ഒട്ടാവ: ഈ വർഷാവസാനത്തോടെ ഇന്ത്യയുൾപ്പെടെ മൂന്ന് പ്രധാന ആഗോള ശക്തികളുമായി നിർണായക വ്യാപാര കരാറുകളിൽ ഒപ്പുവെക്കാൻ കാനഡ ലക്ഷ്യമിടുന്നതായി അന്താരാഷ്ട്ര വ്യാപാര മന്ത്രി മനീന്ദർ സിദ്ധു. ഇന്ത്യയെ കൂടാതെ തെക്കുകിഴക്കൻ ഏഷ്യൻ രാഷ്ട്രങ്ങളുടെ കൂട്ടായ്മയായ ‘ആസിയാൻ’ (ASEAN), ദക്ഷിണ അമേരിക്കൻ വ്യാപാര ബ്ലോക്കായ ‘മെർകോസൂർ’ (Mercosur) എന്നിവയുമായാണ് കാനഡ ചർച്ചകൾ നടത്തുന്നത്. നിലവിൽ ലോകത്തിന്റെ വിവിധ ഭാഗങ്ങളിൽ കാനഡയുടെ ഔദ്യോഗിക ചർച്ചാ സംഘങ്ങൾ സജീവമാണെന്നും മന്ത്രി വ്യക്തമാക്കി.
കയറ്റുമതി വിപണി വിപുലീകരിക്കുന്നതിന്റെ ഭാഗമായി അടുത്ത പത്ത് വർഷത്തിനുള്ളിൽ അമേരിക്കയ്ക്ക് പുറത്തുള്ള രാജ്യങ്ങളിലേക്കുള്ള വ്യാപാരം ഇരട്ടിയാക്കുകയാണ് ലിബറൽ സർക്കാരിന്റെ ലക്ഷ്യം. ഇതിന്റെ ഭാഗമായി അർജന്റീന, ബ്രസീൽ തുടങ്ങിയവ ഉൾപ്പെടുന്ന മെർകോസൂർ സഖ്യവുമായി കഴിഞ്ഞ ആഴ്ച ബ്രസീലിൽ വെച്ച് ചർച്ചകൾ നടന്നിരുന്നു. അർജന്റീനയിലെ ഖനന മേഖലയിലെ വലിയ നിക്ഷേപകരായ കാനഡ, ഊർജം, ധാതുക്കൾ തുടങ്ങിയ മേഖലകളിൽ പുതിയ പങ്കാളിത്തത്തിന് ശ്രമിക്കുന്നുണ്ട്. 2024-നെ അപേക്ഷിച്ച് 2025-ൽ കയറ്റുമതിയിൽ 33 ബില്യൺ ഡോളറിന്റെ വർധനവ് ഉണ്ടായതായും സർക്കാർ റിപ്പോർട്ടുകൾ വ്യക്തമാക്കുന്നു.
ഇന്ത്യയുമായുള്ള വ്യാപാര ബന്ധം മെച്ചപ്പെടുത്തുന്നതിന്റെ ഭാഗമായി കേന്ദ്രമന്ത്രി പീയൂഷ് ഗോയലിന്റെ നേതൃത്വത്തിലുള്ള ഉന്നതതല പ്രതിനിധി സംഘം ഈ മാസം അവസാനം കാനഡ സന്ദർശിക്കും. കാനഡയിലെ ഊർജം, ഖനനം എന്നീ മേഖലകളിൽ ഇന്ത്യൻ കമ്പനികൾക്ക് വലിയ താൽപ്പര്യമുണ്ടെന്ന് മനീന്ദർ സിദ്ധു പറഞ്ഞു. 2040-ഓടെ ഇന്ത്യയുടെ ഊർജ ആവശ്യകതയിൽ 70 ശതമാനത്തോളം വർധനയുണ്ടാകുമെന്നാണ് പ്രതീക്ഷിക്കുന്നത്. ഇതിനാവശ്യമായ യൂറേനിയം, പൊട്ടാഷ് എന്നിവ നൽകാൻ കാനഡയ്ക്ക് സാധിക്കും. ഇന്ത്യ ഇതിനോടകം തന്നെ യൂറോപ്യൻ യൂണിയൻ, ബ്രിട്ടൻ തുടങ്ങിയ രാജ്യങ്ങളുമായി കരാറുകളിൽ ഏർപ്പെട്ട സാഹചര്യത്തിൽ, കാനഡയുടെ ബിസിനസ് താൽപ്പര്യങ്ങൾ സംരക്ഷിക്കാൻ വേഗത്തിലുള്ള നീക്കങ്ങൾ അനിവാര്യമാണെന്നും മന്ത്രി കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada signs trade deal with three countries including India to gain a foothold in global market
