ബി.സിയിൽ ഭീഷണിപ്പെടുത്തി പണം തട്ടൽ: നാടുകടത്തിയ പ്രതിയുടെ ചിത്രം പുറത്തുവിട്ട് പോലീസ്

ബ്രിട്ടീഷ് കൊളംബിയ: സറൈ മേഖലയിൽ നിലനിൽക്കുന്ന ഭീഷണിപ്പെടുത്തലുകൾക്കും അതുമായി ബന്ധപ്പെട്ട അക്രമ സംഭവങ്ങൾക്കും പിന്നിൽ പ്രവർത്തിച്ച മുഖ്യ പ്രതികളിലൊരാളുടെ ചിത്രം പോലീസ് പുറത്തുവിട്ടു. 20 വയസ്സുകാരനായ പ്രഭ്‌ജോത് സിംഗിന്റെ ചിത്രമാണ് സറെ പോലീസ് സർവീസ് (SPS) പരസ്യപ്പെടുത്തിയത്. പ്രതിയെ നേരത്തെ തന്നെ അറസ്റ്റ് ചെയ്യുകയും കാനഡയിൽ നിന്ന് നാടുകടത്തുകയും ചെയ്തിട്ടുണ്ടെങ്കിലും, ഇയാളുടെ പ്രവർത്തനങ്ങളെക്കുറിച്ചും കൂട്ടാളികളെക്കുറിച്ചും കൂടുതൽ വിവരങ്ങൾ ശേഖരിക്കുന്നതിനാണ് ഇപ്പോൾ ചിത്രം പുറത്തുവിട്ടിരിക്കുന്നത്.

ഈ വർഷം ആദ്യമാണ് പ്രഭ്‌ജോത് സിംഗിനെ പോലീസ് പിടികൂടിയത്. തുടർന്ന് കാനഡ ബോർഡർ സർവീസസ് ഏജൻസിയുമായി (CBSA) ചേർന്ന് നടത്തിയ ഇമിഗ്രേഷൻ അന്വേഷണത്തിനൊടുവിൽ ഇയാളെ രാജ്യത്തുനിന്ന് പുറത്താക്കിയിരുന്നു. എന്നാൽ, ഇയാൾ കാനഡയിലുണ്ടായിരുന്ന സമയത്ത് നടത്തിയ കുറ്റകൃത്യങ്ങളെക്കുറിച്ചും ഇയാൾക്ക് സഹായം നൽകിയ ക്രിമിനൽ ശൃംഖലകളെക്കുറിച്ചും വ്യക്തമായ ചിത്രം ലഭിക്കാനുണ്ട്.

അന്വേഷണത്തിന്റെ പുരോഗതിക്കായി പ്രതിയുടെ ചിത്രം പുറത്തുവിടുന്നത് അനിവാര്യമാണെന്ന് കണ്ടതിനാലാണ് തിങ്കളാഴ്ച ഈ നടപടി സ്വീകരിച്ചതെന്ന് പോലീസ് അറിയിച്ചു. സംസ്ഥാനങ്ങൾ കടന്നുള്ളതും ദേശീയ പ്രാധാന്യമുള്ളതുമായ ഇത്തരം ക്രിമിനൽ സംഘങ്ങളെ അടിച്ചമർത്തുക എന്നതാണ് തങ്ങളുടെ ലക്ഷ്യമെന്ന് സറെ പോലീസ് ചീഫ് നോം ലിപിൻസ്‌കി പ്രസ്താവനയിൽ വ്യക്തമാക്കി.

വിവിധ അന്വേഷണ ഏജൻസികളുമായി ഏകോപിപ്പിച്ചാണ് ഈ നീക്കം നടക്കുന്നത്. പ്രഭ്‌ജോത് സിംഗുമായി അടുപ്പമുള്ളവർ, ഇയാളുടെ പ്രവർത്തനങ്ങൾക്ക് സാക്ഷിയായവർ അല്ലെങ്കിൽ ഇയാളുടെ ഭീഷണിക്ക് ഇരയായവർ തുടങ്ങിയവർ മുന്നോട്ടുവരണമെന്നും കൂടുതൽ വിവരങ്ങൾ കൈമാറണമെന്നും അധികൃതർ അഭ്യർത്ഥിച്ചു. കുറ്റവാളികളെ നിയമത്തിന് മുന്നിൽ എത്തിക്കുന്നതിന് പൊതുജനങ്ങളുടെ സഹായം തേടി ‘സറെ എക്സ്റ്റോർഷൻ റിവാർഡ് ഫണ്ട്’ (Surrey Extortion Reward Fund) എന്ന പേരിൽ 2025 സെപ്റ്റംബറിൽ 2.5 ലക്ഷം ഡോളറിന്റെ പാരിതോഷികം അധികൃതർ പ്രഖ്യാപിച്ചിരുന്നു.

ഈ തുക ഇപ്പോഴും നിലവിലുണ്ട്. പ്രതിയെക്കുറിച്ചോ കൂട്ടാളികളെക്കുറിച്ചോ വിവരം നൽകുന്നവർക്ക് ഈ തുക ലഭിക്കാൻ അർഹതയുണ്ടാകും. വിവരങ്ങൾ നൽകുന്നവരുടെ രഹസ്യസ്വഭാവം സൂക്ഷിക്കുമെന്നും പോലീസ് അറിയിച്ചു. പ്രവിശ്യാ സ്വകാര്യതാ നിയമങ്ങൾ (Provincial Privacy Legislation) കൃത്യമായി പാലിച്ചുകൊണ്ടാണ് പ്രതിയുടെ ചിത്രം പുറത്തുവിട്ടിരിക്കുന്നത്. മേഖലയിലെ ഭീഷണിപ്പെടുത്തൽ ശൃംഖലകളെ വേരോടെ പിഴുതെറിയാൻ ലക്ഷ്യമിട്ടുള്ള അന്വേഷണത്തിൽ നിർണ്ണായകമായ വഴിത്തിരിവ് ഈ ഘട്ടത്തിൽ പോലീസ് പ്രതീക്ഷിക്കുന്നുണ്ട്. വിവരങ്ങൾ അറിയുന്നവർ സറൈ പോലീസിനെയോ ക്രൈം സ്റ്റോപ്പേഴ്സിനെയോ നേരിട്ട് ബന്ധപ്പെടാവുന്നതാണ്.

Police release photo of suspect in B.C. extortion case

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt