ലാഭരഹിത സൂപ്പർമാർക്കറ്റുകൾ തുടങ്ങാൻ ടൊറൻ്റോ സിറ്റി കൗൺസിൽ; പദ്ധതിയിൽ ആശങ്ക പ്രകടിപ്പിച്ച് വിദഗ്ധർ

ടൊറൻ്റോ: കുറഞ്ഞ നിരക്കിൽ അവശ്യസാധനങ്ങൾ ലഭ്യമാക്കുന്നതിനായി നഗരസഭ നേരിട്ട് സൂപ്പർമാർക്കറ്റുകൾ നടത്തുന്ന വിപ്ലവകരമായ പദ്ധതിക്ക് ടൊറൻ്റോ സിറ്റി കൗൺസിൽ അംഗീകാരം നൽകി. ഡൗൺ ടൗൺ ടൊറൻ്റോ, നോർത്ത് യോർക്ക്, സ്കാർബറോ, എറ്റോബിക്കോ എന്നിവിടങ്ങളിലായി നാല് ലാഭരഹിത സ്റ്റോറുകൾ തുടങ്ങാനാണ് പൈലറ്റ് പ്രോജക്റ്റിലൂടെ ലക്ഷ്യമിടുന്നത്. നിലവിൽ സ്വകാര്യ ഗ്രോസറി ശൃംഖലകൾ കുറവായതും കുറഞ്ഞ വരുമാനക്കാർ താമസിക്കുന്നതുമായ ‘ഫുഡ് ഡെസേർട്ട്’ മേഖലകളിലാകും ഈ സ്റ്റോറുകൾ സ്ഥാപിക്കുകയെന്ന് അധികൃതർ വ്യക്തമാക്കി.

നഗരസഭയുടെ നീക്കത്തെ സ്വാഗതം ചെയ്യുമ്പോഴും പദ്ധതിയുടെ പ്രായോഗികതയിൽ സാമ്പത്തിക വിദഗ്ധർ സംശയം പ്രകടിപ്പിക്കുന്നുണ്ട്. സൂപ്പർമാർക്കറ്റ് മേഖലയിൽ ലാഭവിഹിതം വളരെ കുറവാണെന്നും വൻകിട കമ്പനികളോട് മത്സരിക്കാൻ നഗരസഭയ്ക്ക് മതിയായ പരിചയസമ്പത്തോ വിതരണ ശൃംഖലയോ ഇല്ലെന്നും ഡെയ്‌ലി ബ്രെഡ് ഫുഡ് ബാങ്ക് സിഇഒ നീൽ ഹെതറിംഗ്ടൺ ചൂണ്ടിക്കാട്ടി. ഉൽപ്പന്നങ്ങളുടെ വിലയുടെ 70 ശതമാനം ഉത്പാദന ചെലവാണെന്നും ബാക്കി തുക ശമ്പളത്തിനും മറ്റ് ചെലവുകൾക്കുമായി മാറ്റിവെക്കേണ്ടി വരുമെന്നും ഇതിനാൽ ലാഭരഹിത മാതൃക വെല്ലുവിളിയാണെന്നും ഡൽഹൗസി സർവകലാശാലയിലെ ഗവേഷകൻ സിൽവെയിൻ ചാർലെബോയിസ് വിലയിരുത്തി.

നഗരസഭയുടെ ഉടമസ്ഥതയിലുള്ള സ്റ്റോറുകൾക്ക് പ്രോപ്പർട്ടി ടാക്സും ഡെവലപ്‌മെൻ്റ് ചാർജുകളും ഒഴിവാക്കി നൽകുമെന്നും ആ ലാഭം ഉപഭോക്താക്കൾക്ക് കൈമാറുമെന്നും പ്രമേയം അവതരിപ്പിച്ച കൗൺസിലർ ആന്റണി പെറൂസ അറിയിച്ചു. ഒട്ടാവ ഉൾപ്പെടെയുള്ള മറ്റ് കനേഡിയൻ നഗരങ്ങളും ടൊറൻ്റോയുടെ ഈ നീക്കത്തെ നിരീക്ഷിച്ചു വരികയാണ്. എന്നാൽ വാൻകൂവർ പോലുള്ള നഗരങ്ങളിൽ സമാനമായ നിർദ്ദേശം കൗൺസിൽ തള്ളുകയാണുണ്ടായത്. നഗരസഭകൾ ഇത്തരം ബിസിനസ്സുകളിലേക്ക് നേരിട്ട് ഇറങ്ങുന്നതിന് പകരം നിലവിലുള്ള സ്വതന്ത്ര വിതരണക്കാരെ സഹായിക്കുകയാണ് വേണ്ടതെന്നാണ് വാൻകൂവർ സിറ്റി കൗൺസിലർമാരുടെ നിലപാട്.

https://yfalanguageacademy.com

പദ്ധതിയുടെ സാമ്പത്തിക ആഘാതത്തെക്കുറിച്ചും പ്രവർത്തന രീതിയെക്കുറിച്ചും വിശദമായ റിപ്പോർട്ട് സമർപ്പിക്കാൻ സിറ്റി ഉദ്യോഗസ്ഥർക്ക് ഒരു വർഷത്തെ സമയം അനുവദിച്ചിട്ടുണ്ട്. നിലവിൽ നഗരസഭയുടെ ബജറ്റിൽ ഈ പദ്ധതിക്കായി തുകയൊന്നും നീക്കിവെച്ചിട്ടില്ലെന്ന് റിപ്പോർട്ടുകൾ വ്യക്തമാക്കുന്നു. ന്യൂയോർക്ക് പോലുള്ള നഗരങ്ങളിൽ ഇത്തരം ലാഭരഹിത ഗ്രോസറി സ്റ്റോറുകൾക്ക് പ്രചാരം ലഭിക്കുന്നുണ്ടെങ്കിലും കാനഡയിലെ വിപണി സാഹചര്യത്തിൽ ഇത് എത്രത്തോളം വിജയകരമാകുമെന്നാണ് ഉറ്റുനോക്കപ്പെടുന്നത്.

Toronto City Council to launch non-profit supermarkets; experts express concerns over plan

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt