ഒട്ടാവ: കാനഡയിൽ താൽക്കാലിക വിസയിൽ ജോലി ചെയ്യുന്നവർക്ക് സ്ഥിരതാമസം ഉറപ്പാക്കുന്ന പുതിയ ‘TR to PR’ പാതയിൽ വൻ നിയന്ത്രണങ്ങൾ പ്രഖ്യാപിച്ച് ഇമിഗ്രേഷൻ മന്ത്രി ലിന ദിയാബ്. രാജ്യത്തെ പ്രമുഖ നഗരങ്ങളായ ടൊറന്റോ, വാൻകൂവർ, മോൺട്രിയൽ എന്നിവയുൾപ്പെടെയുള്ള സെൻസസ് മെട്രോപൊളിറ്റൻ ഏരിയകളിൽ (CMA) താമസിക്കുന്നവർക്ക് ഈ പുതിയ പദ്ധതി പ്രകാരം സ്ഥിരതാമസത്തിന് അപേക്ഷിക്കാൻ സാധിക്കില്ലെന്ന് മന്ത്രി വ്യക്തമാക്കി. ഗ്രാമപ്രദേശങ്ങളിലെ വികസനവും അവിടങ്ങളിലെ തൊഴിൽ മേഖല ശക്തിപ്പെടുത്തുന്നതിനും മുൻഗണന നൽകുന്നതിന്റെ ഭാഗമായാണ് ഈ കടുത്ത തീരുമാനം.
കാനഡയിലെ ജനസംഖ്യയുടെ 84 ശതമാനത്തോളം താമസിക്കുന്ന 41 പ്രധാന നഗര മേഖലകളെയാണ് സി.എം.എ പട്ടികയിൽ ഉൾപ്പെടുത്തിയിരിക്കുന്നത്. കാൽഗറി, എഡ്മന്റൺ, ഹാലിഫാക്സ്, വിന്നിപെഗ് തുടങ്ങിയ പ്രധാന നഗരങ്ങളെല്ലാം ഈ പട്ടികയിലുള്ളതിനാൽ അവിടങ്ങളിൽ ജോലി ചെയ്യുന്ന ആയിരക്കണക്കിന് വിദേശ തൊഴിലാളികൾക്ക് ഈ പദ്ധതിയുടെ ആനുകൂല്യം ലഭിക്കില്ല. 2026, 2027 വർഷങ്ങളിലായി 33,000 പേർക്ക് സ്ഥിരതാമസം നൽകാനാണ് സർക്കാർ ലക്ഷ്യമിടുന്നത്. നഗരങ്ങൾക്ക് പുറത്തുള്ള ഉൾനാടൻ ഗ്രാമപ്രദേശങ്ങളിൽ ജോലി ചെയ്യുന്നവർക്ക് മാത്രമായിരിക്കും ഈ അവസരം പ്രയോജനപ്പെടുക.
പദ്ധതിയുടെ കൂടുതൽ വിശദാംശങ്ങളും അപേക്ഷിക്കാനുള്ള കൃത്യമായ മാനദണ്ഡങ്ങളും വരും ആഴ്ചകളിൽ ഇമിഗ്രേഷൻ വകുപ്പ് പുറത്തുവിടുമെന്ന് മന്ത്രി അറിയിച്ചിട്ടുണ്ട്. നേരത്തെ മാർച്ച് മാസത്തിൽ പദ്ധതിയുടെ ലോഞ്ച് പ്രഖ്യാപിച്ചിരുന്നെങ്കിലും കൂടുതൽ വ്യക്തത വരുത്തിയിരുന്നില്ല. കാനഡയിലെ നഗരങ്ങളിൽ ജോലി ചെയ്യുന്ന താൽക്കാലിക വിസക്കാർക്ക് പുതിയ പ്രഖ്യാപനം വലിയ തിരിച്ചടിയാണ് നൽകിയിരിക്കുന്നത്.
Major Canadian cities excluded from new TR to PR pathway, minister says
