2026-ലെ ഫിഫ ലോകകപ്പിന് വേദിയാകുന്ന ടൊറന്റോയിലെ മത്സരങ്ങളുടെ ടിക്കറ്റ് പുനർവിൽപ്പന ഫിഫ താൽക്കാലികമായി നിർത്തിവെച്ചു. ഒന്റാറിയോ സർക്കാർ പുതുതായി നടപ്പിലാക്കിയ പ്രൈസ് ക്യാപ് (Price Cap) നിയമം പാലിക്കുന്നതിന്റെ ഭാഗമായാണ് ഈ നടപടി. ടിക്കറ്റുകൾ അവയുടെ യഥാർത്ഥ വിലയേക്കാൾ (Face Value) ഉയർന്ന തുകയ്ക്ക് വിൽക്കുന്നത് നിരോധിച്ചുകൊണ്ടുള്ള നിയമം കഴിഞ്ഞ വെള്ളിയാഴ്ചയാണ് പ്രാബല്യത്തിൽ വന്നത്. ഇതോടെ ടൊറന്റോയിലെ മത്സരങ്ങൾക്കായി ഫിഫയുടെ ഔദ്യോഗിക റീസെയിൽ പ്ലാറ്റ്ഫോമിൽ ലിസ്റ്റ് ചെയ്തിരുന്ന ടിക്കറ്റുകൾ അപ്രത്യക്ഷമായി.
പുതിയ നിയമനിർമ്മാണത്തിന് അനുസൃതമായി തങ്ങളുടെ പ്ലാറ്റ്ഫോമിൽ മാറ്റങ്ങൾ വരുത്തുകയാണെന്നും, ഈ പ്രക്രിയ പൂർത്തിയായാൽ ടിക്കറ്റുകൾ വീണ്ടും ലഭ്യമാകുമെന്നും ഫിഫ അറിയിച്ചു. നിലവിൽ ടൊറന്റോ ഒഴികെയുള്ള മറ്റ് ലോകകപ്പ് വേദികളിലെ ടിക്കറ്റുകൾ ഫിഫ പ്ലാറ്റ്ഫോമിൽ ലഭ്യമാണ്. അതേസമയം, സ്റ്റബ്ഹബ് (StubHub) പോലുള്ള സ്വകാര്യ പ്ലാറ്റ്ഫോമുകൾ ഇപ്പോഴും ഉയർന്ന വിലയ്ക്ക് ടിക്കറ്റുകൾ വിൽക്കുന്നത് തുടരുന്നത് ആശയക്കുഴപ്പത്തിന് കാരണമായിട്ടുണ്ട്. കാനഡയും ബോസ്നിയ-ഹെർസഗോവിനയും തമ്മിലുള്ള മത്സരത്തിന് 70,000 ഡോളറിന് മുകളിൽ വരെ ടിക്കറ്റ് നിരക്കുകൾ സ്റ്റബ്ഹബ്ബിൽ കാണപ്പെടുന്നുണ്ട്.
ഉപഭോക്താക്കളെ ചൂഷണത്തിൽ നിന്ന് സംരക്ഷിക്കാനാണ് പ്രീമിയം വില ഈടാക്കുന്ന പ്രൊഫഷണൽ റീസെല്ലർമാർക്കെതിരെ സർക്കാർ രംഗത്തുവന്നത്. നിയമം ലംഘിക്കുന്ന സ്ഥാപനങ്ങൾക്ക് 3,000 ഡോളർ മുതൽ 250,000 ഡോളർ വരെ പിഴ ചുമത്താൻ വ്യവസ്ഥയുണ്ട്. മുൻപ് ടെയ്ലർ സ്വിഫ്റ്റ് കൺസേർട്ടുകൾക്കും വേൾഡ് സീരീസിനും ടിക്കറ്റ് വില കുതിച്ചുയർന്നതിനെത്തുടർന്നുള്ള ജനരോഷമാണ് ഇത്തരമൊരു നിയമത്തിന് വഴിതെളിച്ചത്. എന്നാൽ, ഈ നിയമം ടിക്കറ്റ് വിപണിയെ അനൗദ്യോഗിക മേഖലകളിലേക്ക് നയിക്കുമെന്നും തട്ടിപ്പുകൾ വർദ്ധിപ്പിക്കുമെന്നും ഒരു വിഭാഗം വിദഗ്ധർ ആശങ്കപ്പെടുന്നു.
FIFA Blocks Toronto World Cup Ticket Resale Amid Price Cap
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
