്‌സ് (DISCUS) ആണ് ഇതുസംബന്ധിച്ച ഞെട്ടിക്കുന്ന കണക്കുകൾ പുറത്തുവിട്ടത്.

വ്യാപാര തർക്കങ്ങൾ മുറുകുന്നത് അമേരിക്കയിലെ ആഭ്യന്തര മദ്യവിൽപ്പനയെയും ദോഷകരമായി ബാധിച്ചിട്ടുണ്ട്. പതിറ്റാണ്ടുകൾക്ക് ശേഷം ആദ്യമായി ആഭ്യന്തര വിൽപ്പനയിൽ ഇടിവുണ്ടായതായും ഏകദേശം ആയിരത്തോളം പേർക്ക് തൊഴിൽ നഷ്ടപ്പെട്ടതായും ഡിസ്റ്റിൽഡ് സ്പിരിറ്റ്‌സ് കൗൺസിൽ പ്രസിഡന്റ് ക്രിസ് സ്മോംഗർ യുഎസ് ട്രേഡ് പാനലിനെ അറിയിച്ചു. നികുതി ഏർപ്പെടുത്തുമെന്ന ഭീഷണി പോലും വിപണിയിൽ അനിശ്ചിതത്വം സൃഷ്ടിക്കുന്നുണ്ടെന്നും അദ്ദേഹം വ്യക്തമാക്കി.

അമേരിക്കൻ ഉൽപ്പന്നങ്ങൾക്ക് കാനഡയിലെ പ്രവിശ്യകൾ ഏർപ്പെടുത്തിയ നിയന്ത്രണമാണ് ഈ തകർച്ചയ്ക്ക് പ്രധാന കാരണം. ഒന്റാറിയോയിലെ ലിക്വർ കൺട്രോൾ ബോർഡ് (LCBO) അമേരിക്കൻ മദ്യം പൂർണ്ണമായും പിൻവലിച്ചു. ക്യൂബെക് മദ്യത്തിന്റെ ഇറക്കുമതിയും വിതരണവും നിർത്തിവെച്ചപ്പോൾ ബ്രിട്ടീഷ് കൊളംബിയ നിയന്ത്രണങ്ങൾ കൂടുതൽ കർക്കശമാക്കി. അതേസമയം, അറ്റ്‌ലാന്റിക് കാനഡയിലെ ചില പ്രവിശ്യകൾ തങ്ങളുടെ പക്കലുള്ള സ്റ്റോക്ക് വിറ്റഴിച്ച് ലഭിക്കുന്ന തുക ചാരിറ്റി പ്രവർത്തനങ്ങൾക്കും ഫുഡ് ബാങ്കുകൾക്കുമായി നൽകാനാണ് തീരുമാനിച്ചിരിക്കുന്നത്.

അൽബർട്ട, സസ്കാച്ചവൻ എന്നീ പ്രവിശ്യകൾ നിയന്ത്രണങ്ങളിൽ ചെറിയ ഇളവുകൾ വരുത്തിയെങ്കിലും കനേഡിയൻ ഉൽപ്പന്നങ്ങൾ വാങ്ങാനാണ് ഉപഭോക്താക്കളെ പ്രോത്സാഹിപ്പിക്കുന്നത്. അമേരിക്ക ഏർപ്പെടുത്തിയ നികുതി പിൻവലിക്കാതെ മദ്യവിൽപ്പന പുനഃസ്ഥാപിക്കില്ലെന്ന കർശന നിലപാടിലാണ് കാനഡ. അമേരിക്ക-മെക്സിക്കോ-കാനഡ കരാർ (USMCA) പുതുക്കുന്നത് വരെ വിട്ടുവീഴ്ചയ്ക്കില്ലെന്ന് ഒന്റാറിയോ പ്രീമിയർ ഡഗ് ഫോർഡ് വ്യക്തമാക്കി. ട്രംപ് ഭരണകൂടത്തിന്റെ സാമ്പത്തിക നയങ്ങൾ ഇരുരാജ്യങ്ങളും തമ്മിലുള്ള ബന്ധത്തിൽ വിള്ളൽ വീഴ്ത്തിയതോടെ, വരാനിരിക്കുന്ന യുഎസ്എംസിഎ ചർച്ചകൾ മദ്യവ്യവസായം ഉൾപ്പെടെയുള്ള വ്യാപാര മേഖലകളിൽ നിർണ്ണായകമാകും. വരും മാസങ്ങളിൽ ഈ തർക്കം പരിഹരിക്കപ്പെട്ടില്ലെങ്കിൽ അമേരിക്കൻ ഡിസ്റ്റിലറികൾ കൂടുതൽ കടുത്ത സാമ്പത്തിക പ്രതിസന്ധിയിലേക്ക് നീങ്ങുമെന്നാണ് റിപ്പോർട്ടുകൾ സൂചിപ്പിക്കുന്നത്.

Alcohol sales halted, jobs lost; US liquor industry takes umbrage at Canada's backlash

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt