ഹൂസ്റ്റൺ: നാസയുടെ ആർട്ടെമിസ് II ദൗത്യത്തിന്റെ ഭാഗമായി ചന്ദ്രനെ വലംവെക്കുന്ന ബഹിരാകാശ യാത്രികർ ഭൂമിയിൽ നിന്നുള്ള ഏറ്റവും കൂടിയ ദൂരമെന്ന അപ്പോളോ 13ന്റെ റെക്കോർഡ് മറികടക്കാൻ ഒരുങ്ങുന്നു. കഴിഞ്ഞ ആഴ്ച വിക്ഷേപിച്ച ഈ ദൗത്യം 1972-ന് ശേഷം മനുഷ്യർ നടത്തുന്ന ആദ്യ ചന്ദ്രയാത്രയാണെന്ന പ്രത്യേകതയുമുണ്ട്. മൂന്ന് അമേരിക്കക്കാരും ഒരു കനേഡിയനും ഉൾപ്പെടുന്ന സംഘം തിങ്കളാഴ്ച ചന്ദ്രനെ ചുറ്റി പറന്ന ശേഷം ഭൂമിയിലേക്ക് മടക്കയാത്ര ആരംഭിക്കും.
ഏകദേശം ആറ് മണിക്കൂർ നീളുന്ന ഈ ചന്ദ്ര ഫ്ലൈബൈയിലൂടെ ഇതുവരെ മനുഷ്യർക്ക് കാണാൻ കഴിയാത്ത ചന്ദ്രന്റെ മറുഭാഗത്തെ അപൂർവ്വ ദൃശ്യങ്ങൾ പകർത്താൻ സാധിക്കും. ഭൂമിയിൽ നിന്ന് ഏകദേശം 4,00,171 കിലോമീറ്റർ ദൂരം സഞ്ചരിച്ച അപ്പോളോ 13 ദൗത്യത്തേക്കാൾ 6,400 കിലോമീറ്റർ അധികം ദൂരം ആർട്ടെമിസ് II പിന്നിടും. ദൗത്യത്തിനിടെ ചന്ദ്രൻ സൂര്യനെ മറയ്ക്കുന്ന പൂർണ്ണ സൂര്യഗ്രഹണം ബഹിരാകാശത്ത് വെച്ച് നേരിട്ട് കാണാൻ സാധിക്കുമെന്നത് ഈ യാത്രയുടെ മറ്റൊരു പ്രത്യേകതയാണ്.
ചന്ദ്രന്റെ പിന്നിലെത്തുമ്പോൾ ഏകദേശം 40 മിനിറ്റോളം ഭൂമിയിലെ മിഷൻ കൺട്രോളുമായി ബന്ധം വിച്ഛേദിക്കപ്പെടുമെങ്കിലും മുൻകൂട്ടി നിശ്ചയിച്ച പാതയിലൂടെ പേടകം സുരക്ഷിതമായി മുന്നോട്ട് നീങ്ങുമെന്ന് ഫ്ലൈറ്റ് ഡയറക്ടർ ജഡ് ഫ്രൈലിംഗ് വ്യക്തമാക്കി. ശാസ്ത്രീയ പഠനങ്ങൾക്കും നിരീക്ഷണങ്ങൾക്കും ശേഷം ഏപ്രിൽ 10-ന് പസഫിക് സമുദ്രത്തിൽ പേടകം തിരിച്ചിറക്കും. ഭാവിയിൽ ചന്ദ്രനിൽ സ്ഥിരമായ വാസസ്ഥലങ്ങളും പര്യവേക്ഷണ കേന്ദ്രങ്ങളും സ്ഥാപിക്കുന്നതിനുള്ള നാസയുടെ സുപ്രധാന ചുവടുവെപ്പായാണ് ഈ ദൗത്യം വിലയിരുത്തപ്പെടുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Artemis II nears the moon; Moon orbits human-scented again after half a century
