ടൊറന്റോ: വരാനിരിക്കുന്ന കാനഡ-അമേരിക്ക-മെക്സിക്കോ വ്യാപാര കരാർ (CUSMA) അവലോകനത്തിന് മുന്നോടിയായി ഇരുരാജ്യങ്ങളും തമ്മിലുള്ള വാക്പോര് ശക്തമാകുന്നു. ജൂലൈ ഒന്നിനകം കരാറിൽ പുനഃപരിശോധന പൂർത്തിയാക്കേണ്ടതുണ്ടെങ്കിലും, നിശ്ചിത സമയത്തിനുള്ളിൽ അന്തിമ തീരുമാനമുണ്ടാകാൻ സാധ്യത കുറവാണെന്ന് വിദഗ്ധർ ചൂണ്ടിക്കാട്ടി. നിലവിൽ അമേരിക്കയും മെക്സിക്കോയും തമ്മിലുള്ള ചർച്ചകളാണ് സജീവമായി നടക്കുന്നത്. ഇതിനിടെ, സാമ്പത്തിക ബന്ധങ്ങൾ മെച്ചപ്പെടുത്തുന്നതിനായി മാർക്ക് കാർണിയുടെ നേതൃത്വത്തിലുള്ള കാനഡയുടെ പ്രത്യേക ഉപദേശക സമിതി തിങ്കളാഴ്ച ആദ്യ യോഗം ചേർന്നു.
കരാർ പുനഃപരിശോധിക്കാനുള്ള ജൂലൈ ഒന്നിന്റെ സമയപരിധി വെറുമൊരു ‘ചെക്ക് പോയിന്റ്’ മാത്രമാണെന്നും അതിനുശേഷവും ചർച്ചകൾ നീളാൻ സാധ്യതയുണ്ടെന്നും കാനഡയുടെ മുഖ്യ വ്യാപാര പ്രതിനിധി ജാനിസ് ചാരെറ്റ് വ്യക്തമാക്കി. കാനഡയുടെ ഭരണരീതി അനുസരിച്ച് ഓരോ പ്രവിശ്യകൾക്കും (Provinces) പ്രത്യേക അധികാരങ്ങളുണ്ട്. അതിനാൽ തന്നെ അമേരിക്കയുമായി ഒരു കരാറിൽ എത്തുമ്പോൾ എല്ലാ പ്രവിശ്യകളുടെയും താൽപ്പര്യങ്ങൾ സംരക്ഷിക്കേണ്ടി വരുന്നത് ചർച്ചകളെ സങ്കീർണ്ണമാക്കുന്നുണ്ടെന്ന് പ്രൊഫസർ ഡ്രൂ ഫാഗൻ ചൂണ്ടിക്കാട്ടി. വൈറ്റ് ഹൗസിൽ നിന്നുള്ള കടുത്ത പ്രസ്താവനകളെ പ്രതിരോധിക്കാൻ കാനഡ ശ്രമിക്കുന്നുണ്ടെങ്കിലും, വരും മാസങ്ങളിൽ ചർച്ചകൾ നിർണ്ണായക ഘട്ടത്തിലേക്ക് കടക്കുമെന്നാണ് റിപ്പോർട്ടുകൾ.
കഴിഞ്ഞ ശരത്കാലം മുതൽ ഇരുരാജ്യങ്ങളും തമ്മിലുള്ള ഉന്നതതല ചർച്ചകൾ തടസ്സപ്പെട്ട നിലയിലാണെങ്കിലും വേനൽക്കാലത്തിന് മുൻപ് പുതിയ ധാരണകളുണ്ടാകുമെന്നാണ് പ്രതീക്ഷ. കഴിഞ്ഞ ആഴ്ച അമേരിക്കൻ വാണിജ്യ സെക്രട്ടറി ഹൊവാർഡ് ലുട്നിക് കാനഡയുടെ നിലപാടുകളെ രൂക്ഷമായി വിമർശിച്ചത് ഇരുരാജ്യങ്ങൾക്കുമിടയിലെ അസ്വസ്ഥത പരസ്യമാക്കിയിരുന്നു. എങ്കിലും, ഓഗസ്റ്റ് മാസത്തോടെ കരാറിന്റെ ഏകദേശ രൂപം തെളിയുമെന്നും നിലവിലെ പ്രതിസന്ധികൾ പരിഹരിക്കപ്പെടുമെന്നുമാണ് സാമ്പത്തിക വിദഗ്ധരുടെ വിലയിരുത്തൽ.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada breaks with the US: Uncertainty over trade deal; Markets worried
