ദുബായ്: അന്താരാഷ്ട്ര ക്രിക്കറ്റ് കൗൺസിലിന്റെ (ഐസിസി) മാർച്ച് മാസത്തിലെ മികച്ച പുരുഷ താരത്തിനുള്ള പുരസ്കാരം സ്വന്തമാക്കി മലയാളി ക്രിക്കറ്റ് താരം സഞ്ജു സാംസൺ. ട്വന്റി-20 ലോകകപ്പിൽ ഇന്ത്യ കിരീടം നിലനിർത്തിയപ്പോൾ സഞ്ജു നടത്തിയ മികച്ച ബാറ്റിംഗ് പ്രകടനമാണ് അദ്ദേഹത്തെ ഈ നേട്ടത്തിന് അർഹനാക്കിയത്. സഹതാരം ജസ്പ്രീത് ബുംറയെയും ദക്ഷിണാഫ്രിക്കയുടെ കോണർ എസ്റ്റർഹൂയിസനെയും പിന്തള്ളിയാണ് താരം ഈ അംഗീകാരം നേടിയത്.
ലോകകപ്പിന്റെ ആദ്യ ഘട്ടത്തിൽ പ്ലെയിങ് ഇലവനിൽ ഇല്ലാതിരുന്ന സഞ്ജു, സൂപ്പർ-8 ഘട്ടം മുതലാണ് ടീമിൽ ഇടംപിടിച്ചത്. തുടർന്ന് കളിച്ച അഞ്ച് മത്സരങ്ങളിൽ നിന്നായി 80.25 ശരാശരിയിൽ 321 റൺസ് താരം അടിച്ചുകൂട്ടി. വെസ്റ്റ് ഇൻഡീസിനെതിരായ നിർണ്ണായക മത്സരത്തിൽ പുറത്താകാതെ നേടിയ 97 റൺസും, സെമി ഫൈനലിലും ഫൈനലിലും നേടിയ 89 റൺസ് വീതവും ടൂർണമെന്റിലെ റൺസ് വേട്ടക്കാരിൽ സഞ്ജുവിനെ മൂന്നാം സ്ഥാനത്തെത്തിച്ചു. ഐപിഎല്ലിൽ ചെന്നൈ സൂപ്പർ കിംഗ്സിനെതിരെ നേടിയ സെഞ്ച്വറിയും പുരസ്കാര നിർണ്ണയത്തിൽ പരിഗണിക്കപ്പെട്ടു.
തന്റെ കരിയറിലെ ഏറ്റവും അവിസ്മരണീയമായ ഘട്ടത്തിലാണ് ഈ അംഗീകാരം ലഭിച്ചതെന്ന് പുരസ്കാര നേട്ടത്തിന് പിന്നാലെ സഞ്ജു സാംസൺ പ്രതികരിച്ചു. ലോകകപ്പിലെ വിജയത്തിന് പിന്നാലെ ഐസിസി പുരസ്കാരം കൂടി ലഭിച്ചത് ഇരട്ടി സന്തോഷം നൽകുന്നതായും അദ്ദേഹം കൂട്ടിച്ചേർത്തു. നിലവിൽ മികച്ച ഫോമിലുള്ള താരം വരും മത്സരങ്ങളിലും ഇന്ത്യക്കായി നിർണ്ണായക പങ്കുവഹിക്കുമെന്ന പ്രതീക്ഷയിലാണ് ക്രിക്കറ്റ് ലോകം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Who else but Chettan...Sanju Samson wins ICC Player of the Month award
