തിരുവനന്തപുരം: കേരളത്തിന്റെ രാഷ്ട്രീയ ചക്രവാളത്തിൽ ഇന്ന് സൂര്യനുദിക്കുന്നത് ഒരു വലിയ ചോദ്യചിഹ്നത്തിലേക്കാണ്—അടുത്ത അഞ്ച് വർഷം ആര് ഭരിക്കും? പ്രവചനങ്ങൾക്കും കണക്കുകൂട്ടലുകൾക്കും വിരാമമിട്ട് വോട്ടെണ്ണാൻ മണിക്കൂറുകൾ മാത്രം ബാക്കിനിൽക്കെ, അക്ഷരാർത്ഥത്തിൽ ഒരു ‘ഹൈ-വോൾട്ടേജ്’ ക്ലൈമാക്സിലാണ് സംസ്ഥാനം. തുടർഭരണത്തിന്റെ ചരിത്രം ആവർത്തിക്കുമെന്ന് എൽ.ഡി.എഫും, മാറ്റത്തിന്റെ കാറ്റാണ് വീശുന്നതെന്ന് യു.ഡി.എഫും ഉറപ്പിച്ചു പറയുന്നു. എന്നാൽ, ഈ അവകാശവാദങ്ങൾക്കെല്ലാം അപ്പുറം വിധി എഴുതുന്നത് നേമം മുതൽ മഞ്ചേശ്വരം വരെ ചിതറിക്കിടക്കുന്ന ഇരുപതോളം നിർണ്ണായക മണ്ഡലങ്ങളാണ്. വമ്പൻമാരുടെ തല ഉരുളുമോ അതോ പുതുചരിത്രം പിറക്കുമോ? സിറ്റിംഗ് സീറ്റുകൾ ഇളകുമോ അതോ അട്ടിമറികൾ സംഭവിക്കുമോ? കേരളം ശ്വാസമടക്കിപ്പിടിച്ചു കാത്തിരിക്കുന്ന ആ 20 വിഐപി പോരാട്ടഭൂമികൾ ഇവയാണ്!
ഉറ്റുനോക്കുന്ന പ്രധാന പോരാട്ടങ്ങൾ:
നേമം: ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറും, എൽഡിഎഫിന്റെ വി. ശിവൻകുട്ടിയും, യുഡിഎഫിന്റെ കെ.എസ്. ശബരീനാഥനും തമ്മിലുള്ള തീപാറുന്ന ത്രികോണ മത്സരം.
പയ്യന്നൂർ: സി.പി.എമ്മിന്റെ ഉരുക്കുകോട്ടയിൽ പാർട്ടി വിട്ടിറങ്ങിയ വി. കുഞ്ഞികൃഷ്ണൻ യുഡിഎഫ് പിന്തുണയോടെ നടത്തുന്ന അട്ടിമറി നീക്കം ഇടതുകോട്ടയെ വിറപ്പിക്കുമോ എന്നതാണ് പ്രധാന ചോദ്യം.
ബേപ്പൂർ: മന്ത്രി മുഹമ്മദ് റിയാസും പി.വി. അൻവറും തമ്മിലുള്ള വാശിയേറിയ പോരാട്ടം. തോറ്റാൽ മൊട്ടയടിക്കുമെന്ന അൻവറിന്റെ വെല്ലുവിളി മണ്ഡലത്തെ ശ്രദ്ധാകേന്ദ്രമാക്കിയിട്ടുണ്ട്.
തൃശ്ശൂർ: പത്മജ വേണുഗോപാൽ ഇക്കുറി എൻഡിഎ സ്ഥാനാർത്ഥിയായി എത്തിയതോടെ തൃശൂരിലെ ആളുകൾ ഇക്കുറി ആർക്കൊപ്പം നിൽക്കുമെന്ന ആകാംക്ഷയിലാണ് രാഷ്ട്രീയ കേരളം.
മഞ്ചേശ്വരം: കപ്പിനും ചുണ്ടിനുമിടയിൽ കഴിഞ്ഞ തവണ നഷ്ടമായ വിജയം തിരിച്ചുപിടിക്കാൻ കെ. സുരേന്ദ്രൻ ഇറങ്ങുമ്പോൾ, മണ്ഡലം നിലനിർത്താൻ യുഡിഎഫ് സർവ്വ സന്നാഹങ്ങളും ഒരുക്കുന്നു.
മറ്റ് ശ്രദ്ധേയമായ മണ്ഡലങ്ങൾ:
കഴക്കൂട്ടം, പാലാ, തവനൂർ, തൃത്താല തുടങ്ങിയ മണ്ഡലങ്ങളിൽ പ്രമുഖ നേതാക്കൾ മാറ്റുരയ്ക്കുമ്പോൾ വോട്ടിംഗ് ശതമാനത്തിലെ വ്യതിയാനങ്ങൾ മുന്നണികളെ ആശങ്കപ്പെടുത്തുന്നുണ്ട്. പത്തനാപുരത്ത് ഗണേഷ് കുമാറിനെ വീഴ്ത്താൻ ചാമക്കാലയും, അമ്പലപ്പുഴയിൽ പാർട്ടി ബന്ധം ഉപേക്ഷിച്ച ജി. സുധാകരന്റെ സാന്നിധ്യവും മത്സരത്തിന്റെ ചിത്രം മാറ്റിമറിച്ചു.
2021-ലെ കണക്കുകളെ അപേക്ഷിച്ച് മിക്ക മണ്ഡലങ്ങളിലും പോളിംഗ് ശതമാനത്തിൽ മാറ്റങ്ങൾ വന്നിട്ടുണ്ട്. ഈ ‘നിശബ്ദ തരംഗം’ ആർക്ക് അനുകൂലമാകുമെന്നത് വോട്ടെണ്ണൽ പൂർത്തിയാകുമ്പോൾ മാത്രമേ വ്യക്തമാകൂ. കെപിസിസി ആസ്ഥാനത്ത് ലഡുവും പാൽപ്പായസവും ഒരുങ്ങിക്കഴിഞ്ഞു, എന്നാൽ ഭരണത്തുടർച്ചയുടെ ആത്മവിശ്വാസത്തിൽ എൽഡിഎഫ് ക്യാമ്പും സജീവമാണ്. കേരളം ആർക്കൊപ്പം? കാത്തിരിക്കാം!
Who will rule Kerala? Hours left to decide; These 20 ‘VIP’ constituencies are the heart-pounding battlegrounds for the fronts!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
