നയാഗ്ര: ആശുപത്രിയിൽ ചികിത്സയിലിരിക്കെ വ്യാജ തോക്ക് കൈവശം വെച്ച മുപ്പത്തിയെട്ടുകാരനെ പോലീസ് അറസ്റ്റ് ചെയ്തു. നയാഗ്ര സ്വദേശിയായ ജാമി ഖുവാത്തിപ്പിനെയാണ് (Jamie Khouathip) പോലീസ് പിടികൂടിയത്. ഇയാളുടെ വീട്ടിൽ നടത്തിയ വിശദമായ പരിശോധനയിൽ അനധികൃത ആയുധങ്ങളുടെ വൻ ശേഖരം കണ്ടെത്തിയതിനെത്തുടർന്ന് 76 കേസുകളാണ് പോലീസ് ഇയാൾക്കെതിരെ ചുമത്തിയിരിക്കുന്നത്.
കഴിഞ്ഞ ഏപ്രിൽ 28-നാണ് സെന്റ് കാതറൈൻസിലെ മരോട്ട ഫാമിലി ആശുപത്രിയിൽ ചികിത്സയിലായിരുന്ന പ്രതിയുടെ പക്കൽ തോക്ക് കണ്ടെത്തിയത്. വിവരമറിഞ്ഞ് സ്ഥലത്തെത്തിയ നയാഗ്ര റീജണൽ പോലീസ് നടത്തിയ പരിശോധനയിൽ ഇത് വ്യാജ തോക്കാണെന്ന് (Imitation firearm) സ്ഥിരീകരിച്ചു. ആയുധങ്ങൾ കൈവശം വെക്കുന്നതിൽ നിന്നും പ്രതിയെ വിലക്കിക്കൊണ്ടുള്ള പ്രൊബേഷൻ ഉത്തരവ് നിലവിലിരിക്കെയാണ് ഇയാൾ തോക്കുമായി എത്തിയത്. ഇതേത്തുടർന്ന് ഇയാളെ ഉടൻ തന്നെ കസ്റ്റഡിയിലെടുത്തു.തുടർന്ന് നടത്തിയ അന്വേഷണത്തിൽ പ്രതിയുടെ വീട്ടിൽ കൂടുതൽ ആയുധങ്ങൾ ഉണ്ടെന്ന വിവരം ലഭിച്ചതിനെത്തുടർന്ന് കോടതി ഉത്തരവോടെ പോലീസ് റെയ്ഡ് നടത്തി.
പരിശോധനയിൽ ലോഡ് ചെയ്ത ഹാൻഡ് ഗണ്ണുകൾ, സ്വിച്ച് ഗണ്ണുകൾ, ബിബി ഗണ്ണുകൾ, ഷോട്ട്ഗൺ ബാരൽ, വിവിധ തരം വെടിയുണ്ടകൾ, നിരോധിത കത്തികൾ എന്നിവ കണ്ടെടുത്തു. ആയുധങ്ങൾ അശ്രദ്ധമായി കൈകാര്യം ചെയ്യൽ, ലൈസൻസില്ലാതെ തോക്കുകൾ കൈവശം വെക്കൽ തുടങ്ങിയ വിവിധ കുറ്റങ്ങളാണ് ഇയാൾക്കെതിരെ ചുമത്തിയിരിക്കുന്നത്. പ്രതി നിലവിൽ പോലീസ് കസ്റ്റഡിയിലാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Patient arrested for bringing fake gun to hospital; house raided, large cache of weapons recovered
