ബ്രിട്ടീഷ് കൊളംബിയ: ബ്രിട്ടീഷ് കൊളംബിയയിലെ സാൽമൺ ആം സ്വദേശിയായ യുവതിക്കാണ് തട്ടിപ്പിലൂടെ പണം നഷ്ടമായത്. ഏകദേശം 11,900 ഡോളറാണ് ഇവർക്ക് നഷ്ടപ്പെട്ടത്. കാനഡ സർക്കാരിന്റെ ഔദ്യോഗിക പദവിയിലുള്ള “ഡെപ്യൂട്ടി ഇൻ ഒട്ടാവ” ആണെന്ന് പരിചയപ്പെടുത്തിയാണ് തട്ടിപ്പുകാർ യുവതിയെ ഫോണിൽ വിളിച്ചത്. യുവതിയുടെ പേരിൽ ആരോ ഐഡന്റിറ്റി തട്ടിപ്പ് നടത്തിയെന്നും അത് പരിഹരിക്കാൻ ഉടൻ നടപടി എടുക്കണമെന്നും അവർ ആവശ്യപ്പെട്ടു. താൻ തെറ്റൊന്നും ചെയ്തിട്ടില്ലെന്ന് യുവതി പറഞ്ഞപ്പോൾ, നിരപരാധിത്വം തെളിയിക്കാൻ ഒരു ക്രിപ്റ്റോകറൻസി വാലറ്റ് തുറക്കാനും അതിലേക്ക് ബിറ്റ്കോയിൻ എടിഎം വഴി പണം നിക്ഷേപിക്കാനും തട്ടിപ്പുകാർ നിർദ്ദേശിച്ചു. ഭയന്നുപോയ യുവതി ഈ നിർദ്ദേശങ്ങൾ പാലിച്ച് പണം കൈമാറിയതോടെയാണ് തട്ടിപ്പിന് ഇരയായത്.
സമാനമായ രീതിയിൽ മറ്റൊരു യുവാവിനെയും തട്ടിപ്പുകാർ വിളിച്ചിരുന്നു. “ഗവൺമെന്റ് ഓഫ് കാനഡ ക്രൗൺ അറ്റോർണി ഓഫീസ്” എന്ന നിലവിലില്ലാത്ത ഒരു ഓഫീസിന്റെ പേരുപറഞ്ഞാണ് ഇത്തവണ തട്ടിപ്പിന് ശ്രമിച്ചത്. ബ്ലോക്ക്ചെയിൻ സാങ്കേതികവിദ്യ ഉപയോഗിച്ച് ഐഡന്റിറ്റി വെരിഫൈ ചെയ്തില്ലെങ്കിൽ അറസ്റ്റ് ചെയ്യുമെന്നായിരുന്നു യുവാവിനു ലഭിച്ച ഇമെയിലിലെ ഭീഷണി. എന്നാൽ പണം കൈമാറുന്നതിന് മുൻപ് തന്നെ ഇയാൾ പോലീസിൽ വിവരമറിയിച്ചതിനാൽ വലിയൊരു സാമ്പത്തിക നഷ്ടം ഒഴിവാകുകയായിരുന്നു.
സംഭവത്തെത്തുടർന്ന് ആർ.സി.എം.പി ജനങ്ങൾക്ക് കർശന മുന്നറിയിപ്പ് നൽകിയിട്ടുണ്ട്. പണമോ വ്യക്തിഗത വിവരങ്ങളോ ആവശ്യപ്പെട്ട് വരുന്ന അപരിചിത സന്ദേശങ്ങൾ എപ്പോഴും ജാഗ്രതയോടെ കാണണം. സാധാരണയായി തട്ടിപ്പുകാർ ആളുകളെ ഭയപ്പെടുത്തി പെട്ടെന്ന് തീരുമാനമെടുപ്പിക്കാനാണ് ശ്രമിക്കുന്നത്. സർക്കാർ സ്ഥാപനങ്ങളോ ബാങ്കുകളോ ഒരിക്കലും ബിറ്റ്കോയിൻ രൂപത്തിലോ ഗിഫ്റ്റ് കാർഡ് രൂപത്തിലോ പണം ആവശ്യപ്പെടില്ലെന്ന് പോലീസ് ഓർമ്മിപ്പിച്ചു. സംശയാസ്പദമായ ഫോൺ കോളുകൾ ലഭിച്ചാൽ പണം നൽകുന്നതിന് മുൻപ് പ്രാദേശിക പോലീസുമായി ബന്ധപ്പെടണമെന്നും ഉദ്യോഗസ്ഥർ നിർദ്ദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Victim loses $11.9K to cryptocurrency scam, B.C. police warn
