കേരളം, അസം, പുതുച്ചേരി എന്നിവിടങ്ങളിൽ നിയമസഭാ തിരഞ്ഞെടുപ്പിന്റെ വോട്ടെടുപ്പ് പുരോഗമിക്കവെ, വോട്ടർമാരോട് റെക്കോർഡ് എണ്ണത്തിൽ ബൂത്തുകളിലെത്തി സമ്മതിദാനാവകാശം വിനിയോഗിക്കാൻ അഭ്യർത്ഥിച്ച് പ്രധാനമന്ത്രി നരേന്ദ്ര മോദി. ജനാധിപത്യത്തിന്റെ ഈ വലിയ ഉത്സവത്തിൽ യുവാക്കളും സ്ത്രീകളും ആവേശത്തോടെ പങ്കുചേരണമെന്ന് അദ്ദേഹം പ്രത്യേകമായി ആവശ്യപ്പെട്ടു. മലയാളം ഉൾപ്പെടെയുള്ള പ്രാദേശിക ഭാഷകളിലാണ് പ്രധാനമന്ത്രി ‘എക്സ്’ പ്ലാറ്റ്ഫോമിലൂടെ തന്റെ സന്ദേശം പങ്കുവെച്ചത്.
കേരള നിയമസഭാ തിരഞ്ഞെടുപ്പിൽ വോട്ടർമാരുടെ റെക്കോർഡ് പങ്കാളിത്തം സംസ്ഥാനത്തിന്റെ ജനാധിപത്യ ചൈതന്യത്തിന് കൂടുതൽ കരുത്തേകുമെന്ന് പ്രധാനമന്ത്രി കുറിച്ചു. പ്രത്യേകിച്ച് സംസ്ഥാനത്തെ യുവാക്കളോടും സ്ത്രീകളോടും വൻതോതിൽ മുന്നോട്ടുവന്ന് വോട്ട് രേഖപ്പെടുത്താൻ അദ്ദേഹം ആഹ്വാനം ചെയ്തു. അസമിലെയും പുതുച്ചേരിയിലെയും ജനങ്ങളോടും സമാനമായ രീതിയിൽ ജനാധിപത്യ പ്രക്രിയയിൽ പങ്കാളികളാകാൻ അദ്ദേഹം ആവശ്യപ്പെട്ടു. ഓരോ വോട്ടും നാടിന്റെ ഭാവി രൂപപ്പെടുത്തുന്നതിൽ നിർണ്ണായകമാണെന്നും മോദി ഓർമ്മിപ്പിച്ചു.
സംസ്ഥാനത്തിന്റെ വിധി നിർണ്ണയിക്കാൻ ശരിയായ വോട്ട് രേഖപ്പെടുത്തണമെന്ന് കേന്ദ്ര ആഭ്യന്തര മന്ത്രി അമിത് ഷായും കേരളത്തിലെ വോട്ടർമാരോട് അഭ്യർത്ഥിച്ചു. വികസനത്തിന്റെ പുതിയൊരു യുഗത്തിലേക്ക് കേരളത്തെ നയിക്കാൻ പ്രതിജ്ഞാബദ്ധമായ ഒരു സർക്കാരിനെ രൂപീകരിക്കാൻ അദ്ദേഹം ആഹ്വാനം ചെയ്തു. കേരളത്തിന്റെ മാനവവിഭവശേഷിയും പ്രകൃതിദത്തമായ നേട്ടങ്ങളും പൂർണ്ണമായി പ്രയോജനപ്പെടുത്തി ‘വികസിത കേരളം’ രൂപപ്പെടുത്താൻ ജനങ്ങളുടെ വോട്ട് കരുത്താകണമെന്ന് അദ്ദേഹം പറഞ്ഞു.
അസമിലെ 126 സീറ്റുകളിലേക്കും കേരളത്തിലെ 140 സീറ്റുകളിലേക്കും പുതുച്ചേരിയിലെ 30 മണ്ഡലങ്ങളിലേക്കുമാണ് ഇന്ന് വോട്ടെടുപ്പ് നടക്കുന്നത്. ദേശീയ നേതാക്കളുടെ ആഹ്വാനം വോട്ടിംഗ് ശതമാനം വർദ്ധിപ്പിക്കുമെന്ന പ്രതീക്ഷയിലാണ് എൻഡിഎ ക്യാമ്പ്. വോട്ടെടുപ്പ് ആരംഭിച്ച് ആദ്യ മണിക്കൂറുകൾ പിന്നിടുമ്പോൾ തന്നെ എല്ലാ മണ്ഡലങ്ങളിലും വോട്ടർമാരുടെ സജീവമായ പങ്കാളിത്തമാണ് ദൃശ്യമാകുന്നത്. മെയ് നാലിനാണ് തിരഞ്ഞെടുപ്പ് ഫലം പുറത്തുവരുന്നത്.
Ensure record participation in elections; PM and Amit Shah urge people to vote
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
