ഒട്ടാവ: ഇറക്കുമതി ചെയ്ത ഭക്ഷ്യവസ്തുക്കൾ കനേഡിയൻ ഉൽപ്പന്നങ്ങളാണെന്ന വ്യാജേന വിപണനം നടത്തിയതിന് പ്രമുഖ ഗ്രോസറി ശൃംഖലയായ മറ്റൊരു ലോബ്ലോ സ്റ്റോറിനും കൂടി 10,000 ഡോളർ പിഴ. കാനഡയിലെ ഭക്ഷ്യ സുരക്ഷാ ഏജൻസി സി.എഫ്.ഐ.എ (CFIA) തെറ്റായ ‘കൺട്രി ഓഫ് ഒറിജിൻ’ അവകാശവാദങ്ങൾ ഉന്നയിക്കുന്ന സ്ഥാപനങ്ങൾക്കെതിരെ നടപടി കർശനമാക്കിയതിന്റെ ഭാഗമായാണ് ഈ പിഴ ചുമത്തിയത്. രാജ്യവ്യാപകമായി ‘ബൈ കനേഡിയൻ’ കാമ്പയ്ൻ ശക്തമായ സാഹചര്യത്തിൽ ഉപഭോക്താക്കളെ തെറ്റിദ്ധരിപ്പിക്കുന്ന രീതിയിൽ വിദേശ ഉൽപ്പന്നങ്ങൾ വിൽക്കുന്ന കടകളെ ലക്ഷ്യമിട്ടാണ് നിലവിലെ നീക്കം.
ഫ്രാൻസിൽ നിർമ്മിച്ച ചീസ് ഉൽപ്പന്നങ്ങളിലും അമേരിക്കയിൽ നിന്നുള്ള ബ്രോക്കോളി പാക്കറ്റുകളിലും കാനഡയുടെ ദേശീയ ചിഹ്നമായ മേപിൾ ലീഫ് പതിപ്പിച്ച് വിൽപന നടത്തിയതാണ് പിഴയ്ക്ക് കാരണമായത്. ലോബ്ലോയുടെ ഉടമസ്ഥതയിലുള്ള ഫോർട്ടിനോസ് (Fortinos), സൂപ്പർ സ്റ്റോർ (Superstore) എന്നീ സ്ഥാപനങ്ങൾക്കാണ് നിലവിൽ പിഴ ലഭിച്ചിരിക്കുന്നത്. നിയമപ്രകാരം ഒരു ഉൽപ്പന്നം ‘പ്രോഡക്റ്റ് ഓഫ് കാനഡ’ എന്ന് വിശേഷിപ്പിക്കണമെങ്കിൽ അതിന്റെ ഭൂരിഭാഗം നിർമ്മാണപ്രക്രിയയും രാജ്യത്തിനകത്ത് തന്നെ നടന്നിരിക്കണം. 2024 നവംബർ മുതൽ 2026 ഫെബ്രുവരി വരെയുള്ള കാലയളവിൽ ഇത്തരത്തിലുള്ള 78 നിയമലംഘനങ്ങൾ കണ്ടെത്തിയതായി അധികൃതർ വ്യക്തമാക്കി.
ലോബ്ലോയ്ക്ക് പുറമെ മറ്റൊരു പ്രമുഖ ഗ്രോസറി ശൃംഖലയായ സോബേയ്സിനെതിരെയുള്ള (Sobeys) അന്വേഷണവും ഇപ്പോൾ പുരോഗമിക്കുകയാണ്. ഇറക്കുമതി ചെയ്ത അവക്കാഡോ ഓയിൽ ഉൾപ്പെടെയുള്ള ഉൽപ്പന്നങ്ങളിൽ ‘മെയ്ഡ് ഇൻ കാനഡ’ എന്ന തെറ്റായ ലേബലുകൾ കണ്ടെത്തിയതിനെ തുടർന്നാണിത്. എന്നാൽ 10,000 ഡോളർ പോലുള്ള ചെറിയ പിഴകൾ വൻകിട കമ്പനികളെ നിയന്ത്രിക്കാൻ പര്യാപ്തമല്ലെന്ന് മുൻ ഇൻസ്പെക്ടർമാർ അഭിപ്രായപ്പെടുന്നു. ഈ സാഹചര്യത്തിൽ വരാനിരിക്കുന്ന ഫെഡറൽ ബജറ്റിൽ പിഴ തുക വർദ്ധിപ്പിക്കുന്ന കാര്യം സർക്കാർ പരിഗണിക്കുന്നുണ്ട്. വീഴ്ചകളിൽ ലോബ്ലോ മാപ്പ് പറയുകയും ലേബലിംഗ് സംവിധാനം കുറ്റമറ്റതാക്കുമെന്ന് അറിയിക്കുകയും ചെയ്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Another Loblaw store fined for mislabeling; Sobeys also under investigation
