മയാമി: വിനോദയാത്രയ്ക്കിടെ ക്രൂയിസ് കപ്പലിൽ 18 വയസ്സുകാരി കൊല്ലപ്പെട്ട സംഭവത്തിൽ 16 വയസ്സുകാരനായ രണ്ടാനച്ഛന്റെ മകനെതിരെ കൊലക്കുറ്റം ചുമത്തി. ഫ്ലോറിഡ സ്വദേശിയായ അന്ന കെപ്നർ കൊല്ലപ്പെട്ട സംഭവത്തിലാണ് സഹോദരൻ തിമോത്തി ഹഡ്സണെതിരെ യുഎസ് നീതിന്യായ വകുപ്പ് നടപടി സ്വീകരിച്ചത്. അന്താരാഷ്ട്ര സമുദ്രപരിധിയിൽ വെച്ച് നടന്ന കൊലപാതകമായതിനാൽ അതീവ ഗൗരവത്തോടെയാണ് ഫെഡറൽ കോടതി കേസിനെ കാണുന്നത്.
പ്രതിക്ക് പ്രായപൂർത്തിയാകാത്തതിനാൽ രഹസ്യമായി സൂക്ഷിച്ചിരുന്ന കേസ് വിവരങ്ങൾ, ഇയാളെ മുതിർന്ന വ്യക്തിയായി പരിഗണിച്ച് വിചാരണ ചെയ്യാൻ കോടതി ഉത്തരവിട്ടതോടെയാണ് ഇപ്പോൾ പുറംലോകമറിഞ്ഞത്. കഴിഞ്ഞ നവംബറിൽ കാർണിവൽ ഹൊറൈസൺ (Carnival Horizon) എന്ന കപ്പലിലായിരുന്നു നാടിനെ നടുക്കിയ സംഭവം നടന്നത്. കുടുംബത്തോടൊപ്പം വിനോദയാത്രയ്ക്കെത്തിയതായിരുന്നു ഇരുവരും. കപ്പൽ ഫ്ലോറിഡയിൽ തിരിച്ചെത്തുന്നതിന് തൊട്ടുമുൻപ് അന്നയെ കാണാതാവുകയായിരുന്നു.
തുടർന്ന് നടത്തിയ തിരച്ചിലിൽ തിമോത്തി ഉൾപ്പെടെയുള്ള കൗമാരക്കാർ താമസിച്ചിരുന്ന മുറിയിലെ കട്ടിലിനടിയിൽ നിന്നാണ് അന്നയുടെ മൃതദേഹം കണ്ടെത്തിയത്. കഴുത്തിന് സമ്മർദ്ദമേറ്റതിനെ തുടർന്ന് ശ്വാസം മുട്ടിയാണ് മരണം സംഭവിച്ചതെന്ന് പോസ്റ്റ്മോർട്ടം റിപ്പോർട്ടിൽ വ്യക്തമാക്കുന്നു. ലൈംഗികാതിക്രമ ശ്രമത്തിനിടെയാണ് കൊലപാതകം നടന്നതെന്നാണ് അന്വേഷണ ഉദ്യോഗസ്ഥരുടെ കണ്ടെത്തൽ.
നിലവിൽ പ്രതിയായ തിമോത്തി ഹഡ്സൺ ജാമ്യത്തിൽ അമ്മാവന്റെ സംരക്ഷണയിലാണ് കഴിയുന്നത്. ഇയാൾക്ക് ഇലക്ട്രോണിക് മോണിറ്ററിംഗ് സംവിധാനം ഏർപ്പെടുത്തിയിട്ടുണ്ടെങ്കിലും, പ്രതിയെ കസ്റ്റഡിയിൽ വാങ്ങാത്തതിൽ പെൺകുട്ടിയുടെ പിതാവ് ക്രിസ്റ്റഫർ കെപ്നർ ആശങ്ക അറിയിച്ചു. നീതിന്യായ വ്യവസ്ഥയിൽ വിശ്വാസമുണ്ടെന്നും എന്നാൽ ഇത്രയും ഗുരുതരമായ കുറ്റം ചെയ്തിട്ടും പ്രതി സ്വതന്ത്രനായി നടക്കുന്നത് കുടുംബത്തിന് വലിയ വേദനയുണ്ടാക്കുന്നുവെന്നും അദ്ദേഹം പ്രസ്താവനയിൽ പറഞ്ഞു.
പ്രതി അപകടകാരിയാണെന്നും അതിനാൽ കസ്റ്റഡിയിൽ വേണമെന്നും പ്രോസിക്യൂഷൻ കോടതിയിൽ വീണ്ടും ആവശ്യപ്പെട്ടിട്ടുണ്ട്. ടൈറ്റസ്വില്ലിലെ ടെമ്പിൾ ക്രിസ്റ്റ്യൻ സ്കൂളിലെ ചിയർ ലീഡറായിരുന്നു കൊല്ലപ്പെട്ട അന്ന കെപ്നർ. ഊർജ്ജസ്വലയായ അന്നയുടെ വിയോഗം സ്കൂൾ അധികൃതരെയും സഹപാഠികളെയും വലിയ ദുഃഖത്തിലാഴ്ത്തിയിരുന്നു.
ഫെബ്രുവരിയിൽ കേസ് രജിസ്റ്റർ ചെയ്തിരുന്നെങ്കിലും പ്രതിയുടെ പ്രായം കണക്കിലെടുത്ത് രേഖകളെല്ലാം മുദ്രവെച്ച നിലയിലായിരുന്നു. എന്നാൽ കുറ്റകൃത്യത്തിന്റെ ക്രൂരത പരിഗണിച്ച് പ്രതിയെ മുതിർന്ന പൗരനായി തന്നെ വിചാരണ ചെയ്യാൻ ഡിസ്ട്രിക്റ്റ് ജഡ്ജി ബെത്ത് ബ്ലൂം ഉത്തരവിടുകയായിരുന്നു. അന്താരാഷ്ട്ര കപ്പൽ യാത്രയ്ക്കിടെ കുടുംബാംഗങ്ങളിൽ നിന്ന് തന്നെ ഇത്തരം ഒരു അതിക്രമം ഉണ്ടായത് ക്രൂയിസ് ടൂറിസം മേഖലയിലും ചർച്ചകൾക്ക് വഴിവെച്ചിട്ടുണ്ട്.
Sister's death on cruise ship murder: 16-year-old brother charged; Shocking details revealed
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
