കണ്ണൂർ: എംപിമാർ നിയമസഭാ തെരഞ്ഞെടുപ്പിൽ മത്സരിക്കേണ്ടതില്ലെന്ന കോൺഗ്രസ് ഹൈക്കമാൻഡ് തീരുമാനത്തിന് പിന്നാലെ കേരള രാഷ്ട്രീയത്തിൽ നാടകീയ നീക്കങ്ങൾ. കണ്ണൂർ ലോക്സഭാ എംപിയും മുതിർന്ന നേതാവുമായ കെ. സുധാകരൻ വരാനിരിക്കുന്ന നിയമസഭാ തെരഞ്ഞെടുപ്പിൽ സ്വതന്ത്ര സ്ഥാനാർത്ഥിയായി മത്സരിക്കാൻ ഒരുങ്ങുന്നതായാണ് സൂചനകൾ. സ്ഥാനാർത്ഥി പട്ടികയിൽ നിന്ന് ഒഴിവാക്കപ്പെട്ടതിൽ കടുത്ത അതൃപ്തിയിലുള്ള സുധാകരൻ, ഇന്ന് ഉച്ചയ്ക്ക് 12 മണിക്ക് നടത്തുന്ന വാർത്താ സമ്മേളനത്തിൽ തന്റെ നിലപാട് ഔദ്യോഗികമായി പ്രഖ്യാപിക്കുമെന്നാണ് കരുതപ്പെടുന്നത്. ഇദ്ദേഹത്തെ സമീപിച്ച ബിജെപി നേതാക്കളുടെ നീക്കങ്ങളും രാഷ്ട്രീയ കേന്ദ്രങ്ങളിൽ ചർച്ചയാകുന്നുണ്ട്.
കോൺഗ്രസ് അധ്യക്ഷൻ മല്ലികാർജുൻ ഖർഗെയുടെ കർശന നിലപാടാണ് സുധാകരനും അടൂർ പ്രകാശിനും തിരിച്ചടിയായത്. സിറ്റിംഗ് എംപിമാർക്ക് ഇളവ് നൽകേണ്ടതില്ലെന്ന തീരുമാനം പുറത്തുവന്നതോടെ സുധാകരന്റെ അനുയായികൾ കടുത്ത പ്രതിഷേധത്തിലാണ്. കണ്ണൂർ ഡിസിസി ഓഫീസിന് മുന്നിൽ പന്തംകൊളുത്തി പ്രകടനങ്ങൾ നടത്തിയ പ്രവർത്തകർ, നേതൃത്വം നൽകിയ വാക്ക് പാലിച്ചില്ലെന്ന് കുറ്റപ്പെടുത്തുന്നു. നേതൃത്വത്തിന്റെ അവഗണനയിൽ പ്രതിഷേധിച്ച് കണ്ണൂരിലെ വിവിധ ഭാഗങ്ങളിൽ സുധാകരൻ അനുകൂലികൾ ഇതിനോടകം തന്നെ രംഗത്തിറങ്ങിക്കഴിഞ്ഞു.
സ്ഥാനാർത്ഥി നിർണ്ണയത്തിലെ അതൃപ്തി പേരാവൂർ മണ്ഡലത്തിലും കടുത്ത പ്രതിസന്ധിയാണ് കോൺഗ്രസിന് സൃഷ്ടിക്കുന്നത്. സണ്ണി ജോസഫിനെതിരെ വിമത സ്ഥാനാർത്ഥിയെ നിർത്തുമെന്ന മുന്നറിയിപ്പുമായി ‘കെഎസ് ബ്രിഗേഡ്’ രംഗത്തെത്തിയിട്ടുണ്ട്. “നന്ദിയില്ലെങ്കിലും നന്ദികേട് കാട്ടരുത്” എന്നെഴുതിയ പോസ്റ്ററുകൾ മണ്ഡലത്തിൽ പ്രത്യക്ഷപ്പെട്ടത് പാർട്ടിക്കുള്ളിലെ ആഭ്യന്തര കലഹം രൂക്ഷമായതിന്റെ തെളിവാണ്. സുധാകരനെ ഒഴിവാക്കിയാൽ ശക്തമായ തിരിച്ചടി നൽകുമെന്ന നിലപാടിലാണ് ഒരു വിഭാഗം നേതാക്കളും പ്രവർത്തകരും.
ഔദ്യോഗിക സ്ഥാനാർത്ഥി പട്ടിക പുറത്തുവരുന്നതോടെ സുധാകരന്റെ പ്രതികരണം നിർണ്ണായകമാകും. ഹൈക്കമാൻഡ് തീരുമാനത്തെ വെല്ലുവിളിച്ച് സുധാകരൻ സ്വതന്ത്രനായി മത്സരിക്കാൻ തീരുമാനിച്ചാൽ അത് കണ്ണൂരിലും മലബാർ മേഖലയിലും യുഡിഎഫിന്റെ വിജയസാധ്യതകളെ കാര്യമായി ബാധിക്കുമെന്ന് രാഷ്ട്രീയ നിരീക്ഷകർ വിലയിരുത്തുന്നു. കോൺഗ്രസ് നേതൃത്വത്തിന്റെ അനുനയ നീക്കങ്ങൾ ഫലം കാണുമോ അതോ സുധാകരൻ പുതിയ രാഷ്ട്രീയ വഴി തേടുമോ എന്നാണ് കേരളം ഉറ്റുനോക്കുന്നത്.
