ടൊറന്റോ: തടവുകാർക്ക് സുരക്ഷയൊരുക്കേണ്ട ജയിൽ ഉദ്യോഗസ്ഥൻ തന്നെ നിയമം ലംഘിച്ച് ലഹരിമരുന്നും ആയുധങ്ങളും ജയിലിനുള്ളിലേക്ക് കടത്തിയ സംഭവത്തിൽ കോടതി കർശന നടപടി സ്വീകരിച്ചു. ടൊറന്റോ സൗത്ത് ഡിറ്റൻഷൻ സെന്ററിലെ (TSDC) ഗാർഡായിരുന്ന യാതു സത്യകാന്തനെയാണ് (Yathu Sathiyakanthan) 26 മാസത്തെ തടവുശിക്ഷയ്ക്ക് വിധിച്ചത്. കൃത്യവിലോപം, ലഹരിമരുന്ന് കടത്ത്, മാരകായുധങ്ങൾ കൈവശം വെക്കൽ എന്നീ കുറ്റങ്ങൾ ഇയാൾ കോടതിയിൽ സമ്മതിച്ചു.
2024 ഒക്ടോബറിൽ ഒരു തടവുകാരന്റെ സെല്ലിൽ നടത്തിയ പരിശോധനയിലാണ് കുറ്റകൃത്യത്തിന്റെ ചുരുളഴിയുന്നത്. പിങ്ക് നിറത്തിലുള്ള ഒരു സോക്സിനുള്ളിൽ ഒളിപ്പിച്ച നിലയിൽ മരിജുവാനയും പുകയിലയും കണ്ടെത്തിയിരുന്നു. തുടർന്ന് നടത്തിയ വിശദമായ പരിശോധനയിൽ സഹതടവുകാരന്റെ പക്കൽ നിന്നും ഹാഷിഷ്, എംഡിഎംഎ (MDMA), മിനി സെൽഫോൺ എന്നിവയടങ്ങിയ മറ്റൊരു പാക്കറ്റും ലഭിച്ചു. ഈ സാധനങ്ങൾ ജയിലിനുള്ളിലെത്തിച്ചത് സത്യകാന്തനാണെന്ന് അന്വേഷണത്തിൽ വ്യക്തമാവുകയായിരുന്നു.
ജയിൽ വളപ്പിലെ സുരക്ഷാ പരിശോധനകളും മെറ്റൽ ഡിറ്റക്ടറുകളും വെട്ടിക്കാനായി ലോഹമല്ലാത്ത സെറാമിക് ബ്ലേഡുകളാണ് പ്രതി ഉപയോഗിച്ചിരുന്നത്. തന്റെ ഔദ്യോഗിക ജാക്കറ്റിലും സ്വന്തം വാഹനത്തിലുമായി ഒളിപ്പിച്ച നിലയിൽ ഫോണുകളും ഓപ്പിയോയിഡ് വിഭാഗത്തിൽപ്പെട്ട മാരക മരുന്നുകളും പോലീസ് കണ്ടെടുത്തു. ഓരോ തവണ സാധനങ്ങൾ എത്തിക്കുമ്പോഴും വൻതുക പ്രതി കൈപ്പറ്റിയിരുന്നതായും ഇതിനോടകം മൂന്ന് തവണ ഇത്തരത്തിൽ ലഹരി കടത്തിയിട്ടുണ്ടെന്നും കോടതി കണ്ടെത്തി. 15,000 ഡോളറോളം ഇയാൾക്ക് പ്രതിഫലമായി ലഭിച്ചിരുന്നു.
താൻ ചെയ്തത് തെറ്റാണെന്നും ചിന്താശൂന്യമായ പ്രവൃത്തിയാണെന്നും സത്യകാന്തൻ കോടതിയിൽ ബോധിപ്പിച്ചു. എന്നാൽ, വിശ്വസ്തതയോടെ ജോലി ചെയ്യേണ്ട ഉദ്യോഗസ്ഥൻ തന്നെ ജയിലിനുള്ളിലെ അന്തരീക്ഷം അപകടത്തിലാക്കിയെന്ന് ജസ്റ്റിസ് ഹഫീസ് അമർഷി നിരീക്ഷിച്ചു. 26 മാസത്തെ തടവുശിക്ഷ ലഭിച്ചതോടെ തന്റെ ആദ്യ കുഞ്ഞിന്റെ ജനനസമയത്ത് സത്യകാന്തന് ജയിലിൽ കഴിയേണ്ടി വരും. മുൻപ് കുറ്റകൃത്യങ്ങളിൽ ഏർപ്പെട്ടിട്ടില്ലാത്ത വ്യക്തിയായതിനാൽ ഇയാൾക്ക് മാനസാന്തരത്തിന് അവസരമുണ്ടെന്നും കോടതി വിധിയിൽ പരാമർശിച്ചു.
ജയിലുകളിൽ ലഹരിമരുന്ന് കടത്തുന്ന സംഭവങ്ങൾ കാനഡയിൽ വർധിച്ചു വരികയാണെന്ന് റിപ്പോർട്ടുകൾ സൂചിപ്പിക്കുന്നു. ഡ്രോണുകൾ വഴിയും ശരീരത്തിനുള്ളിൽ ഒളിപ്പിച്ചുമാണ് പലപ്പോഴും ലഹരിവസ്തുക്കൾ ജയിലിനുള്ളിലെത്തുന്നത്. 2014 മുതൽ 2021 വരെയുള്ള കണക്കുകൾ പ്രകാരം ജയിലുകളിൽ സംഭവിക്കുന്ന മരണങ്ങളിൽ 40 ശതമാനവും ലഹരിമരുന്നിന്റെ അമിത ഉപയോഗം മൂലമാണെന്നാണ് വിദഗ്ധ സമിതിയുടെ കണ്ടെത്തൽ. സുരക്ഷാ ക്രമീകരണങ്ങൾ കർശനമാക്കുന്നതിന്റെ ഭാഗമായി ഒന്റാരിയോയിലെ ജയിലുകളിൽ 6,000 പുതിയ ബെഡുകൾ കൂടി സജ്ജമാക്കാൻ സർക്കാർ പദ്ധതിയിടുന്നുണ്ട്.
Toronto prison guard sentenced to 26 months for bringing drugs and weapons into prison
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
