കണ്ണൂർ: വികസന നേട്ടങ്ങളെച്ചൊല്ലി കേരള-തെലങ്കാന മുഖ്യമന്ത്രിമാർ തമ്മിലുള്ള വാക്പോര് പുതിയ തലത്തിലേക്ക്. തെലങ്കാന മുഖ്യമന്ത്രി രേവന്ത് റെഡ്ഡിക്കെതിരെ അത്യന്തം ഗൗരവമേറിയ ഭാഷയിലാണ് മുഖ്യമന്ത്രി പിണറായി വിജയൻ പ്രതികരിച്ചത്. കണ്ണൂർ പ്രസ് ക്ലബ്ബ് സംഘടിപ്പിച്ച ‘ജനവിധി 2026: മീറ്റ് ദ ലീഡർ’ പരിപാടിയിൽ സംസാരിക്കവെയായിരുന്നു മുഖ്യമന്ത്രിയുടെ കടുത്ത പരാമർശം.
തനിക്കെതിരെ രേവന്ത് റെഡ്ഡി നടത്തിയ വ്യക്തിപരമായ അധിക്ഷേപങ്ങൾ മാധ്യമപ്രവർത്തകർ ശ്രദ്ധയിൽപ്പെടുത്തിയപ്പോഴാണ് പിണറായി വിജയൻ മറുപടി നൽകിയത്. “മറുപടി വരുന്നുണ്ട് എന്ന് മാത്രമേ ഇപ്പോൾ പറയുന്നുള്ളൂ” എന്ന് വ്യക്തമാക്കിയ മുഖ്യമന്ത്രി, ഒരു ഭരണാധികാരി പാലിക്കേണ്ട മര്യാദകളെക്കുറിച്ചും ഓർമ്മിപ്പിച്ചു. രേവന്ത് റെഡ്ഡി കേരളത്തിൽ ഉന്നയിച്ച കാര്യങ്ങൾക്ക് തക്കതായ മറുപടി നൽകുമെന്നും അദ്ദേഹം കൂട്ടിച്ചേർത്തു.
നേരത്തെ മുഖ്യമന്ത്രി പിണറായി വിജയൻ എക്സ് (ട്വിറ്റർ) പ്ലാറ്റ്ഫോമിലൂടെ ഉന്നയിച്ച ആരോപണങ്ങൾക്ക് മറുപടിയായി രേവന്ത് റെഡ്ഡി കത്തയച്ചിരുന്നു. ഈ കത്തിലെ പരാമർശങ്ങളാണ് നിലവിലെ തർക്കം രൂക്ഷമാക്കിയത്. സിനിമയിലെ ഡയലോഗിനെ അനുസ്മരിപ്പിക്കും വിധം ‘നീ പോ മോനെ വിജയാ’ എന്ന കുറിപ്പോടെയാണ് രേവന്ത് റെഡ്ഡി തന്റെ കത്ത് അവസാനിപ്പിച്ചത്. മുഖ്യമന്ത്രി സ്ഥാനത്തിരിക്കുന്ന ഒരാളിൽ നിന്ന് ഉണ്ടാകേണ്ട ഇടപെടലാണോ ഇതൊക്കെയെന്ന് അദ്ദേഹം സ്വയം ചിന്തിക്കട്ടെയെന്നും പിണറായി വിജയൻ വാർത്താസമ്മേളനത്തിൽ പറഞ്ഞു.
കേരളത്തിന്റെ വികസന മാതൃകകളെ ചൊല്ലി കഴിഞ്ഞ കുറച്ചു ദിവസങ്ങളായി ഇരു മുഖ്യമന്ത്രിമാരും തമ്മിൽ സാമൂഹിക മാധ്യമങ്ങളിലൂടെയും മറ്റും വിമർശനങ്ങൾ ഉന്നയിക്കുന്നുണ്ട്. രേവന്ത് റെഡ്ഡി ഉന്നയിച്ച ആരോപണങ്ങൾ വസ്തുതകൾക്ക് നിരക്കാത്തതാണെന്ന് നേരത്തെ തന്നെ സി.പി.എം നേതൃത്വം വ്യക്തമാക്കിയിരുന്നു. എന്നാൽ തർക്കം വ്യക്തിപരമായ അധിക്ഷേപങ്ങളിലേക്ക് കടന്നതോടെ വരും ദിവസങ്ങളിൽ ഇരു സംസ്ഥാനങ്ങളിലെയും രാഷ്ട്രീയ അന്തരീക്ഷം കൂടുതൽ ചൂടുപിടിക്കുമെന്ന് ഉറപ്പായി. മുഖ്യമന്ത്രിയുടെ പുതിയ പ്രസ്താവനയോടെ ഈ വാക്പോര് എങ്ങോട്ട് തിരിയുമെന്നാണ് രാഷ്ട്രീയ കേരളം ഉറ്റുനോക്കുന്നത്.
‘Dash mon Revanth’s reply is coming’; Chief Minister lashes out at Revanth Reddy; War of words intensifies in Kannur
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
