സ്മിത്ത്-കാർണി പൈപ്പ്‌ലൈൻ കരാർ: ആദ്യ സമയപരിധി പാലിക്കാനാവില്ലെന്ന് ആൽബർട്ട പ്രീമിയർ

ഒട്ടാവ : പ്രധാനമന്ത്രി മാർക്ക് കാർണിയും ആൽബർട്ട പ്രീമിയർ ഡാനിയേൽ സ്മിത്തും തമ്മിൽ ഒപ്പിട്ട ഊർജ്ജ-കാലാവസ്ഥാ കരാറിലെ ആദ്യ സമയപരിധികൾ പാലിക്കാനാവില്ലെന്ന് റിപ്പോർട്ട്. ഏപ്രിൽ 1-നകം പൂർത്തിയാക്കേണ്ട ലക്ഷ്യങ്ങളിൽ ചർച്ചകൾ തുടരുകയാണെന്ന് ഹൂസ്റ്റണിലെ അന്താരാഷ്ട്ര ഊർജ്ജ സമ്മേളനത്തിനിടെ ഡാനിയേൽ സ്മിത്ത് വ്യക്തമാക്കി. ആൽബർട്ടയിൽ നിന്ന് പടിഞ്ഞാറൻ തീരത്തേക്ക് പുതിയ കയറ്റുമതി പൈപ്പ്‌ലൈൻ നിർമ്മിക്കുന്നതടക്കമുള്ള സുപ്രധാന വിഷയങ്ങളിൽ ധാരണയിലെത്താൻ കൂടുതൽ സമയം ആവശ്യമാണെന്ന് സ്മിത്ത് അറിയിച്ചു.

കഴിഞ്ഞ നവംബറിലാണ് ആൽബർട്ടയ്ക്ക് ഫെഡറൽ പരിസ്ഥിതി നിയമങ്ങളിൽ ഇളവ് നൽകുന്നതിനും പുതിയ പൈപ്പ്‌ലൈനിന് രാഷ്ട്രീയ പിന്തുണ ഉറപ്പാക്കുന്നതിനുമായി ഇരു സർക്കാരുകളും ധാരണാപത്രത്തിൽ ഒപ്പിട്ടത്. മെഥെയ്ൻ നിയന്ത്രണം, കാർബൺ പ്രൈസിംഗ് ഇക്വിവാലൻസി കരാർ, പാത്ത്‌വേസ് കമ്പനികളുമായുള്ള ത്രികക്ഷി ധാരണാപത്രം എന്നിവയാണ് കരാറിലെ പ്രധാന ഘടകങ്ങൾ. ഇതിൽ മെഥെയ്ൻ നിയന്ത്രണം സംബന്ധിച്ച പ്രഖ്യാപനം ഉടൻ ഉണ്ടാകുമെങ്കിലും വ്യവസായ കാർബൺ നികുതി, കാർബൺ ക്യാപ്‌ചർ പദ്ധതികൾ എന്നിവയിൽ ഇപ്പോഴും തടസ്സങ്ങൾ നേരിടുന്നുണ്ട്.

അമേരിക്കൻ വിപണിയിലെ മത്സരം കണക്കിലെടുത്ത് കാർബൺ നികുതി വർദ്ധിപ്പിക്കുന്നത് തങ്ങളുടെ ബിസിനസ്സിനെ ബാധിക്കുമെന്ന് കനേഡിയൻ അസോസിയേഷൻ ഓഫ് പെട്രോളിയം പ്രൊഡ്യൂസേഴ്‌സ് ആശങ്ക പ്രകടിപ്പിച്ചു. അതേസമയം, ആൽബർട്ടയിലെ ഊർജ്ജ മേഖലയുടെ വളർച്ചയ്ക്ക് ഫെഡറൽ സർക്കാർ പ്രതിജ്ഞാബദ്ധമാണെന്ന് പ്രകൃതി വിഭവ വകുപ്പ് മന്ത്രി ടിം ഹോഡ്‌സൺ വ്യക്തമാക്കി.

തദ്ദേശീയ വിഭാഗങ്ങളുടെയും വ്യവസായ പങ്കാളികളുടെയും സഹകരണത്തോടെ ഊർജ്ജ ഗതാഗതം മെച്ചപ്പെടുത്താനാണ് സർക്കാർ ലക്ഷ്യമിടുന്നതെന്നും അദ്ദേഹം കൂട്ടിച്ചേർത്തു.
ബ്രിട്ടീഷ് കൊളംബിയയിലെ അഞ്ച് തുറമുഖങ്ങൾ കേന്ദ്രീകരിച്ചാണ് പുതിയ പൈപ്പ്‌ലൈൻ പദ്ധതിയുടെ ആലോചനകൾ നടക്കുന്നത്. നിലവിൽ സ്വകാര്യ കമ്പനികളൊന്നും പദ്ധതിയിൽ താല്പര്യം പ്രകടിപ്പിച്ചിട്ടില്ലെങ്കിലും വിദേശ നിക്ഷേപകരും സോവറിൻ വെൽത്ത് ഫണ്ടുകളും പൈപ്പ്‌ലൈനിൽ നിക്ഷേപം നടത്തുമെന്ന് പ്രീമിയർ സ്മിത്ത് പ്രത്യാശ പ്രകടിപ്പിച്ചു. വിദേശ കമ്പനികൾക്ക് 15 മുതൽ 30 ശതമാനം വരെ ഓഹരി പങ്കാളിത്തം നൽകാനാവുമെന്നും ഏഷ്യൻ, മിഡിൽ ഈസ്റ്റേൺ രാജ്യങ്ങളിൽ നിന്ന് നിക്ഷേപ താല്പര്യം പ്രതീക്ഷിക്കുന്നുണ്ടെന്നും അവർ അറിയിച്ചു.

Smith-Carney pipeline deal: Alberta premier says first deadline won’t be met

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt