ഒട്ടാവ: അമേരിക്കയുമായുള്ള വ്യാപാര ചർച്ചകളിൽ കീസ്റ്റോൺ എക്സ്.എൽ (Keystone XL) പൈപ്പ്ലൈൻ പദ്ധതി കാനഡയുടെ ശക്തമായ പ്രതിരോധ ആയുധമാണെന്ന് ലിബറൽ എം.പി. കോറി ഹോഗൻ. ചൊവ്വാഴ്ച സി.ടി.വി പവർ പ്ലേ പരിപാടിയിൽ നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. നിലവിൽ അമേരിക്കയുമായി തുടരുന്ന വ്യാപാര തർക്കങ്ങളിലും ഭാവി കരാറുകളിലും ഊർജ സുരക്ഷയുമായി ബന്ധപ്പെട്ട ഈ പദ്ധതി കാനഡയുടെ കൈവശമുള്ള പ്രധാന ‘കാർഡ്’ ആണെന്ന് അദ്ദേഹം കൂട്ടിച്ചേർത്തു.
അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഭരണകൂടം പൈപ്പ്ലൈൻ പദ്ധതി പുനരുജ്ജീവിപ്പിക്കാൻ കാനഡയുമായി സഹകരിക്കുന്നുണ്ടെന്ന റോയിട്ടേഴ്സ് റിപ്പോർട്ടുകൾക്കിടയിലാണ് ഹോഗന്റെ പ്രതികരണം. ഊർജ മന്ത്രി ടിം ഹോഡ്സന്റെ പാർലമെന്ററി സെക്രട്ടറി കൂടിയായ ഹോഗൻ, പദ്ധതിയുടെ ഔദ്യോഗിക സ്ഥിരീകരണത്തിന് തയ്യാറായില്ലെങ്കിലും പൈപ്പ്ലൈൻ നൽകുന്ന അവസരങ്ങൾ സർക്കാർ ഗൗരവമായി കാണുന്നുണ്ടെന്ന് സൂചിപ്പിച്ചു. അമേരിക്ക ഏർപ്പെടുത്തിയ ഇറക്കുമതി താരിഫ് കനേഡിയൻ വ്യവസായങ്ങളെ ബാധിച്ച പശ്ചാത്തലത്തിൽ, ചർച്ചകളിൽ ഊർജ മേഖലയെ ഒരു വിലപേശൽ ഉപാധിയായി ഉപയോഗിക്കാനാണ് കാനഡ ലക്ഷ്യമിടുന്നത്.
കാനഡയിൽ നിന്നുള്ള ക്രൂഡ് ഓയിൽ അമേരിക്കൻ ഗൾഫ് തീരത്തേക്ക് എത്തിക്കുന്ന വിപുലീകരണ പദ്ധതിയാണ് കീസ്റ്റോൺ എക്സ്.എൽ. 2021-ൽ ജോ ബൈഡൻ ഭരണകൂടം റദ്ദാക്കിയ ഈ പദ്ധതി യാഥാർത്ഥ്യമായാൽ കാനഡയിൽ നിന്നുള്ള എണ്ണ കയറ്റുമതിയിൽ 12 ശതമാനത്തിലധികം വർധനവുണ്ടാകും. കാനഡ-അമേരിക്ക-മെക്സിക്കോ വ്യാപാര കരാറിന്റെ (CUSMA) പുനപരിശോധന ഈ വർഷം നടക്കാനിരിക്കെ, ഊർജ ബന്ധം ശക്തിപ്പെടുത്തുന്നത് കാനഡയ്ക്ക് ഗുണകരമാകുമെന്നാണ് വിലയിരുത്തൽ. നിലവിൽ ടെക്സാസിൽ നടക്കുന്ന സെറാവീക്ക് (CERAWeek) സമ്മേളനത്തിൽ കനേഡിയൻ ഊർജ മന്ത്രി ടിം ഹോഡ്സൺ അമേരിക്കൻ പ്രതിനിധികളുമായി ഇതുസംബന്ധിച്ച് ചർച്ചകൾ നടത്തിവരികയാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Keystone pipeline is Canada's diamond weapon in U.S. trade talks: Liberal MP
