ബലാത്സംഗ ദൃശ്യങ്ങൾ കൈവശം വെച്ചാലും പിടിവീഴും; വേട്ടക്കാരെ പൂട്ടാൻ ‘മെലനീസ് ലോ’; കാനഡയിൽ ക്രിമിനൽ നിയമം മാറുന്നു

ഒട്ടാവ: പങ്കാളികളെ മയക്കുമരുന്ന് നൽകി പീഡിപ്പിക്കുകയും ഇതിന്റെ ദൃശ്യങ്ങൾ പകർത്തി ആഗോളതലത്തിൽ പ്രചരിപ്പിക്കുകയും ചെയ്യുന്ന ക്രിമിനൽ സംഘങ്ങൾക്കെതിരെ കടുത്ത നടപടിയുമായി കാനഡ. ലൈംഗികാതിക്രമ ദൃശ്യങ്ങൾ നിർമ്മിക്കുന്നതും കൈവശം വെക്കുന്നതും വിതരണം ചെയ്യുന്നതും കുട്ടികൾക്കെതിരായ ലൈംഗികാതിക്രമത്തിന് (Child Pornography) സമാനമായ കുറ്റകൃത്യമായി പരിഗണിക്കുന്ന ‘മെലനീസ് ലോ’ (Melanie’s Law) പാർലമെന്റിൽ അവതരിപ്പിച്ചു. പ്രശസ്ത മാധ്യമമായ ‘W5’ നടത്തിയ അന്വേഷണാത്മക റിപ്പോർട്ടാണ് ഇത്തരമൊരു നിയമനിർമ്മാണത്തിലേക്ക് സർക്കാരിനെ നയിച്ചത്.

കാനഡയിലെ ക്രിമിനൽ കോഡിൽ വലിയ മാറ്റങ്ങൾ നിർദ്ദേശിക്കുന്ന ബിൽ കൺസർവേറ്റീവ് എം.പി ബർട്ടൺ ബെയ്‌ലിയാണ് സ്വകാര്യ ബില്ലായി സഭയിൽ അവതരിപ്പിച്ചത്. സ്വന്തം പങ്കാളികളെ ക്രൂരമായ ലൈംഗികാതിക്രമത്തിന് ഇരയാക്കുന്ന പുരുഷന്മാരുടെ വൻ ശൃംഖലയെ W5 പുറത്തുകൊണ്ടുവന്നിരുന്നു. ഈ ഡോക്യുമെന്ററിയിൽ അതിക്രമം തുറന്നുപറഞ്ഞ ‘മെലാനി’ എന്ന യുവതിയോടുള്ള ആദരസൂചകമായാണ് നിയമത്തിന് ‘മെലനീസ് ലോ’ എന്ന് പേരിട്ടിരിക്കുന്നത്. താൻ മയക്കുമരുന്നിന്റെ സ്വാധീനത്തിൽ അബോധാവസ്ഥയിലായിരുന്നപ്പോൾ പകർത്തിയ ദൃശ്യങ്ങൾ പിന്നീട് കണ്ടതിനെക്കുറിച്ച് മെലാനി ഡോക്യുമെന്ററിയിൽ വെളിപ്പെടുത്തിയിരുന്നു.

നിലവിൽ ഇത്തരം ദൃശ്യങ്ങൾ പകർത്തുന്നതിനും പ്രചരിപ്പിക്കുന്നതിനും കാനഡയിൽ അഞ്ചു വർഷം വരെ മാത്രമാണ് ശിക്ഷ ലഭിക്കുന്നത്. എന്നാൽ പുതിയ ബിൽ നിയമമാകുന്നതോടെ ശിക്ഷാ കാലാവധി 14 വർഷം വരെയായി വർദ്ധിക്കും. കൂടാതെ ഒരു ലക്ഷം ഡോളർ വരെ പിഴയും ഈടാക്കാൻ വ്യവസ്ഥയുണ്ട്. വോയറിസം (Voyeurism), സ്വകാര്യ ദൃശ്യങ്ങൾ പ്രചരിപ്പിക്കൽ തുടങ്ങിയ ലഘുവായ വകുപ്പുകൾക്ക് പകരം ‘സെക്ഷ്വൽ അസാൾട്ട് മെറ്റീരിയൽ’ (Sexual Assault Material) എന്ന പുതിയ നിർവ്വചനം തന്നെ നിയമത്തിൽ ഉൾപ്പെടുത്തും. ഇത് കുറ്റവാളികൾക്ക് പഴുതുകളില്ലാത്ത ശിക്ഷ ഉറപ്പാക്കുമെന്ന് ഷാഡോ ജസ്റ്റിസ് മിനിസ്റ്റർ ലാറി ബ്രോക്ക് വ്യക്തമാക്കി.

മാധ്യമ അന്വേഷണത്തെത്തുടർന്ന് കാനഡയിലും സ്വിറ്റ്‌സർലൻഡിലുമായി നിരവധി പേർ ഇതിനോടകം അറസ്റ്റിലായിട്ടുണ്ട്. ഹാമിൽട്ടണിൽ നിന്നുള്ള ബ്രയാൻ ഹേവാർഡ് എന്ന വ്യക്തിക്കെതിരെ മാത്രം 60-ഓളം കേസുകളാണ് നിലവിലുള്ളത്. ഇന്റർനെറ്റ് യുഗത്തിൽ ഇത്തരം ക്രൂരതകൾക്കെതിരെ നിയമനിർമ്മാണം വൈകുന്നത് നീതീകരിക്കാനാവില്ലെന്ന് ആക്ടിവിസ്റ്റുകൾ ചൂണ്ടിക്കാട്ടുന്നു. കക്ഷിരാഷ്ട്രീയ ഭേദമന്യേ പാർലമെന്റിൽ ബില്ലിന് പിന്തുണ ലഭിക്കുമെന്നാണ് പ്രതീക്ഷിക്കുന്നത്. സ്വന്തം അന്തസ്സ് ചോദ്യം ചെയ്യപ്പെടുന്നവർക്ക് നീതി ഉറപ്പാക്കാനുള്ള പോരാട്ടമാണിതെന്ന് മെലാനി പ്രതികരിച്ചു.

Even if you possess rape footage, you will be caught; 'Melanie's Law' to lock up the hunters

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt