ഒട്ടാവ: കാനഡയിലെ ടൂറിസം മേഖലയ്ക്ക് ഉണർവേകുന്നതിനായി ഫെഡറൽ സർക്കാർ പുതിയ ‘കാനഡ സ്ട്രോങ്ങ് പാസ്’ (Canada Strong Pass) പദ്ധതി പ്രഖ്യാപിച്ചു. 2026 ജൂൺ 19 മുതൽ സെപ്റ്റംബർ 7 വരെയുള്ള വേനൽക്കാലത്ത് രാജ്യത്തെ ദേശീയോദ്യാനങ്ങൾ, മ്യൂസിയങ്ങൾ, ട്രെയിൻ യാത്രകൾ എന്നിവയിൽ സന്ദർശകർക്ക് വൻ ഇളവുകളും സൗജന്യ പ്രവേശനവും ലഭ്യമാക്കുന്നതാണ് ഈ പദ്ധതിയെന്ന് കാനഡ സർക്കാർ അറിയിച്ചു.
ദേശീയോദ്യാനങ്ങളിൽ (Parks Canada) സൗജന്യ പ്രവേശനം അനുവദിക്കുന്നതിനൊപ്പം ക്യാമ്പിംഗിനും രാത്രി താമസത്തിനുമായി 25 ശതമാനം നിരക്കിളവും സർക്കാർ വാഗ്ദാനം ചെയ്യുന്നുണ്ട്. കാനഡയിലെ പ്രമുഖ ദേശീയ മ്യൂസിയങ്ങൾ, തിരഞ്ഞെടുത്ത പ്രാദേശിക ഗാലറികൾ എന്നിവിടങ്ങളിൽ ഈ കാലയളവിൽ കുറഞ്ഞ നിരക്കിലോ സൗജന്യമായോ പ്രവേശനം ലഭിക്കും. കുട്ടികൾക്കും യുവാക്കൾക്കും പ്രത്യേക ഇളവുകൾക്കായി ഓരോ സ്ഥാപനങ്ങളുടെയും ഔദ്യോഗിക വെബ്സൈറ്റുകൾ പരിശോധിക്കാവുന്നതാണ്. യാത്രക്കാർക്കായി വി.ഐ.എ റെയിലിലും (VIA Rail) ആകർഷകമായ ഓഫറുകൾ പ്രഖ്യാപിച്ചിട്ടുണ്ട്. 17 വയസ്സിൽ താഴെയുള്ള കുട്ടികൾക്ക് മുതിർന്നവർക്കൊപ്പം സൗജന്യമായി യാത്ര ചെയ്യാം. കൂടാതെ 18 മുതൽ 24 വയസ്സുവരെയുള്ളവർക്ക് കുറഞ്ഞ നിരക്കിൽ ടിക്കറ്റുകൾ ലഭ്യമാകും.
പ്രത്യേകിച്ച് ഒരു പാസ് വാങ്ങുകയോ രജിസ്റ്റർ ചെയ്യുകയോ ചെയ്യേണ്ടതില്ല. നിശ്ചിത വിനോദസഞ്ചാര കേന്ദ്രങ്ങളിൽ എത്തുമ്പോൾ തന്നെ സന്ദർശകർക്ക് ഈ ആനുകൂല്യങ്ങൾ നേരിട്ട് ലഭിക്കും. കൂടുതൽ വിനോദസഞ്ചാരികളെ ആകർഷിക്കുന്നതിലൂടെ പ്രാദേശിക ബിസിനസുകൾക്കും തൊഴിൽ മേഖലയ്ക്കും വലിയ വളർച്ചയുണ്ടാകുമെന്നാണ് അധികൃതരുടെ പ്രതീക്ഷ. മുൻ വർഷങ്ങളെ അപേക്ഷിച്ച് കുറഞ്ഞ ചെലവിൽ കാനഡ സന്ദർശിക്കാൻ ആഗ്രഹിക്കുന്നവർക്ക് ഈ പദ്ധതി വലിയ സഹായമാകും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Don't empty your pockets, let's smash Canada! 'Canada Strong Pass' announced; Huge discounts from June 19
