ഒട്ടാവ: കാനഡയുടെ പൗരത്വ നിയമത്തിൽ വരുത്തിയ സുപ്രധാന ഭേദഗതിയെത്തുടർന്ന് പൗരത്വത്തിനായി അപേക്ഷിക്കുന്ന അമേരിക്കൻ പൗരന്മാരുടെ എണ്ണത്തിൽ വൻ വർധനവ്. വിദേശത്ത് ജനിച്ചവർക്ക് പൗരത്വം കൈമാറുന്നതിൽ നേരത്തെ നിലനിന്നിരുന്ന ‘First Generation Limit’ എന്ന പരിധി ബിൽ C-12 നിയമമായതോടെ നീക്കം ചെയ്യപ്പെട്ടു. ഇതോടെ, കാനഡയിൽ ജനിച്ച പൂർവ്വികരോ അതിന് മുൻപുള്ള തലമുറയോ ഉള്ളവർക്കും ഇപ്പോൾ കാനഡ പാസ്പോർട്ടിന് അപേക്ഷിക്കാൻ സാധിക്കും. കുടുംബ പാരമ്പര്യം തെളിയിക്കുന്ന രേഖകൾ തേടി ആയിരക്കണക്കിന് അമേരിക്കക്കാരാണ് ഇപ്പോൾ കുടിയേറ്റ അഭിഭാഷകരെ സമീപിക്കുന്നത്.
നിയമമാറ്റത്തിന് പിന്നാലെ അമേരിക്കയിലെ വിവിധ നഗരങ്ങളിൽ നിന്ന് കാനഡയിലേക്കുള്ള കുടിയേറ്റ അപേക്ഷകളിൽ അസാധാരണമായ വർധനവാണ് രേഖപ്പെടുത്തുന്നത്. വാഷിങ്ടൺ, ഷിക്കാഗോ തുടങ്ങിയ ഇടങ്ങളിലെ കുടിയേറ്റ നിയമ വിദഗ്ധർക്ക് പ്രതിദിനം നിരവധി അപേക്ഷകളാണ് ലഭിച്ചുകൊണ്ടിരിക്കുന്നത്. അമേരിക്കയിലെ നിലവിലെ രാഷ്ട്രീയ സാഹചര്യങ്ങളും ഭരണകൂട നയങ്ങളോടുള്ള വിയോജിപ്പുമാണ് പലരെയും കാനഡയിലേക്ക് ആകർഷിക്കുന്നത്. കുറഞ്ഞ പഠനച്ചെലവ്, മെച്ചപ്പെട്ട സാമൂഹിക സുരക്ഷ, ലിംഗനീതി തുടങ്ങിയ കാര്യങ്ങളിൽ കാനഡ പുലർത്തുന്ന നിലപാടുകളും അമേരിക്കൻ അപേക്ഷകരുടെ എണ്ണം കൂടാൻ കാരണമായിട്ടുണ്ട്.
കാനഡയിൽ ജനിച്ച പൂർവ്വികരുള്ളവർക്ക് ഈ നിയമം വലിയൊരു അവസരമാണ് തുറന്നു നൽകിയിരിക്കുന്നത്. വാൻകൂവറിലെയും വാഷിങ്ടണിലെയും കുടിയേറ്റ അഭിഭാഷകർ വ്യക്തമാക്കുന്നത് അനുസരിച്ച്, വർഷത്തിൽ ചുരുക്കം ചില കേസുകൾ മാത്രം വന്നിരുന്ന സ്ഥാനത്ത് ഇപ്പോൾ ദിവസേന മൂന്നിലധികം കൺസൾട്ടേഷനുകൾ നടക്കുന്നുണ്ട് എന്നാണ് . അമേരിക്കയിലെ പല കുടുംബങ്ങളും തങ്ങളുടെ പഴയ രേഖകൾ പരിശോധിക്കുകയും കാനഡയുമായുള്ള കുടുംബ പാരമ്പര്യം കണ്ടെത്താൻ ശ്രമിക്കുകയും ചെയ്യുന്നു. വരും മാസങ്ങളിൽ അമേരിക്കയിൽ നിന്നുള്ള കുടിയേറ്റക്കാരുടെ എണ്ണം ഇനിയും വർധിക്കുമെന്നാണ് ഈ രംഗത്തെ വിദഗ്ധരുടെ വിലയിരുത്തൽ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Americans rush to move to Canada: Huge increase in applications following law change
