ഒട്ടാവ: കാനഡയുടെ പൗരത്വ നിയമത്തിൽ വരുത്തിയ ചരിത്രപരമായ ഭേദഗതിക്ക് പിന്നാലെ പൗരത്വത്തിനായി അപേക്ഷിക്കുന്നവരുടെ എണ്ണത്തിൽ വൻ വർധനവ്. വിദേശത്ത് ജനിച്ചവരാണെങ്കിലും കനേഡിയൻ പൗരത്വമുള്ള മാതാപിതാക്കളുടെ തലമുറയിൽപ്പെട്ടവർക്ക് പൗരത്വം ഉറപ്പാക്കുന്ന ‘ബിൽ സി-3’ (An Act to Amend the Citizenship Act) നിയമം പാസായതാണ് ഈ മാറ്റത്തിന് വഴിയൊരുക്കിയത്. മുൻപ് നിലനിന്നിരുന്ന First-generation limit ഒഴിവാക്കിയതോടെ അമേരിക്കയുൾപ്പെടെയുള്ള രാജ്യങ്ങളിൽ നിന്ന് ആയിരക്കണക്കിന് ആളുകളാണ് ഇപ്പോൾ അപേക്ഷകളുമായി രംഗത്തെത്തുന്നത്.
നിയമഭേദഗതിയും പുതിയ മാറ്റങ്ങളും
2025 ഡിസംബർ 15-നാണ് കാനഡയിൽ പൗരത്വ നിയമ ഭേദഗതി ബിൽ പാസായത്. പഴയ നിയമപ്രകാരം, കാനഡയ്ക്ക് പുറത്ത് ജനിക്കുന്നവർക്ക് മാതാപിതാക്കൾ വഴി പൗരത്വം ലഭിക്കണമെങ്കിൽ മാതാപിതാക്കൾ കാനഡയിൽ ജനിച്ചവരായിരിക്കണം എന്ന നിബന്ധനയുണ്ടായിരുന്നു. എന്നാൽ പുതിയ ഭേദഗതിയോടെ, കനേഡിയൻ പൗരത്വമുള്ള മാതാപിതാക്കളുടെ മക്കൾക്കോ, അവർ ദത്തെടുത്ത കുട്ടികൾക്കോ എത്ര തലമുറ കഴിഞ്ഞാലും പൗരത്വത്തിന് അപേക്ഷിക്കാൻ അർഹതയുണ്ടാകും. 2025 ഡിസംബർ 15-ന് മുൻപ് ജനിച്ച ആർക്കും ഈ ആനുകൂല്യം ലഭിക്കുമെന്ന് ഇമിഗ്രേഷൻ അഭിഭാഷകയായ കസാന്ദ്ര ഫുൾട്സ് വ്യക്തമാക്കി.
അമേരിക്കയിൽ നിന്ന് അപേക്ഷകരുടെ തിരക്ക്
നിയമം മാറിയതോടെ അമേരിക്കയുടെ വിവിധ ഭാഗങ്ങളിൽ നിന്ന് അപേക്ഷകരുടെ പ്രവാഹമാണ് ദൃശ്യമാകുന്നത്. കാലിഫോർണിയ, വാഷിംഗ്ടൺ, ഒറിഗൺ തുടങ്ങിയ പടിഞ്ഞാറൻ സംസ്ഥാനങ്ങളിൽ നിന്നും വടക്കുകിഴക്കൻ മേഖലകളിൽ നിന്നും ഒട്ടേറെപ്പേർ പൗരത്വത്തിനായി താൽപ്പര്യം പ്രകടിപ്പിക്കുന്നുണ്ട്. 1830-നും 1940-നും ഇടയിൽ ക്യൂബെക്കിൽ നിന്ന് കുടിയേറിയവരുടെ പിൻഗാമികളും, 1760-കളിൽ നാടുകടത്തപ്പെട്ട അക്കാഡിയൻ വംശജരുടെ തലമുറയിൽപ്പെട്ടവരും ഈ പട്ടികയിലുണ്ട്. പൗരത്വത്തിനുള്ള അപേക്ഷകളിൽ മുൻവർഷത്തെ അപേക്ഷിച്ച് വൻ വർധനവാണ് രേഖപ്പെടുത്തിയിരിക്കുന്നത്.
പൗരത്വം സ്വയമേവ ലഭിക്കില്ല
അർഹരായവർക്ക് പൗരത്വം നേരിട്ട് ലഭിക്കില്ലെന്നും കൃത്യമായ നിയമനടപടികളിലൂടെ പൗരത്വത്തിനുള്ള തെളിവ് (Proof of Citizenship) ഹാജരാക്കണമെന്നും അധികൃതർ വ്യക്തമാക്കുന്നു. കുടിയേറ്റം നിയന്ത്രിക്കാനും ജനസംഖ്യാ വർധനവ് കുറയ്ക്കാനും കാനഡ സർക്കാർ ശ്രമിക്കുന്നതിനിടെയാണ് പൗരത്വ നിയമത്തിലെ ഈ മാറ്റം എന്നത് ശ്രദ്ധേയമാണ്. മുൻപ് നിലനിന്നിരുന്ന ഒന്നാം തലമുറ നിയന്ത്രണം ഭരണഘടനാ വിരുദ്ധമാണെന്ന് 2023-ൽ ഒന്റാറിയോ സുപ്പീരിയർ കോടതി കണ്ടെത്തിയതിനെത്തുടർന്നാണ് നിയമം പരിഷ്കരിക്കാൻ സർക്കാർ നിർബന്ധിതമായത്. നിലവിൽ പൗരത്വത്തിനുള്ള വാതിലുകൾ വിപുലമായി തുറക്കപ്പെട്ടതോടെ വരും മാസങ്ങളിലും അപേക്ഷകരുടെ എണ്ണം ഉയരുമെന്നാണ് പ്രതീക്ഷിക്കുന്നത്.
more-americans-are-applying-for-proof-of-canadian-citizenship-since-law-passed-lawyer
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
