ന്യൂഡൽഹി: പ്രമുഖ മെസേജിംഗ് പ്ലാറ്റ്ഫോമായ വാട്ട്സ്ആപ്പ് ഇന്ത്യയിലെ ഉപയോക്താക്കൾക്കായി പുതിയ മൊബൈൽ റീചാർജ് സംവിധാനം അവതരിപ്പിച്ചു. പേയ്മെന്റ് കമ്പനിയായ പേയുവുമായി (PayU) സഹകരിച്ചാണ് ഈ സേവനം ഒരുക്കിയിരിക്കുന്നത്. ഇതോടെ, റീചാർജ് ആവശ്യങ്ങൾക്കായി മറ്റ് യുപിഐ ആപ്പുകളോ വെബ്സൈറ്റുകളോ സന്ദർശിക്കാതെ തന്നെ ചാറ്റിംഗിനിടയിൽ വേഗത്തിൽ പണമടയ്ക്കാൻ ഉപയോക്താക്കൾക്ക് സാധിക്കും. വരും ആഴ്ചകളിൽ ആൻഡ്രോയിഡ്, ഐഒഎസ് ഫോണുകളിൽ ഈ സൗകര്യം പൂർണ്ണമായി ലഭ്യമാകും.
വാട്ട്സ്ആപ്പ് ആപ്പിന്റെ ഹോം സ്ക്രീനിൽ പുതുതായി നൽകിയിട്ടുള്ള രൂപ (€) ഐക്കൺ വഴിയാണ് റീചാർജ് സൗകര്യം ലഭ്യമാകുക. ഈ ഐക്കണിൽ ക്ലിക്ക് ചെയ്ത് ‘മൊബൈൽ പ്രീപെയ്ഡ് റീചാർജ്’ എന്ന ഓപ്ഷൻ തിരഞ്ഞെടുത്താൽ സ്വന്തം നമ്പറോ സുഹൃത്തുക്കളുടെ നമ്പറോ റീചാർജ് ചെയ്യാം. ജിയോ, എയർടെൽ, വിഐ (Vi) തുടങ്ങിയ പ്രമുഖ ടെലികോം കമ്പനികളുടെ എല്ലാ പ്ലാനുകളും ഇതിൽ ലഭ്യമാണ്. യുപിഐ, ഡെബിറ്റ് കാർഡ്, ക്രെഡിറ്റ് കാർഡ് എന്നിവ വഴി പണമടയ്ക്കാനുള്ള സൗകര്യവും ആപ്പിൽ ക്രമീകരിച്ചിട്ടുണ്ട്.
ദൈനംദിന ആവശ്യങ്ങൾക്കായി ആളുകൾ ഒരേ പ്ലാറ്റ്ഫോമിനെ ആശ്രയിക്കുന്ന സാഹചര്യം കണക്കിലെടുത്താണ് റീചാർജ് സേവനം കൂടി ഉൾപ്പെടുത്തിയതെന്ന് മെറ്റാ ഇന്ത്യ ഡയറക്ടർ രവി ഗാർഗ് പറഞ്ഞു. നിലവിൽ മെട്രോ ടിക്കറ്റുകൾ ബുക്ക് ചെയ്യാനും ബില്ലുകൾ അടയ്ക്കാനുമുള്ള സൗകര്യം വാട്ട്സ്ആപ്പ് നൽകുന്നുണ്ട്. പുതിയ ഫീച്ചർ കൂടി എത്തുന്നതോടെ ചാറ്റിംഗിന് പുറമെ എല്ലാ സേവനങ്ങളും ഒരിടത്ത് ലഭിക്കുന്ന ‘സൂപ്പർ ആപ്പ്’ എന്ന നിലയിലേക്ക് വാട്ട്സ്ആപ്പ് മാറുകയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
You can now recharge your mobile through WhatsApp; Meta introduces new feature
