ഒട്ടാവ: കാനഡയിൽ വീടുതോറുമുള്ള താപൽ വിതരണം അവസാനിപ്പിക്കാനുള്ള കാനഡ പോസ്റ്റിന്റെ തീരുമാനം മുതിർന്ന പൗരന്മാരുടെ ജീവിതത്തെ പ്രതികൂലമായി ബാധിക്കുമെന്ന് മുന്നറിയിപ്പ്. സാമ്പത്തിക ലാഭം ലക്ഷ്യമിട്ട് നടപ്പിലാക്കുന്ന പുതിയ ‘കമ്മ്യൂണിറ്റി മെയിൽബോക്സ്’ പദ്ധതി, ചലനപരിമിതിയുള്ളവരെയും ഒറ്റപ്പെട്ടുകഴിയുന്നവരെയും കൂടുതൽ ദുരിതത്തിലാക്കുമെന്ന് സാമൂഹിക പ്രവർത്തകരും നിയമവിദഗ്ധരും ചൂണ്ടിക്കാട്ടുന്നു.
ഡിജിറ്റലൈസേഷൻ വർധിച്ചതോടെ കത്തുകളുടെ എണ്ണത്തിലുണ്ടായ കുറവും തപാൽ വകുപ്പിനുണ്ടായ വൻ സാമ്പത്തിക നഷ്ടവുമാണ് ഇത്തരമൊരു മാറ്റത്തിന് അധികൃതരെ പ്രേരിപ്പിച്ചത്. പുതിയ പദ്ധതിയനുസരിച്ച് വീടുകളിൽ നേരിട്ട് കത്തുകൾ എത്തിക്കുന്നതിന് പകരം, നിശ്ചിത കേന്ദ്രങ്ങളിലെ പൊതു മെയിൽബോക്സുകളിൽ കത്തുകൾ നിക്ഷേപിക്കും. തപാൽ വകുപ്പിന്റെ ഈ നീക്കം വരും വർഷങ്ങളിൽ ഘട്ടംഘട്ടമായി നടപ്പിലാക്കാനാണ് തീരുമാനം. ഇതിന്റെ ഭാഗമായി ആദ്യഘട്ടത്തിൽ ഒട്ടാവ, വിന്നിപെഗ് തുടങ്ങി 13 മേഖലകളിലെ ഒരു ലക്ഷത്തിലധികം വിലാസങ്ങൾ പുതിയ സംവിധാനത്തിലേക്ക് മാറും.
മഞ്ഞുകാലത്ത് റോഡുകളിലും മറ്റും ഐസ് നിറയുന്നതിനാൽ, ദൂരെയുള്ള മെയിൽബോക്സുകളിലേക്ക് നടന്നുപോയി കത്തുകൾ ശേഖരിക്കുന്നത് പ്രായമായവർക്ക് വീഴ്ചയോ അപകടമോ ഉണ്ടാക്കാൻ സാധ്യതയുണ്ടെന്ന് മുതിർന്ന പൗരന്മാരുടെ സംഘടനയായ ‘കാർപ്പ്’ (CARP) മുന്നറിയിപ്പ് നൽകുന്നു. വീടിന്റെ വാതിൽക്കൽ കത്തുകൾ നേരിട്ട് ലഭിക്കുന്നത് പ്രായമായവർക്ക് മറ്റുള്ളവരുമായി ബന്ധപ്പെടാനുള്ള ഒരു വഴി കൂടിയായിരുന്നു. ശാരീരിക ബുദ്ധിമുട്ടുള്ളവർക്ക് പ്രത്യേക സഹായം നൽകുമെന്ന് കാനഡ പോസ്റ്റ് പറയുന്നുണ്ടെങ്കിലും, അത് എത്രത്തോളം പ്രായോഗികമാകുമെന്ന കാര്യത്തിൽ ജനങ്ങൾക്ക് ഇപ്പോഴും ആശങ്കയുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada Post prepares for change: Letters will now be sent to community mailboxes; senior citizens concerned
