ക്യുബെക്ക്: ക്യുബെക്കിലെ വിവാദപരമായ ബിൽ 21 നിയമവുമായി ബന്ധപ്പെട്ട അപ്പീൽ ഹർജികളിൽ കാനഡ സുപ്രീം കോടതിയിൽ വാദം തുടരുന്നു. ഭരണഘടനയിലെ ‘നോട്ട്വിഥ്സ്റ്റാൻഡിംഗ് ക്ലോസ്’ ഉപയോഗിച്ച് പ്രവിശ്യാ സർക്കാരുകൾക്ക് പൗരന്മാരുടെ അടിസ്ഥാനാവകാശങ്ങൾ പരിമിതപ്പെടുത്താൻ സാധിക്കുമോ എന്ന വിഷയത്തിലാണ് ചീഫ് ജസ്റ്റിസ് റിച്ചാർഡ് വാഗ്നറുടെ നേതൃത്വത്തിലുള്ള ബെഞ്ച് വാദം കേൾക്കുന്നത്. പൊതുമേഖലാ ജീവനക്കാർ ജോലിസ്ഥലത്ത് മതപ്രതീകങ്ങൾ ഉപയോഗിക്കുന്നത് വിലക്കുന്ന ഈ നിയമം ജനാധിപത്യ മൂല്യങ്ങൾക്ക് വിരുദ്ധമാണെന്ന് വിവിധ മനുഷ്യാവകാശ സംഘടനകളും അഭിഭാഷകരും കോടതിയിൽ ചൂണ്ടിക്കാട്ടി.
ഭരണഘടനാ വ്യവസ്ഥകൾ ദുരുപയോഗം ചെയ്യപ്പെട്ടാൽ കാനഡയിൽ ഭാവിയിൽ സ്വേച്ഛാധിപത്യ സ്വഭാവമുള്ള നേതാക്കൾ ഉയർന്നുവരാൻ സാധ്യതയുണ്ടെന്ന് എഫ്.എ.ഇ അധ്യാപക യൂണിയന് വേണ്ടി ഹാജരായ അഭിഭാഷകൻ ഫ്രെഡറിക് ബെറാർഡ് മുന്നറിയിപ്പ് നൽകി. അമേരിക്കയിലെ രാഷ്ട്രീയ സാഹചര്യങ്ങളെ മുൻനിർത്തി ‘മിനി ട്രംപ്’ പരാമർശം നടത്തിയ അദ്ദേഹം, ന്യൂനപക്ഷങ്ങളുടെ അവകാശങ്ങൾ സംരക്ഷിക്കാൻ കോടതി ഇടപെടണമെന്ന് ആവശ്യപ്പെട്ടു. എന്നാൽ ജനാധിപത്യ പ്രക്രിയയിൽ വിശ്വാസമർപ്പിക്കണമെന്നായിരുന്നു ക്യുബെക്ക് അറ്റോർണി ജനറലിന്റെ അഭിഭാഷകയുടെ മറുപടി. കേസിനിടെ വിവിധ സമൂഹങ്ങളുടെ വൈവിധ്യത്തെക്കുറിച്ച് ഉയർന്ന പരാമർശങ്ങളിൽ കോടതി അതൃപ്തി രേഖപ്പെടുത്തുകയും ചെയ്തു.
നിയമപരമായ സാങ്കേതികതകൾക്കപ്പുറം സാധാരണക്കാരായ മനുഷ്യരുടെ ജീവിതത്തെ ഈ നിയമം എങ്ങനെ ബാധിക്കുന്നുവെന്ന് മറക്കരുതെന്ന് കനേഡിയൻ കൗൺസിൽ ഓഫ് മുസ്ലിം വുമൺ പ്രതിനിധികൾ കോടതിയെ ഓർമ്മിപ്പിച്ചു. ഹിജാബ് ധരിക്കുന്ന മുസ്ലിം സ്ത്രീകൾ തൊഴിലിടങ്ങളിൽ വിവേചനവും വെറുപ്പും നേരിടുന്നുണ്ടെന്നും നിയമം നിലവിൽ വന്നതോടെ പലർക്കും തൊഴിലിടങ്ങളിൽ ഹാജരാകാൻ പോലും കഴിയാത്ത സാഹചര്യമാണെന്നും ചിലർ ചൂണ്ടിക്കാട്ടി. മതനിരപേക്ഷതയുടെ അർത്ഥത്തെച്ചൊല്ലി വലിയ തർക്കങ്ങളാണ് കോടതിയിൽ നടന്നത്. കേസിലെ വിധി വരാൻ മാസങ്ങൾ എടുത്തേക്കുമെങ്കിലും കാനഡയുടെ ജനാധിപത്യ ഭാവിയിൽ ഈ തീരുമാനം നിർണ്ണായകമാകും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Bill 21: Arguments continue in the Supreme Court of Canada; Democratic values under discussion
