വാൻകൂവർ: ബാങ്ക് ഉദ്യോഗസ്ഥരെന്നും പോലീസ് ഉദ്യോഗസ്ഥരെന്നും വ്യാജേന ഫോണിലൂടെ ബന്ധപ്പെട്ട് പൊതുജനങ്ങളിൽ നിന്ന് വൻതോതിൽ പണം തട്ടിയെടുക്കുന്ന സംഘത്തിനെതിരെ വാൻകൂവർ പോലീസ് ഡിപ്പാർട്ട്മെന്റ് (VPD) ജാഗ്രതാ നിർദ്ദേശം നൽകി. കഴിഞ്ഞ ദിവസങ്ങളിൽ നടന്ന വിവിധ തട്ടിപ്പുകളിലായി ഏകദേശം 10,000 ഡോളറിലധികം തുക ജനങ്ങൾക്ക് നഷ്ടമായതായാണ് ഔദ്യോഗിക റിപ്പോർട്ട്.
ബാങ്ക് ജീവനക്കാരൻ എന്ന നിലയിൽ ഇരകളെ വിളിക്കുന്ന തട്ടിപ്പുകാർ അക്കൗണ്ടിൽ സംശയാസ്പദമായ ഇടപാടുകൾ നടക്കുന്നുണ്ടെന്ന് വിശ്വസിപ്പിച്ചാണ് ചതിക്കുഴി ഒരുക്കുന്നത്. തുടർന്ന് വാൻകൂവർ പോലീസ് ഡിപ്പാർട്ട്മെന്റിൽ നിന്നാണെന്ന് തോന്നിപ്പിക്കുന്ന വിധം പോലീസ് ഓഫീസർ എന്ന വ്യാജേന മറ്റൊരു കോൾ വരികയും ബാങ്കുമായി സഹകരിക്കാൻ നിർദ്ദേശിക്കുകയും ചെയ്യുന്നു. ഇരയുടെ അക്കൗണ്ടിലേക്ക് പണം നിക്ഷേപിച്ചുവെന്ന് വ്യാജമായി അറിയിച്ച ശേഷം ആ തുകയ്ക്ക് തുല്യമായ ബിറ്റ്കോയിൻ വാങ്ങി തങ്ങൾക്ക് അയച്ചുതരാൻ ആവശ്യപ്പെട്ടാണ് ഇവർ പണം തട്ടുന്നത്.
ഒരു പോലീസ് ഉദ്യോഗസ്ഥനും ഒരിക്കലും അപരിചിതർക്ക് പണമോ ബിറ്റ്കോയിനോ അയക്കാൻ ആവശ്യപ്പെടില്ലെന്ന് വക്താവ് കോൺസ്റ്റബിൾ മേഗൻ ലൂയി അറിയിച്ചു. ബാങ്കുകൾ ഇത്തരം അന്വേഷണങ്ങൾക്കായി ഒരിക്കലും ഇടപാടുകാരെ വിളിക്കാറില്ലെന്നും ഇത്തരത്തിലുള്ള കോളുകൾ ലഭിച്ചാൽ ഉടൻ ഫോൺ കട്ട് ചെയ്ത് ബാങ്കുമായി നേരിട്ട് ബന്ധപ്പെടണമെന്നും പോലീസ് നിർദ്ദേശിച്ചു. തട്ടിപ്പിന് ഇരയായവർ എത്രയും വേഗം 604-717-3321 എന്ന നമ്പറിൽ പോലീസിനെ വിവരമറിയിക്കേണ്ടതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Victims lost $10K to bitcoin scam involving fake police officers, VPD warns
