ഒട്ടാവ: ഇറാൻ സംഘർഷത്തെത്തുടർന്ന് ആഗോള വിപണിയിലുണ്ടായ എണ്ണവില വർധനവ് കാനഡയുടെ സമ്പദ്വ്യവസ്ഥയെ കടുത്ത പ്രതിസന്ധിയിലാക്കുന്നു. മാർച്ചിലെ കണക്കുകൾ പ്രകാരം കാനഡയിലെ പണപ്പെരുപ്പ നിരക്ക് 2.4 ശതമാനമായി കുതിച്ചുയർന്നു. ഫെബ്രുവരിയിൽ 1.8 ശതമാനമായിരുന്ന നിരക്കാണ് ഒറ്റമാസം കൊണ്ട് വലിയ വർധനവ് രേഖപ്പെടുത്തിയത്.
ഇറാൻ യുദ്ധം സൃഷ്ടിച്ച എണ്ണ പ്രതിസന്ധിയിൽ കാനഡയിലെ ഇന്ധനവിലയിൽ ഒറ്റ മാസത്തിനിടെ 21.2 ശതമാനത്തിന്റെ വർധനവാണ് ഉണ്ടായത്. സ്റ്റാറ്റിസ്റ്റിക്സ് കാനഡയുടെ കണക്കുകൾ പ്രകാരം ചരിത്രത്തിലെ ഏറ്റവും ഉയർന്ന പ്രതിമാസ വർധനവാണിത്. ഹോർമുസ് കടലിടുക്കിലെ തടസ്സങ്ങളും വിതരണ ശൃംഖലയിലെ ആശങ്കകളും ക്രൂഡ് ഓയിൽ വിപണിയെ വല്ലാതെ ഉലച്ചു കളഞ്ഞു. യുദ്ധത്തിന് മുൻപ് ബാരലിന് 70 ഡോളറിലായിരുന്ന എണ്ണവില സംഘർഷം കടുത്തതോടെ 119 ഡോളർ വരെ ഉയരുകയും നിലവിൽ 96 ഡോളറിനടുത്ത് തുടരുകയുമാണ്.
ഇന്ധനവില കുതിച്ചുയരുന്നുണ്ടെങ്കിലും മറ്റ് നിത്യോപയോഗ സാധനങ്ങളുടെ വില നിലവിൽ നിയന്ത്രണവിധേയമാണ് എന്നത് മാത്രമാണ് ഏക ആശ്വാസം. പണപ്പെരുപ്പത്തിൽ നിന്നും ഊർജ്ജ മേഖലയെ മാറ്റിനിർത്തിയാൽ നിരക്ക് 1.9 ശതമാനമായി കുറഞ്ഞതായി കാണാം. എങ്കിലും എണ്ണവിലയിലെ ഈ അസ്ഥിരത ബാങ്ക് ഓഫ് കാനഡയുടെ സാമ്പത്തിക നയങ്ങളെ വരും ദിവസങ്ങളിൽ കൂടുതൽ സങ്കീർണ്ണമാക്കാൻ സാധ്യതയുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Fuel prices in Canada hit all-time record; inflation rises to 2.4 percent
