സ്റ്റോക്ക്ഹോം: ആധുനിക സാങ്കേതിക വിദ്യയുടെ അതിപ്രസരം കുട്ടികളുടെ പഠന നിലവാരത്തെ ബാധിക്കുന്നു എന്ന വിലയിരുത്തലിനെത്തുടർന്ന് വിദ്യാലയങ്ങളിൽ പഴയ പഠനരീതി തിരികെ കൊണ്ടുവരാൻ ഒരുങ്ങുകയാണ് സ്വീഡിഷ് സർക്കാർ. ലാപ്ടോപ്പുകൾക്കും ഓൺലൈൻ പ്ലാറ്റ്ഫോമുകൾക്കും പകരം പാഠപുസ്തകങ്ങൾക്കും എഴുത്തുപരീക്ഷകൾക്കും പ്രാധാന്യം നൽകുന്നതാണ് പുതിയ നയം.
ദശകങ്ങളായി തുടർന്നുപോന്ന ഡിജിറ്റൽ വിദ്യാഭ്യാസ രീതികൾക്ക് വിട നൽകി അക്ഷരങ്ങളുമായും പുസ്തകങ്ങളുമായും കുട്ടികളെ നേരിട്ട് ബന്ധിപ്പിക്കാനാണ് അധികൃതരുടെ തീരുമാനം. 2022-ൽ അധികാരത്തിൽ വന്ന നിലവിലെ സർക്കാർ, വിദ്യാഭ്യാസ ഗവേഷകരുമായും അധ്യാപക സംഘടനകളുമായും നടത്തിയ വിശദമായ ചർച്ചകൾക്ക് ശേഷമാണ് ഈ നിർണ്ണായക മാറ്റം പ്രഖ്യാപിച്ചത്. പ്രീ-സ്കൂളുകളിൽ ഡിജിറ്റൽ ഉപകരണങ്ങൾ ഉപയോഗിക്കണമെന്ന നിബന്ധന നേരത്തെ തന്നെ ഒഴിവാക്കിയിരുന്നു. ഈ വർഷം അവസാനത്തോടെ വിദ്യാഭ്യാസ ആവശ്യങ്ങൾക്കായി പോലും സ്കൂളുകളിൽ മൊബൈൽ ഫോണുകൾ ഉപയോഗിക്കുന്നത് പൂർണ്ണമായും നിരോധിക്കും.
പഠന നിലവാരത്തിലുണ്ടായ ഇടിവാണ് ഇത്തരമൊരു മാറ്റത്തിന് സർക്കാരിനെ പ്രേരിപ്പിച്ചത്. രാജ്യാന്തര തലത്തിലുള്ള വിദ്യാഭ്യാസ റാങ്കിംഗുകളിൽ സ്വീഡന്റെ സ്കോർ ഗണ്യമായി കുറഞ്ഞത് ഗൗരവകരമായ സാഹചര്യമുണ്ടാക്കി. പാഠഭാഗങ്ങൾ പുസ്തകങ്ങളിലൂടെ പഠിക്കുന്നത് കുട്ടികളുടെ ശ്രദ്ധ വർദ്ധിപ്പിക്കുമെന്നും വായന, എഴുത്ത് തുടങ്ങിയ അടിസ്ഥാന കഴിവുകൾ വികസിപ്പിക്കാൻ ഇത് അത്യാവശ്യമാണെന്നും സ്വീഡിഷ് വിദ്യാഭ്യാസ വകുപ്പ് വ്യക്തമാക്കുന്നു.
പുതിയ മാറ്റത്തിന്റെ ഭാഗമായി പാഠപുസ്തകങ്ങൾക്കും അധ്യാപകർക്കുള്ള കൈപ്പുസ്തകങ്ങൾക്കുമായി 200 മില്യൺ ഡോളർ ഗ്രാന്റ് അനുവദിച്ചിട്ടുണ്ട്. പുസ്തകങ്ങളെ അടിസ്ഥാനമാക്കിയുള്ള പുതിയ പാഠ്യപദ്ധതി 2028-ഓടെ പൂർണ്ണമായും നിലവിൽ വരും. എന്നാൽ, സർക്കാരിന്റെ ഈ നീക്കത്തിനെതിരെ സാങ്കേതിക വിദഗ്ധർക്കിടയിൽ നിന്നും കമ്പ്യൂട്ടർ ശാസ്ത്രജ്ഞർക്കിടയിൽ നിന്നും വിമർശനങ്ങളും ഉയരുന്നുണ്ട്. ഡിജിറ്റൽ ലോകത്ത് നിന്ന് കുട്ടികളെ മാറ്റിനിർത്തുന്നത് അവരുടെ തൊഴിലവസരങ്ങളെ ബാധിക്കുമെന്നാണ് ഇവരുടെ വാദം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Goodbye to digital learning; Sweden now back to the old curriculum
