നോർത്ത് ലാൻഡർ ട്രെയിൻ ഉടൻ ട്രാക്കിലേക്ക്; അവസാനഘട്ട ട്രയൽ റൺ ഒന്റാറിയോ പ്രീമിയർ ഉദ്ഘാടനം ചെയ്തു

ഒന്റാറിയോ: വടക്കൻ ഒന്റാറിയോയെയും തെക്കൻ മേഖലയെയും ബന്ധിപ്പിക്കുന്ന നോർത്ത് ലാൻഡർ പാസഞ്ചർ ട്രെയിൻ സർവീസ് പുനരാരംഭിക്കുന്നതിന്റെ ഭാഗമായുള്ള അവസാനഘട്ട ട്രയൽ റൺ ആരംഭിച്ചു. വ്യാഴാഴ്ച നോർത്ത് ബേയിൽ നടന്ന ചടങ്ങിൽ ഒന്റാറിയോ പ്രീമിയർ ഡഗ് ഫോർഡ് പരീക്ഷണയോട്ടത്തിന്റെ ഉദ്ഘാടനം നിർവ്വഹിച്ചു. മുൻ സർക്കാർ നിർത്തലാക്കിയ സർവീസ് 14 വർഷത്തിന് ശേഷമാണ് വീണ്ടും ട്രാക്കിലെത്തുന്നത്. കോക്രെയിൻ, ടിമ്മിൻസ് എന്നിവിടങ്ങളിൽ നിന്ന് ടൊറന്റോയിലെ യൂണിയൻ സ്റ്റേഷൻ വരെയുള്ള മുഴുവൻ റൂട്ടിലും അടുത്ത ഏതാനും മാസങ്ങൾ നീണ്ടുനിൽക്കുന്ന കർശനമായ പരിശോധനകൾ നടക്കുമെന്ന് പ്രവിശ്യാ സർക്കാർ അറിയിച്ചു.

ആദ്യഘട്ടത്തിൽ 1,600 കിലോമീറ്ററിലധികം ദൂരമാണ് ട്രെയിൻ ട്രയൽ റൺ നടത്തുന്നത്. ഈ കാലയളവിൽ ജീവനക്കാർക്ക് പരിശീലനം നൽകുന്നതിനൊപ്പം അടിയന്തര സാഹചര്യങ്ങൾ നേരിടാനുള്ള മോക്ക് ഡ്രില്ലുകൾ, ഷെഡ്യൂൾ പരിശോധനകൾ, സുരക്ഷാ സംവിധാനങ്ങളുടെ കാര്യക്ഷമത എന്നിവയും വിലയിരുത്തും. സാധാരണ സർവീസ് രീതിയിൽ സ്റ്റേഷനുകളിൽ നിർത്തിയും അറിയിപ്പുകൾ നൽകിയുമാണ് പരീക്ഷണങ്ങൾ ക്രമീകരിച്ചിരിക്കുന്നത്. രണ്ടാമത്തെ ട്രെയിൻ സെറ്റും ഒന്റാറിയോയിൽ എത്തിയിട്ടുണ്ടെന്നും വൈകാതെ ഇതിന്റെയും പരീക്ഷണയോട്ടം തുടങ്ങുമെന്നും അധികൃതർ വ്യക്തമാക്കി.

ട്രെയിൻ സർവീസ് പുനരാരംഭിക്കുമ്പോൾ ടൊറന്റോ മുതൽ ടിമ്മിൻസ്, കോക്രെയിൻ വരെ മുതിർന്നവർക്ക് 188 ഡോളറിലധികം യാത്രാക്കൂലി വരും. വിദ്യാർത്ഥികൾക്ക് 160 ഡോളറും കുട്ടികൾക്ക് 94 ഡോളറുമാണ് നിരക്ക് നിശ്ചയിച്ചിരിക്കുന്നത്. നിലവിലുള്ള ഒന്റാറിയോ നോർത്ത് ലാൻഡ് ബസ് സർവീസിനേക്കാൾ ഏകദേശം 10 ശതമാനം അധികമാണ് ട്രെയിൻ നിരക്ക്. ടിമ്മിൻസിനും ടൊറന്റോയ്ക്കും ഇടയിൽ 740 കിലോമീറ്റർ ദൂരത്തിൽ ആകെ 16 സ്റ്റോപ്പുകളാണ് ട്രെയിനിന് ഉണ്ടായിരിക്കുക. ചാർജിംഗ് പോർട്ടുകളും ആധുനിക ശുചിമുറികളും ഉൾപ്പെടെ 169 സീറ്റുകളാണ് ഓരോ ട്രെയിൻ സെറ്റിലുമുള്ളത്.
നോർത്ത് ലാൻഡർ സർവീസിന് പിന്തുണയായി നോർത്ത് ബേയ്ക്ക് വടക്കുള്ള റെയിൽ ഇൻഫ്രാസ്ട്രക്ചറിനായി പ്രവിശ്യാ സർക്കാർ 100 മില്യൺ ഡോളറിലധികം നിക്ഷേപിച്ചു.

ട്രെയിൻ സൗകര്യമില്ലാത്ത വിദൂര പ്രദേശങ്ങളിലെ യാത്രാസൗകര്യം മെച്ചപ്പെടുത്തുന്നതിനായി ‘നോർത്തേൺ റൈഡ് ഷെയർ ഫ്രെയിംവർക്ക്’ കൊണ്ടുവരുമെന്നും സർക്കാർ അറിയിച്ചു. ആരോഗ്യ സേവനങ്ങൾക്കും വിദ്യാഭ്യാസത്തിനും തൊഴിലിനും വടക്കൻ ഒന്റാറിയോയിലുള്ളവർക്ക് ഈ ട്രെയിൻ സർവീസ് വലിയ സഹായമാകുമെന്ന് ചടങ്ങിൽ സംസാരിച്ച എംപിപി വിക് ഫെഡേലി, ജോർജ് പിരി എന്നിവർ വിലയിരുത്തി. സർവീസ് ആരംഭിക്കുന്ന കൃത്യമായ തീയതി വരും മാസങ്ങളിൽ പ്രഖ്യാപിക്കും.

Northlander train to hit the track soon; Ontario Premier inaugurates final trial run

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt