ലണ്ടൻ (ഒന്റാറിയോ): കാനഡയിലെ ലോട്ടറി ചരിത്രത്തിലെ ഏറ്റവും വലിയ തുകകളിലൊന്നായ 80 മില്യൺ ഡോളറിന്റെ (ഏകദേശം 660 കോടി രൂപ) ലോട്ടോ മാക്സ് ജാക്കപോട്ട് വിജയികളെ ഒടുവിൽ പ്രഖ്യാപിച്ചു. ഒന്റാറിയോയിലെ ലണ്ടൻ നഗരത്തിൽ നിന്നുള്ള ഗ്രെഗ്, ക്രിസ് എന്നീ സുഹൃത്തുക്കളാണ് ഈ അപ്രതീക്ഷിത ഭാഗ്യത്തിന് ഉടമകളായത്. ജാക്കപോട്ട് തുകയ്ക്ക് പുറമെ ‘കോമ്പിനേഷൻ പ്ലേ’ വഴി ലഭിച്ച 4.03 ലക്ഷം ഡോളറും ഇവർക്ക് ലഭിക്കും.
തൊണ്ണൂറുകളിൽ യൂറോപ്പിൽ നിന്ന് കാനഡയിലേക്ക് കുടിയേറിയവരാണ് ഗ്രെഗും ക്രിസും. ലണ്ടനിലെ ഇംഗ്ലീഷ് ലാംഗ്വേജ് (ESL) ക്ലാസിൽ വെച്ചാണ് ഇവർ ആദ്യമായി കണ്ടുമുട്ടുന്നത്. വർഷങ്ങളായി തുടരുന്ന ഇവരുടെ സൗഹൃദം ഇപ്പോൾ കോടികളുടെ ഭാഗ്യത്തിലേക്കാണ് വഴിമാറിയിരിക്കുന്നത്. സമ്മാനത്തുക ഉയർന്ന നിലയിൽ എത്തുമ്പോൾ മാത്രം ലോട്ടറി എടുക്കുന്ന ശീലമായിരുന്നു ഇവർക്കുണ്ടായിരുന്നത്. സുഹൃത്തുക്കൾ ഇരുവരും ചേർന്ന് ‘ക്വിക്ക് പിക്ക്’ രീതിയിലാണ് ഈ ഭാഗ്യ ടിക്കറ്റ് തിരഞ്ഞെടുത്തത്.
പഴയ രീതിയിൽ പേപ്പറിൽ നമ്പറുകൾ എഴുതി ഒത്തുനോക്കിയാണ് ഗ്രെഗ് വിജയിയെ തിരിച്ചറിഞ്ഞത്. “ഓരോ നമ്പറായി ഞാൻ വട്ടം വരച്ചു കൊണ്ടിരുന്നു. ഒടുവിൽ എല്ലാ നമ്പറുകളും ഒത്തു വന്നപ്പോഴാണ് വിജയിയാണെന്ന കാര്യം തിരിച്ചറിഞ്ഞത്,” ഗ്രെഗ് ഒ.എൽ.ജി അധികൃതരോട് പറഞ്ഞു. ആദ്യം വിശ്വാസം വരാതിരുന്ന ഗ്രെഗ്, മൊബൈൽ ആപ്പ് വഴി വീണ്ടും പരിശോധിച്ചപ്പോഴാണ് 80 എന്ന അക്കത്തിന് പിന്നിലെ പൂജ്യങ്ങളും കോമകളും ശ്രദ്ധിച്ചത്. 80 മില്യൺ ഡോളറാണ് തങ്ങൾ നേടിയതെന്ന് ഉറപ്പിച്ച നിമിഷം ജീവിതത്തിലെ ഏറ്റവും അവിശ്വസനീയമായ ഒന്നായിരുന്നുവെന്ന് അദ്ദേഹം ഓർത്തെടുത്തു.
ഗ്രെഗിന്റെ ഭാര്യ വിളിച്ചു പറയുമ്പോഴാണ് ക്രിസ് ഈ വലിയ വാർത്ത അറിയുന്നത്. “ആദ്യം എനിക്ക് വിശ്വസിക്കാനായില്ല. ഉടൻ തന്നെ ഞാൻ ഗ്രെഗിന്റെ വീട്ടിലെത്തി ടിക്കറ്റ് വീണ്ടും പരിശോധിക്കുകയും അദ്ദേഹത്തിന് കൈകൊടുക്കുകയും ചെയ്തു,” ക്രിസ് പറഞ്ഞു. ഗ്രെഗാണ് എപ്പോഴും ലോട്ടറി സ്റ്റോറിൽ പോയി ടിക്കറ്റുകൾ വാങ്ങിയിരുന്നത്. മെച്ചപ്പെട്ട ജീവിതസാഹചര്യങ്ങൾ തേടി കാനഡയിലെത്തിയ ഈ കുടുംബങ്ങൾക്ക് ഇനി ആശ്വാസത്തിന്റെയും സമൃദ്ധിയുടെയും നാളുകളാണ്.
നിലവിൽ ഈ വൻതുക തങ്ങളുടെയും കുടുംബത്തിന്റെയും ഭാവി സുരക്ഷിതമാക്കാൻ ഉപയോഗിക്കാനാണ് ഈ സുഹൃത്തുക്കളുടെ തീരുമാനം. ഒന്റാറിയോ ലോട്ടറി ആൻഡ് ഗെയിമിംഗ് കോർപ്പറേഷൻ (OLG) ഔദ്യോഗികമായി വിജയികളെ സ്ഥിരീകരിച്ച് സമ്മാനത്തുക കൈമാറി. കാനഡയിലെ ലണ്ടൻ നഗരത്തിൽ നിന്ന് ഇത്രയും വലിയൊരു തുക ലോട്ടറി അടിക്കുന്നത് ഇതാദ്യമായാണ്.
These are the lucky people who shocked Canada; Immigrant friends win $80 million lottery jackpot
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
