തിരുവനന്തപുരം: സംസ്ഥാന നിയമസഭാ തെരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കാനുള്ള സമയം ഇന്ന് (മാർച്ച് 23) അവസാനിക്കും. പ്രതിപക്ഷ നേതാവ് വി.ഡി. സതീശൻ ഇന്ന് രാവിലെ 11 മണിയോടെ പറവൂർ അഡീഷണൽ തഹസിൽദാർക്ക് മുമ്പാകെ പത്രിക സമർപ്പിക്കും. മുന്നണി സ്ഥാനാർത്ഥികളിൽ പത്രിക സമർപ്പിക്കാൻ ബാക്കിയുള്ളവരും വിമതരും സ്വതന്ത്രരും ഉൾപ്പെടെയുള്ള മുഴുവൻ സ്ഥാനാർത്ഥികളും ഇന്ന് വൈകുന്നേരം 3 മണിക്കുള്ളിൽ പത്രികകൾ സമർപ്പിക്കേണ്ടതുണ്ട്.
വി.ഡി. സതീശൻ നേരിടുന്ന ഏഴാമത്തെ നിയമസഭാ തെരഞ്ഞെടുപ്പാണിത്. ഇത്തവണ പത്രികയ്ക്കൊപ്പം കെട്ടിവെക്കാനുള്ള തുക നൽകുന്നത് പ്ലാച്ചിമട സമരസമിതി നേതാക്കളാണെന്നത് ശ്രദ്ധേയമാണ്. അടുത്തിടെ പ്ലാച്ചിമട സന്ദർശിച്ച പ്രതിപക്ഷ നേതാവ് അവരുടെ സമരത്തിന് പൂർണ്ണ പിന്തുണ പ്രഖ്യാപിച്ചിരുന്നു. 1996-ൽ ആദ്യമായി പറവൂരിൽ മത്സരിച്ച സതീശൻ സി.പി.ഐയിലെ പി. രാജുവിനോട് പരാജയപ്പെട്ടെങ്കിലും, 2001-ൽ ഇതേ സ്ഥാനാർത്ഥിയെ പരാജയപ്പെടുത്തിക്കൊണ്ട് നിയമസഭയിലെത്തി. തുടർന്നുള്ള എല്ലാ തെരഞ്ഞെടുപ്പുകളിലും അദ്ദേഹം മണ്ഡലം നിലനിർത്തി.
നാളെ (മാർച്ച് 24) നാമനിർദ്ദേശ പത്രികകളുടെ സൂക്ഷ്മ പരിശോധന നടക്കും. പത്രിക പിൻവലിക്കാനുള്ള അവസാന തീയതി മാർച്ച് 26 ആണ്. ഏപ്രിൽ 9-നാണ് കേരളത്തിൽ വോട്ടെടുപ്പ് നടക്കുന്നത്. തെരഞ്ഞെടുപ്പിന് മുന്നോടിയായുള്ള പരസ്യപ്രചാരണത്തിന് ഇനി വെറും 15 ദിവസങ്ങൾ മാത്രമാണ് സ്ഥാനാർത്ഥികൾക്ക് മുന്നിലുള്ളത്. എല്ലാ മുന്നണികളും പ്രചാരണരംഗത്ത് ആവേശം കൂട്ടിക്കഴിഞ്ഞു. മെയ് 4-നാണ് വോട്ടെണ്ണൽ.
V.D. Satheesan to file nomination papers today; Deadline for filing nomination papers ends today
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
