ന്യൂയോർക്ക്: കാനഡയിൽ നിന്നും ന്യൂയോർക്കിലെ ലാഗ്വാർഡിയ വിമാനത്താവളത്തിൽ ലാൻഡിംഗിനിടെ എയർ കാനഡ വിമാനം അഗ്നിശമന സേനയുടെ ട്രക്കുമായി കൂട്ടിയിടിച്ച് വൻ അപകടം സംഭവിച്ചു. ഞായറാഴ്ച രാത്രിയുണ്ടായ ഈ നടുക്കുന്ന ദുരന്തത്തിൽ വിമാനത്തിലുണ്ടായിരുന്ന രണ്ട് പൈലറ്റുമാർ കൊല്ലപ്പെട്ടു. മോൺട്രിയലിൽ നിന്നുള്ള എയർ കാനഡ എക്സ്പ്രസ് ഫ്ലൈറ്റ് AC8646 ആണ് ലാൻഡിംഗിനിടെ റൺവേയിലുണ്ടായിരുന്ന ഫയർ ട്രക്കുമായി കൂട്ടിയിടിച്ചത്.
അപകടത്തിന് തൊട്ടുമുമ്പ് എയർ ട്രാഫിക് കൺട്രോളിൽ നിന്നുള്ള ഞെട്ടിക്കുന്ന ഓഡിയോ ദൃശ്യങ്ങൾ ഇപ്പോൾ പുറത്തുവന്നിട്ടുണ്ട്. ട്രക്കിന് റൺവേ കടക്കാൻ ആദ്യം അനുമതി നൽകിയെങ്കിലും വിമാനം ലാൻഡ് ചെയ്യുന്നത് കണ്ട് കൺട്രോളർ പരിഭ്രാന്തിയോടെ “Stop, Truck 1. Stop!” എന്ന് അലറുന്നത് ഓഡിയോയിൽ കേൾക്കാം. എന്നാൽ സെക്കൻഡുകൾക്കുള്ളിൽ വിമാനം ട്രക്കുമായി കൂട്ടിയിടിക്കുകയായിരുന്നു. മറ്റൊരു വിമാനത്തിലെ അടിയന്തര സാഹചര്യം നേരിടാൻ എത്തിയ ഫയർ ട്രക്ക് റൺവേ കുറുകെ കടന്നതാണ് ഈ വലിയ ദുരന്തത്തിന് വഴിവെച്ചത്.
വിമാനത്തിലുണ്ടായിരുന്ന 72 യാത്രക്കാരിലും 4 ജീവനക്കാരിലുമായി 41 പേരെ പരിക്കുകളോടെ ആശുപത്രിയിൽ പ്രവേശിപ്പിച്ചു. ഇതിൽ 9 പേരുടെ നില ഇപ്പോഴും ഗുരുതരമായി തുടരുകയാണ്. വിമാനം റൺവേ തൊട്ട ഉടനെ വലിയൊരു ശബ്ദത്തോടെ എന്തിലോ ഇടിച്ചതായും ഉള്ളിൽ വലിയ നിലവിളിയും ബഹളവുമായിരുന്നുവെന്നും രക്ഷപ്പെട്ട യാത്രക്കാർ വിവരിക്കുന്നു. വിമാനത്തിന്റെ മുൻഭാഗം പൂർണ്ണമായും തകർന്നതിനാൽ പൈലറ്റുമാരിൽ നിന്നും നിർദ്ദേശങ്ങളൊന്നും ലഭിച്ചിരുന്നില്ലെന്നും യാത്രക്കാർ സ്വയം എമർജൻസി എക്സിറ്റുകൾ തുറന്നാണ് പുറത്തിറങ്ങിയതെന്നും ദൃക്സാക്ഷികൾ പറഞ്ഞു.
അപകടത്തെത്തുടർന്ന് ലാഗ്വാർഡിയ വിമാനത്താവളം താൽക്കാലികമായി അടച്ചുപൂട്ടുകയും ടൊറന്റോയിൽ നിന്നും മോൺട്രിയലിൽ നിന്നുമുള്ള നിരവധി വിമാനങ്ങൾ റദ്ദാക്കുകയും ചെയ്തു. യുഎസ് നാഷണൽ ട്രാൻസ്പോർട്ടേഷൻ സേഫ്റ്റി ബോർഡും കനേഡിയൻ അധികൃതരും സംയുക്തമായി അപകടത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്. പൈലറ്റുമാരുടെ മരണത്തിൽ കനേഡിയൻ ഗതാഗത മന്ത്രിയും പ്രതിപക്ഷ നേതാവ് പിയറി പൊയിലീവറും അനുശോചനം രേഖപ്പെടുത്തി. യാത്രക്കാരുടെ ബന്ധുക്കൾക്ക് വിവരങ്ങൾ അറിയാനായി എയർ കാനഡ 1-800-961-7099 എന്ന ഹെൽപ്പ് ലൈൻ നമ്പർ പുറത്തിറക്കിയിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Air traffic control recording captures moments before fatal Air Canada crash
