ഒട്ടാവ: വിമാന യാത്രക്കാരുടെ അവകാശങ്ങൾ ആവർത്തിച്ച് ലംഘിക്കുന്ന എയർലൈൻസുകൾക്കെതിരെ കർശന നടപടിയുമായി ഫെഡറൽ സർക്കാർ. നിലവിൽ ചുമത്തുന്ന പിഴ തുക പരമാവധി 10 ലക്ഷം ഡോളറായി ഉയർത്താനാണ് സർക്കാർ ആലോചിക്കുന്നത്. ട്രാൻസ്പോർട്ട് മന്ത്രി സ്റ്റീവൻ മക്കിന്നൺ വെള്ളിയാഴ്ച നടത്തിയ വാർത്താസമ്മേളനത്തിലാണ് ഈ നിർണ്ണായക പ്രഖ്യാപനം നടത്തിയത്.
യാത്രക്കാരുടെ അവകാശ സംരക്ഷണ നിയമങ്ങൾ (APPR) കാറ്റിൽ പറത്തുന്ന വിമാന കമ്പനികൾക്ക് ഇതൊരു ശക്തമായ താക്കീതാകുമെന്ന് മന്ത്രി പറഞ്ഞു. 2019-ൽ നിലവിൽ വന്ന ചട്ടപ്രകാരം, വിമാനങ്ങൾ റദ്ദാക്കുകയോ വൈകുകയോ ചെയ്താൽ യാത്രക്കാർക്ക് നഷ്ടപരിഹാരം നൽകാൻ കമ്പനികൾ ബാധ്യസ്ഥരാണ്. എന്നാൽ, പലപ്പോഴും എയർലൈൻസുകൾ ഈ നിയമങ്ങൾ പാലിക്കുന്നില്ലെന്ന പരാതി ശക്തമാണ്. നിലവിൽ 25,000 ഡോളറാണ് ഇത്തരം ലംഘനങ്ങൾക്ക് ഈടാക്കുന്ന പരമാവധി പിഴ. 2023-ൽ ഇത് 2.5 ലക്ഷം ഡോളറായി ഉയർത്താൻ നിർദ്ദേശിച്ചിരുന്നെങ്കിലും നടപടികൾ വൈകുകയായിരുന്നു. ഈ സാഹചര്യത്തിലാണ് പിഴ തുക കുത്തനെ വർദ്ധിപ്പിക്കാൻ സർക്കാർ തീരുമാനിച്ചത്.
അതേസമയം, പിഴ വർദ്ധനവ് പ്രായോഗികമായി നടപ്പിലാക്കിയില്ലെങ്കിൽ അത് വെറും ഭീഷണിയായി അവശേഷിക്കുമെന്ന് കനേഡിയൻ ഓട്ടോമൊബൈൽ അസോസിയേഷൻ വക്താവ് ഇയാൻ ജാക്ക് അഭിപ്രായപ്പെട്ടു. കനേഡിയൻ ട്രാൻസ്പോർട്ടേഷൻ ഏജൻസിയിൽ (CTA) നിലവിൽ 95,000-ത്തോളം പരാതികൾ കെട്ടിക്കിടക്കുന്നുണ്ട്. നിലവിൽ കെട്ടിക്കിടക്കുന്ന പരാതികൾ വേഗത്തിൽ തീർപ്പാക്കുന്നതിനായി, പരാതികൾ പരിശോധിക്കാനുള്ള ചുമതല സർക്കാരിന് പുറത്തുള്ള സ്വതന്ത്ര സ്ഥാപനങ്ങളെ ഏൽപ്പിക്കാനും സർക്കാർ ആലോചിക്കുന്നുണ്ട്. നിയമങ്ങൾ ലളിതമാക്കുന്നതിലൂടെ യാത്രക്കാർക്ക് വേഗത്തിൽ നീതി ലഭ്യമാക്കുമെന്നും മന്ത്രി സ്റ്റീവൻ മക്കിന്നൺ ഉറപ്പുനൽകി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Setback for airlines; If passengers are inconvenienced, the game will change; Federal government moves to increase fines
