വിക്ടോറിയ: ബ്രിട്ടീഷ് കൊളംബിയയിൽ ഇന്ധനവില കുതിച്ചുയരുന്ന സാഹചര്യത്തിൽ സർക്കാർ ജീവനക്കാർക്ക് പൂർണ്ണസമയ ‘വർക്ക് ഫ്രം ഹോം’ സൗകര്യം അനുവദിക്കണമെന്ന് ആവശ്യപ്പെട്ട് ബി.സി. ജനറൽ എംപ്ലോയീസ് യൂണിയൻ രംഗത്തെത്തി. ഇറാൻ യുദ്ധത്തെത്തുടർന്ന് രാജ്യാന്തര വിപണിയിലുണ്ടായ മാറ്റങ്ങളാണ് പെട്രോൾ, ഡീസൽ വില വർദ്ധനവിന് കാരണമായിരിക്കുന്നത്. ഇത് ജീവനക്കാരുടെ സാമ്പത്തിക നിലയെ സാരമായി ബാധിക്കുന്നുവെന്നും യാത്രാച്ചെലവ് താങ്ങാനാവുന്നതിലും അധികമാണെന്നും 95,000 അംഗങ്ങളുള്ള യൂണിയൻ ചൂണ്ടിക്കാട്ടി.
ഓഫീസുകളിൽ വരാതെ വീട്ടിലിരുന്ന് ജോലി ചെയ്യാൻ താൽക്കാലിക അനുമതി നൽകുന്നതിലൂടെ ജീവനക്കാരുടെ സാമ്പത്തിക ബാധ്യത കുറയ്ക്കാൻ സാധിക്കുമെന്ന് യൂണിയൻ പ്രസിഡന്റ് പോൾ ഫിഞ്ച് പറഞ്ഞു. ജോലി സംബന്ധമായി ദൂരസ്ഥലങ്ങളിലേക്ക് യാത്ര ചെയ്യേണ്ടി വരുന്നവർക്കും പൊതുഗതാഗതം ഉപയോഗിക്കാൻ കഴിയാത്തവർക്കും പ്രത്യേക ഇളവുകളോ ധനസഹായമോ നൽകണമെന്നും സംഘടന ആവശ്യപ്പെട്ടു. കൂടാതെ കൂടുതൽ പേർ വീട്ടിലിരുന്ന് ജോലി ചെയ്യുന്നത് റോഡിലെ തിരക്ക് കുറയ്ക്കാനും പരിസ്ഥിതി മലിനീകരണം നിയന്ത്രിക്കാനും സഹായിക്കുമെന്നും അദ്ദേഹം കൂട്ടിച്ചേർത്തു.
ഈ ആവശ്യത്തോട് പ്രതികരിച്ച ബി.സി. ധനകാര്യ മന്ത്രാലയം നിലവിൽ തന്നെ സർക്കാരിന് ഫ്ലെക്സിബിൾ വർക്ക് നയം ഉണ്ടെന്ന് വ്യക്തമാക്കി. ജനുവരിയിലെ കണക്കനുസരിച്ച് ഏകദേശം 70 ശതമാനം സർക്കാർ ജീവനക്കാരും നിലവിൽ ടെലി വർക്ക് സൗകര്യം ഉപയോഗിക്കുന്നുണ്ട്. ഓരോ വകുപ്പിന്റെയും പ്രവർത്തന സാഹചര്യത്തിനനുസരിച്ച് ജീവനക്കാർക്ക് വീട്ടിലിരുന്ന് ജോലി ചെയ്യാൻ അനുമതി നൽകാൻ വകുപ്പ് മേധാവികൾക്ക് അധികാരമുണ്ടെന്നും സർക്കാർ അറിയിച്ചു. ഗ്യാസ് ബഡി നൽകുന്ന വിവരങ്ങൾ പ്രകാരം ഫെബ്രുവരി അവസാനം ലിറ്ററിന് 130 സെന്റ് ആയിരുന്ന ഇന്ധനവില ഈ ആഴ്ച 173 സെന്റ് ആയാണ് വർദ്ധിച്ചത്. പെട്ടെന്നുണ്ടായ ഈ വർദ്ധനവ് സാധാരണക്കാരായ ജീവനക്കാരുടെ കുടുംബ ബജറ്റിനെ താളം തെറ്റിച്ചിരിക്കുകയാണ്. കനേഡിയൻ അസോസിയേഷൻ ഓഫ് പ്രൊഫഷണൽ എംപ്ലോയീസും സമാനമായ ആവശ്യം സർക്കാരിന് മുന്നിൽ വെച്ചിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
B.C. union calls for full-time work-from-home due to spiking gas prices
