തൊഴിൽ വാഗ്ദാനം പാളി; ദാരിദ്ര്യനിർമ്മാർജന ലക്ഷ്യങ്ങളിൽ ഒന്റാറിയോ സർക്കാർ പരാജയപ്പെട്ടതായി റിപ്പോർട്ട്

ടൊറന്റോ: ഒന്റാറിയോയിലെ ദാരിദ്ര്യനിർമ്മാർജനത്തിനായി ഫോർഡ് സർക്കാർ മുന്നോട്ടുവെച്ച പ്രധാന ലക്ഷ്യങ്ങൾ പരാജയപ്പെട്ടതായി ഔദ്യോഗിക റിപ്പോർട്ട്. സാമൂഹിക സുരക്ഷാ പദ്ധതികളിൽ (Social Assistance) ഉൾപ്പെട്ടവരിൽ പ്രതിവർഷം 60,000 പേർക്കെങ്കിലും തൊഴിൽ ലഭ്യമാക്കി അവരെ സ്വയംപര്യാപ്തരാക്കുമെന്ന 2020-2025 കാലയളവിലെ കർമ്മപദ്ധതിയാണ് ലക്ഷ്യം കാണാതെ അവസാനിച്ചത്. കഴിഞ്ഞ വർഷം അവസാനിച്ച പദ്ധതിയുടെ കണക്കുകൾ പുറത്തുവരുമ്പോൾ, നിശ്ചയിച്ച ലക്ഷ്യത്തിന്റെ പകുതി പോലും കൈവരിക്കാനായില്ലെന്ന് വ്യക്തമാകുന്നു.

2020 ഡിസംബറിൽ കോവിഡ് പ്രതിസന്ധിക്കിടയിലാണ് പ്രവിശ്യാ സർക്കാർ അഞ്ചുവർഷത്തെ ദാരിദ്ര്യനിർമ്മാർജന തന്ത്രം പ്രഖ്യാപിച്ചത്. 2019-ൽ പ്രതിവർഷം 35,000 പേർക്ക് ജോലി ലഭിച്ചിരുന്ന സ്ഥാനത്ത് നിന്ന് 2024-ഓടെ അത് 60,000 ആയി ഉയർത്തുകയായിരുന്നു പ്രധാന ലക്ഷ്യം. എന്നാൽ, 2025-ലെ വാർഷിക റിപ്പോർട്ട് പ്രകാരം കഴിഞ്ഞ വർഷം 43,425 പേർക്ക് മാത്രമാണ് സാമൂഹിക സുരക്ഷാ പദ്ധതികളിൽ നിന്ന് തൊഴിലിലേക്ക് മാറാൻ സാധിച്ചത്. ലക്ഷ്യമിട്ട സംഖ്യയേക്കാൾ 16,000-ത്തിലധികം പേരുടെ കുറവാണിത് രേഖപ്പെടുത്തിയിരിക്കുന്നത്.

പദ്ധതി ലക്ഷ്യം കാണാത്തതിന് കാരണമായി കോവിഡ് മഹാമാരി, കുതിച്ചുയരുന്ന പണപ്പെരുപ്പം, സാമ്പത്തിക മാന്ദ്യം, തൊഴിലില്ലായ്മ നിരക്കിലെ വർദ്ധനവ് തുടങ്ങിയ ബാഹ്യഘടകങ്ങളെയാണ് സർക്കാർ റിപ്പോർട്ട് കുറ്റപ്പെടുത്തുന്നത്. എന്നാൽ, കഴിഞ്ഞ നാല് വർഷത്തിനിടെ തൊഴിലിലേക്കുള്ള മാറ്റത്തിൽ വലിയ പുരോഗതി ഉണ്ടായതായും റിപ്പോർട്ട് അവകാശപ്പെടുന്നു. നിലവിൽ രണ്ട് ലക്ഷത്തോളം പേർ ജോലി കണ്ടെത്താനുള്ള ശ്രമത്തിലാണെന്നും സർക്കാർ വക്താവ് വ്യക്തമാക്കി. അതേസമയം, ജോലി ലഭിച്ചവർ എത്രകാലം ആ ജോലിയിൽ തുടരുന്നുണ്ടെന്നോ അവർ വീണ്ടും സാമ്പത്തിക സഹായം തേടുന്നുണ്ടോ എന്നോ ഉള്ള കാര്യത്തിൽ വ്യക്തതയില്ല.

സർക്കാരിന്റെ നയം പരാജയമാണെന്നും കേവലം തൊഴിൽ നൽകുന്നതുകൊണ്ട് മാത്രം ദാരിദ്ര്യം ഇല്ലാതാകില്ലെന്നും പ്രതിപക്ഷമായ എൻഡിപി (NDP) ആരോപിച്ചു. കുറഞ്ഞ വേതനമുള്ള ജോലികളിലേക്ക് ആളുകളെ തള്ളിവിടുന്നത് വഴി അവർ വീണ്ടും ദാരിദ്ര്യത്തിന്റെ ചക്രവ്യൂഹത്തിൽ കുടുങ്ങുകയാണ്. ഒന്റാറിയോ വർക്സ് (OW) പോലുള്ള പദ്ധതികളിൽ ലഭിക്കുന്ന തുച്ഛമായ തുകയും കർശനമായ നിബന്ധനകളും ഗുണഭോക്താക്കളെ കൂടുതൽ പ്രതിസന്ധിയിലാക്കുന്നു. പുതിയ ദാരിദ്ര്യനിർമ്മാർജന പദ്ധതിയുടെ കൺസൾട്ടേഷൻ നടപടികൾ പൂർത്തിയായിട്ടുണ്ടെങ്കിലും, അടുത്ത ഘട്ടത്തിൽ സർക്കാർ എന്ത് മാറ്റമാണ് കൊണ്ടുവരിക എന്ന ഉറ്റുനോക്കുകയാണ് പ്രവിശ്യയിലെ സാധാരണക്കാർ.

Job promise fails; Ontario government fails to meet poverty reduction goals, report finds

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt