കാൽഗറി: കാൽഗറിയിൽ നിന്ന് കാണാതായ എൺപത്തിരണ്ടുകാരിയെ കണ്ടെത്താൻ പൊതുജനങ്ങളുടെ സഹായം തേടി കുടുംബാംഗങ്ങൾ. ഏപ്രിൽ ആറിന് കാൽഗറിയിലെ എഡ്ജ്മോണ്ട് (Edgemont) പ്രദേശത്തെ വീട്ടിൽ നിന്നും ഡാൽമേഷ്യൻ നായയോടൊപ്പം പുറത്തുപോയ ഡയാൻ കൂപ്പറെയാണ് (Diane Cooper) കാണാതായത്.
ഡിമൻഷ്യ (മറവിരോഗം) ബാധിച്ച ഡയാൻ, തന്റെ വളർത്തുനായ ഹാലോയോടൊപ്പം ഗ്രേ നിറത്തിലുള്ള ടൊയോട്ട കാറിലാണ് വീട്ടിൽ നിന്ന് പോയത്. കാറിലെ എയർടാഗ് ലൊക്കേഷൻ പരിശോധിച്ചപ്പോൾ ലഭിച്ച വിവരമനുസരിച്ച് ഇവർ നഗരത്തിന് പുറത്തേക്ക് പോയതായി കൊച്ചുമകൾ സോയ് വ്യക്തമാക്കി. സ്റ്റെട്ട്ലറിലെ (Stettler) ഒരു പെട്രോൾ പമ്പിലെ സിസിടിവി ദൃശ്യങ്ങളിൽ ഡയാൻ ഇന്ധനം നിറയ്ക്കുന്നതായി കണ്ടെത്തിയിട്ടുണ്ട്. അവിടെ നിന്ന് തിരികെ കാൽഗറിയിലേക്കുള്ള വഴി ഇവർ ചോദിച്ചതായും സംശയിക്കുന്നു.
പിന്നീട് ഹന്ന (Hanna), വെറ്ററൻ (Veteran) എന്നിവിടങ്ങളിൽ എയർടാഗ് സിഗ്നലുകൾ കണ്ടതിനെ തുടർന്ന് റോയൽ കനേഡിയൻ മൗണ്ടഡ് പോലീസ് (RCMP) തിരച്ചിൽ ആരംഭിച്ചു. ഏപ്രിൽ ആറിന് വൈകുന്നേരത്തോടെ ഇവർ ഹൂസിയർ (Hoosier) എന്ന സ്ഥലത്ത് എത്തിയതായി പോലീസ് സ്ഥിരീകരിച്ചിട്ടുണ്ട്. നിലവിൽ ആൽബർട്ട പ്രവിശ്യയിലും സമീപത്തെ സസ്കാച്ചവൻ (Saskatchewan) പ്രദേശങ്ങളിലും തിരച്ചിൽ തുടരുകയാണ്.
പതിവായി പോകാറുള്ള പാർക്കിലേക്ക് നായയെ നടത്താൻ പോയ ഡയാൻ വഴിതെറ്റി നഗരത്തിന് പുറത്തെത്തിയതാകാമെന്നാണ് കുടുംബത്തിന്റെ നിഗമനം. ഉറക്കക്കുറവും ക്ഷീണവും കാരണം വീട്ടിലേക്കുള്ള വഴി കണ്ടെത്താൻ പ്രയാസപ്പെടുന്നുണ്ടാകാമെന്നും, ആരെങ്കിലും ഇവരെ ശ്രദ്ധയിൽപ്പെട്ടാൽ ഉടൻ വിവരം അറിയിക്കണമെന്നും കൊച്ചുമകൾ സോയ് അഭ്യർത്ഥിച്ചു.
LVA 978 എന്ന ആൽബർട്ട ലൈസൻസ് പ്ലേറ്റുള്ള ടൊയോട്ട C-HR XLE കാറിലാണ് ഡയാൻ സഞ്ചരിക്കുന്നത്. ഇവരെക്കുറിച്ചോ വാഹനത്തെക്കുറിച്ചോ എന്തെങ്കിലും വിവരം ലഭിക്കുന്നവർ ഉടൻ തന്നെ അടുത്തുള്ള RCMP ഓഫീസുമായി ബന്ധപ്പെടണമെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Elderly woman with dementia goes missing in Calgary; family seeks public help
