തിരുവനന്തപുരം: ശബരിമലയിലെ യുവതീപ്രവേശന വിഷയത്തിൽ സുപ്രീം കോടതിയിൽ നൽകിയ മുൻ നിലപാട് തിരുത്താൻ സംസ്ഥാന സർക്കാർ ഔദ്യോഗികമായി ഒരുങ്ങുന്നു. ആചാര സംരക്ഷണത്തിന് ഊന്നൽ നൽകിക്കൊണ്ട് വിശ്വാസികൾക്കൊപ്പം നിൽക്കാനാണ് സർക്കാരിന്റെ നീക്കമെന്നാണ് പുറത്തുവരുന്ന സൂചനകൾ. വെള്ളിയാഴ്ച വൈകുന്നേരം ചേരുന്ന മന്ത്രിസഭാ യോഗത്തിൽ ഇതുസംബന്ധിച്ച അന്തിമ തീരുമാനമുണ്ടാകും. നിലവിൽ സുപ്രീം കോടതിയുടെ പരിഗണനയിലുള്ള റിവ്യൂ ഹർജികളിൽ പഴയ സത്യവാങ്മൂലം തിരുത്തിക്കൊണ്ട് പുതിയത് സമർപ്പിക്കാനാണ് സർക്കാർ ആലോചിക്കുന്നത്. നേരത്തെ തിരുവിതാംകൂർ ദേവസ്വം ബോർഡും സമാനമായ രീതിയിൽ നിലപാട് മാറ്റം പ്രഖ്യാപിച്ചിരുന്നു.
2018-ലെ സുപ്രീം കോടതി വിധിയെത്തുടർന്ന് യുവതീപ്രവേശനത്തെ അനുകൂലിച്ച സർക്കാർ, നവോത്ഥാന മൂല്യങ്ങൾ ഉയർത്തിക്കാട്ടിയാണ് അന്ന് വനിതാ മതിൽ ഉൾപ്പെടെയുള്ള പരിപാടികൾ സംഘടിപ്പിച്ചത്. എന്നാൽ ഈ നിലപാട് വലിയ രാഷ്ട്രീയ-ഭരണ പ്രതിസന്ധികൾക്ക് വഴിതുറന്നു. ലോക്സഭാ തിരഞ്ഞെടുപ്പിലും തദ്ദേശ തിരഞ്ഞെടുപ്പിലും ശബരിമല വിഷയം വലിയ തിരിച്ചടിയായെന്ന സി.പി.എം സംസ്ഥാന സെക്രട്ടേറിയറ്റിന്റെ വിലയിരുത്തലിലാണ് ഇപ്പോൾ നയപരമായ മാറ്റത്തിന് തുടക്കമിട്ടിരിക്കുന്നത്. വിശ്വാസികളുടെ വികാരം വ്രണപ്പെടുത്തുന്ന നിലപാടുകളിൽ നിന്ന് പിന്മാറണമെന്ന ധാരണ പാർട്ടി നേതൃത്വത്തിലും ശക്തമാണ്.
ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട വിവാദങ്ങളും ദേവസ്വം ബോർഡിന്റെ സാമ്പത്തിക ക്രമക്കേടുകളും നിലവിൽ സർക്കാരിനെ പ്രതിരോധത്തിലാക്കിയിട്ടുണ്ട്. ഈ സാഹചര്യത്തിൽ വിശ്വാസ സംരക്ഷണത്തിന്റെ പക്ഷത്തേക്ക് മാറുന്നത് രാഷ്ട്രീയമായി ഗുണകരമാകുമെന്ന് സർക്കാർ കരുതുന്നു. എന്നാൽ മുൻ നിലപാടിൽ നിന്ന് മലക്കം മറിയുന്നത് പ്രവർത്തകർക്കിടയിലും പൊതുസമൂഹത്തിലും വ്യക്തമാക്കേണ്ടി വരും എന്നത് സർക്കാരിന് മുന്നിലുള്ള വലിയ വെല്ലുവിളിയാണ്. ഏപ്രിൽ 7-ന് സുപ്രീം കോടതി ഒൻപതംഗ ഭരണഘടനാ ബെഞ്ച് കേസ് പരിഗണിക്കുന്നതിന് മുൻപായി മാർച്ച് 14-നകം സത്യവാങ്മൂലം നൽകാനാണ് സർക്കാർ ലക്ഷ്യമിടുന്നത്.
Kerala Govt Revisits Sabarimala Women Entry, Prioritizes Traditions
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
